Read Samoan Old Version Bible – O LE TUSI PAIA IOSUA, 24 Bible Online

IOSUA, 24 - Samoan Old Version Bible – O LE TUSI PAIA bible

IOSUA, 24

¹Ua faapotopotoina e Iosua itu aiga uma o Isaraelu i Sekema, ma feauina atu toeaina o Isaraelu, ma o latou alii sili ma o latou faamasino, ma o latou faipule; ona tutū ai lea o i latou i luma o le Atua.

²Ona fai atu ai lea o Iosua i le nuu uma, O loo faapea ona fetalai mai o Ieova le Atua o Isaraelu, Sa nonofo anamua o outou tamā i le la itu o le vaitafe, o Tara le tamā o Aperaamo, ma le tamā o Nakori; na latou auauna foi i atua ese.

³Ona ou au mai ai lea o lo outou tamā o Aperaamo ai le la itu o le vaitafe, ma ou ta‘ita‘iina o ia i le nuu uma o Kanana, ma ou faatoateleina lana fanau, ma ou foai atu ia te ia o Isaako.

⁴Na ou foai foi ia Isaako o Iakopo ma Esau; na ou foai ia Esau o le mauga o Seira e fai mona, a o Iakopo ma ana fanau na latou o ifo i Aikupito.

⁵Na ou aauina atu foi Mose ma Arona, ma ou taia Aikupito i mea na ou faia ia te i latou; e mulimuli ane na ou au mai ai outou.

⁶Na ou aumaia o outou tamā nai Aikupito; na outou o mai i le sami; na tuliloa mai foi Aikupito i o outou tamā i kariota, ma ‘au na tietie i solofanua, i le sami Ulaula.

⁷Na latou alalaga atu ia Ieova, ona tuu ai lea o ia le pogisa e va a‘i i latou ma Aikupito; na ia faaoo le sami i o latou luga, ua lofia ai i latou; na iloa e o outou mata o mea na ou faia i Aikupito. Ona outou nonofo lea i le vao i aso e tele.

⁸Na ou faaooina mai foi outou i le nuu o sa Amorī, sa nonofo i le la itu o Ioritana; ona latou tau lea ma outou; na ou tuuina atu foi i latou i o outou lima, ina ia fai mo outou lo latou laueleele; na ou faaumatia lava i latou i o outou luma.

⁹Ona tulai ai lea o Palako le atalii o Seporu, o le tupu o Moapi, na tau ai o ia ma Isaraelu; na ia aami atu ia Palaamo le atalii o Peoro, e fetuu ia te outou.

¹⁰A ua ou le mafai ona faalogo ia Palaamo; o le mea lea na ia faamanuia ai lava ia te outou, ona ou laveaiina lea o outou ai lona lima.

¹¹Na outou sopoia mai Ioritana, ma oo mai i Ieriko; ona tau ai lea ma outou o tagata o Ieriko, o sa Amorī, ma sa Perisē, ma sa Kananā, ma sa Hetī, ma sa Kirekasē, o sa Hivī, ma sa Iepuse; na ou tuuina foi i latou i o outou lima.

¹²Na ou aauina mai lagomumu i o outou luma, na tulia ai i latou i o outou luma, o tupu e toalua o sa Amorī, a e lei tulia i lau pelu ma lau aufana.

¹³Ua ou foaiina atu ia te outou le nuu na le faatigaina ai outou, ma aai tou te lei faia, tou te nonofo ai; ua outou aai foi i tovine ma toolive tou te lei totōina.

¹⁴O lenei, ia outou matatau ia Ieova, ma auauna ia te ia ma le loto sao ma le faamaoni; a ia outou tuueseina o atua na auauna i ai o outou tamā i le la itu o le vaitafe, ma Aikupito, ma ia outou auauna ia Ieova.

¹⁵Pe afai foi e leaga ia te outou ona auauna ia Ieova, ina filifili ia o outou i le aso nei, po o ai tou te auauna i ai; po o atua na auauna i ai o outou tamā, o e sa i le la itu o le vaitafe, po o atua o sa Amorī, e o latou le nuu ua outou nonofo ai; a o a‘u nei ma lo‘u aiga, matou te auauna ia Ieova.

¹⁶Ona tali mai ai lea o le nuu, ua faapea mai, Ia mamao lava ia te i matou ona matou tuua o Ieova, ina ia auauna i atua ese;

¹⁷auā o Ieova lo tatou Atua, o ia lava na aveina ae i tatou ma o tatou tamā, ai le nuu o Aikupito, o le mea sa nofo pologa ai; o ia foi na faia i o tatou luma o ia faailoga tetele, ma na leoleo mai ia te i tatou i le ala uma na tatou o mai ai, ma nuu uma na tatou ui mai ai.

¹⁸Ua tulia foi e Ieova i o tatou luma o nuu uma, o sa Amorī lava o e na nonofo i le laueleele; o i matou foi matou te auauna ia Ieova, auā o ia lava lo tatou Atua.

¹⁹Ona fai atu ai lea o Iosua i le nuu, Tou te le mafaia ona auauna ia Ieova, auā o le Atua paia o ia; o le Atua fuā o ia; na te le faamagaloina o outou solitulafono ma a outou agasala.

²⁰Afai e tuua e outou o Ieova, ma auauna i atua ese, ona liliu mai ai lea o ia, ma faatiga ia te outou, ma faaumatia outou, a o ia na muai agalelei mai ia te outou.

²¹Ona fai mai ai lea o le nuu ia Iosua, E leai; matou te auauna lava ia Ieova.

²²Ona fai atu ai lea o Iosua i le nuu, O molimau outou ia te outou, na filifilia e outou o Ieova e auauna ia te ia. Ona latou fai mai ai lea, O molimau lava i matou.

²³Ona fai atu ai lea o ia, O lenei, ina tuu ese ia o atua ese ua ia te outou, ma uai o outou loto ia Ieova le Atua o Isaraelu.

²⁴Ona fai mai ai lea o le nuu ia Iosua, Matou te auauna ia Ieova lo tatou Atua; matou te faalogo foi i lona siufofoga.

²⁵Ona osia lea e Iosua i lea aso le feagaiga ma le nuu; ua faia foi mo i latou le tulafono ma le faamasinoga i Sekema.

²⁶Ona tusia lea e Iosua o ia upu i le tusi o le tulafono a le Atua; ua ave foi e ia le maa tele, ma faatuina i lea mea i lalo o le aluna se felatai ma le malumalu o Ieova.

²⁷Ua fai atu foi Iosua i le nuu uma, Faauta mai, o le maa lenei e faia ma molimau ia te i tatou; auā ua faalogo ia i afioga uma a Ieova na ia fetalai mai ai ia te i tatou; e fai o ia ma molimau ia te outou, ina ne‘i outou pepelo i lo outou Atua.

²⁸Ona tuuina atu lea e Iosua o le nuu, ia taitasi ma alu i lona tofi.

²⁹Ua mavae ia mea, ona oti ai lea o Iosua le atalii o Nuno, le auauna a Ieova; o ona tausaga e tasi le selau ma le sefulu.

³⁰Ua latou tanumia o ia i le fanua o lona tofi i Timenata-sera i le mauga o Efaraima, i le itu i matu o le mauga o Kaasa.

³¹Ua auauna Isaraelu ia Ieova i aso uma o Iosua ma aso uma o toeaina e na ola mai a ua mavae Iosua, o e na iloa galuega uma a Ieova na ia faia ia Isaraelu.

³²O ivi foi o Iosefa na avae e le fanauga a Isaraelu mai Aikupito, ua latou tanua i Sekema i le fāsi fanua na faatauina e Iakopo i atalii o Hamoro le tamā o Sekema, i tupe e selau; ua fai foi ma tofi o le fanauga a Iosefa.

³³Ua oti foi Eleasaro le atalii o Arona, na tanumia o ia e i latou i le mauga o Fineaso lona atalii, na foaiina atu ia te ia i le mauga o Efaraima.