Read Samoan Old Version Bible – O LE TUSI PAIA IOSUA, 3 Bible Online

IOSUA, 3 - Samoan Old Version Bible – O LE TUSI PAIA bible

IOSUA, 3

¹Ua tulai Iosua i le taeao lava; ua tuua e i latou o Setima, ma o atu i Ioritana, o ia atoa ma le fanauga uma a Isaraelu, ua latou nonofo ai i lea mea, a o lei sopoia atu e i latou o Ioritana.

²Ua mavae aso e tolu, ona feoai lea o le au faipule i le toagālauapi;

³ua latou fai atu foi i le nuu, ua faapea atu, A outou iloa atu le atolaau o le feagaiga a Ieova lo outou Atua, o ave e faitaulaga o sa Levī, ona tuua lea e outou o le mea tou te i ai, ma outou mulimuli atu i ai.

⁴A ia fai se va e va a‘i outou ma le atolaau, pe lua ni afe o kupita pe a fuatia; aua tou te faalatalata atu i ai, ina ia outou iloa le ala tou te ui ai; auā e lei uia e outou lenei ala anamua.

⁵Ua fai atu foi Iosua i le nuu, Ina faapaiaina ia outou e outou; auā e a taeao e faia e Ieova o vavega i o outou luma.

⁶Ona fai atu lea o Iosua i faitaulaga, ua faapea atu, Ia outou sii le atolaau o le feagaiga, ma sopoia atu i luma o le nuu. Ona latou siitia ai lea o le atolaau o le feagaiga, ma latou o atu i luma o le nuu.

⁷Ua fetalai mai foi Ieova ia Iosua, O le aso nei ou te amata ai ona faatupuina lou mamalu i luma o Isaraelu uma, ina ia latou iloa, e pei ona ou i ai ia Mose, e faapea ona ou i ai ia te oe.

⁸Ia e fai atu foi i faitaulaga o e ave le atolaau o le feagaiga, ia faapea atu, A outou oo i le auvai o Ioritana, ona outou tutū ai lea i Ioritana.

⁹Ona fai atu ai lea o Iosua i le fanauga a Isaraelu, Ina faalatalata mai ia iinei, ma faalogo mai i afioga a Ieova lo outou Atua.

¹⁰Ua fai atu foi Iosua, O le mea lenei tou te iloa ai ua ia te outou le Atua soifua, e matuā tulia foi e ia i o outou luma o sa Kananā, ma sa Hetī, ma sa Hivī, ma sa Perisē, ma sa Kirekasē, ma sa Amorī, ma sa Iepusē;

¹¹faauta mai, o le atolaau o le feagaiga, o le ato a le Alii o le lalolagi uma o loo ui atu ai i o outou luma i Ioritana.

¹²O lenei, ina fa‘ifa‘i mai ia ni o outou tagata e toatinoagafulu ma le toalua ai itu aiga o Isaraelu, taitasi le itu aiga ma le tagata e toatasi.

¹³A tutū i le vai o Ioritana o alofivae o faitaulaga o e ave le atolaau a Ieova le Alii o le lalolagi uma, ona vavaeina ai lea o le vai o Ioritana, o le vai e tafe ifo mai luga; e tu foi le vai e pei o se mea maupuepue.

¹⁴Ona o atu lea o le nuu ai o latou fale ie ia sopoia atu Ioritana; ua ave foi e faitaulaga le atolaau o le feagaiga i luma o le nuu;

¹⁵ua oo atu i Ioritana o e na ave le atolaau, ma ua fufui i le auvai o vae o faitaulaga e na ave le atolaau; (auā e lofia auvai uma o Ioritana i aso uma o le seleselegāsaito;)

¹⁶ona tu ai lea o le vai e tafe ifo mai luga, ua tupu ae e pei se mea maupuepue, e matuā mamao lava e oo i le aai o Atama, e latalata ane i Saretana; o le vai na tafe ifo i le sami i le eleele laugatasi, o le sami Oona lea, na mate, ma ua vavaeina; ona sopoia atu ai lea o le nuu i le mea e feagai ma Ieriko.

¹⁷O faitaulaga o e na ave le atolaau o le feagaiga a Ieova na tutumau i latou i le iliti vai matutu i totonu o Ioritana; na ui atu ai o Isaraelu uma i le iliti vai matutu, seia uma ona sopoia atu o Ioritana e le nuu uma.