Read Samoan Old Version Bible – O LE TUSI PAIA IOSUA, 8 Bible Online

IOSUA, 8 - Samoan Old Version Bible – O LE TUSI PAIA bible

IOSUA, 8

¹Ua fetalai mai Ieova ia Iosua, Aua e te fefe, aua e te mata‘u, tou te o ma ‘au uma o le taua, ia tulai, ma alu ae i Ai; faauta, ua ou tuuina i ou lima le tupu o Ai, ma ona tagata, ma lana aai, ma lona laueleele.

²E te faia foi i Ai ma lona tupu, e pei ona e faia i Ieriko ma lona tupu; a o le vete, ma manu ua i ai, tou te fai ma a outou vete. Ia e tofia ni ‘au e tanu i tua o le aai.

³Ona tulai ai lea o Iosua, atoa ma ‘au uma o le taua, e o ae i Ai; na filifilia foi e Iosua o toa malolosi e tolu sefulu o afe, ma aauina atu i latou i le po.

⁴Ua ia fai atu foi ia te i latou, ua faapea atu, Faauta mai ea, ia tanu outou e latalata i le aai, i tua o le aai; aua ne‘i mamao lava outou ma le aai, a ia nofo sauni outou uma lava;

⁵o a‘u foi ma le nuu uma o ia te au, matou te faalatalata atu i le aai; a latou o mai e faafetaiai ia te i matou, e pei o le uluai taua, ona faatulitulia ai lea o i matou i o latou luma;

⁶(auā latou te o mai ia te i matou,) seia matou tosina i latou ai le aai; auā e faapea ane i latou, Ua latou sosola i o tatou luma, e pei o le uluai taua; o le mea lea matou te sosola ai i o latou luma.

⁷Ona outou tulai ai lea i le mea ua tanu ai, ma outou aea le aai; auā e tuuina mai e Ieova lo outou Atua i o outou lima.

⁸A outou maua le aai, ona susunuina lea e outou o le aai i le afi; ia outou faia e pei o le afioga a Ieova; faauta, ua ou fai atu ia te outou.

⁹Ua aauina atu i latou e Iosua; ona latou o ai lea e tanu i a latou ‘au; ua latou nonofo i le va o Peteli ma Ai, i gagaifo o Ai; a o Iosua, na moe ia i lea po faatasi ma le nuu.

¹⁰Ua tulai Iosua i le taeao lava, ua faitaulia e ia le nuu; ona o ae lea i Ai; o fa ma toeaina o Isaraelu, ua muamua i luma o le nuu.

¹¹Ua o ae foi ‘au uma o le taua na ia te ia, ua latou faalatalata atu, ua oo lava i luma o le aai, ona latou to lauapi lea i le itu i matu o Ai; a o le vanu e va a‘i o ia ma Ai.

¹²A ua uma ona ave e ia o tagata pe lima afe, ma tofia i latou e tanu ‘au i le va o Peteli ma Ai, i gagaifo o le aai.

¹³Ua tofia foi e i latou le nuu, o ‘au uma na i le itu i matu o le aai, ma e na tanu ‘au i le itu i gagaifo o le aai, ona alu ai lea o Iosua i lea po i totonu o le vanu.

¹⁴Ua iloa ai e le tupu o Ai, ona latou faataalise ai lea ona tulai i le taeao; ua o mai foi tagata o le aai e fetaiai ma Isaraelu e tau le taua, o ia atoa ma lona nuu uma i le itu aso na tuu i ai, i le eleele laugatasi, a ua le iloa e ia o ‘au na tanu i tua o le aai e tau ma ia.

¹⁵Ona faataga fasia lea o Iosua, ma Isaraelu uma i o latou luma; ma latou sosola i le ala i le vao.

¹⁶Ona faapotopotoina lea o tagata uma na i Ai e tuliloa atu ia te i latou; ua latou tuliloa ia Iosua, ona tosina ai lea o i latou nai le aai.

¹⁷Ua le faatoeina se tagata i Ai ma Peteli, a ua uma atu i tua o Isaraelu; na tuu avanoa foi e i latou le aai, ma latou tuliloa atu ia Isaraelu.

¹⁸Ona fetalai mai lea o Ieova ia Iosua, Ia e faaloaloa le tao o i lou lima i Ai; auā ou te tuuina atu ai i lou lima. Ona faaloaloa lea e Iosua o le tao na i lona lima i le aai.

¹⁹Ona vave laga ai lea o ‘au sa tanu, ai le mea na latou i ai, ma latou taufetuli atu ina ua faaloaloa lona lima; ona latou o atu lea i le aai, ma latou maua, ma latou faavave ona faamuina o le aai i le afi.

²⁰Ona tetepa lea i tua tagata o Ai, ua latou iloa, faauta mai foi, ua alu ae le asu o le aai i le lagi; ona le toe ai lea se malosi ia te i latou, e sosola i lea itu po o lea itu; o tagata foi na sosola atu i le vao, ua liliu mai i e na tuliloa atu ia te i latou.

²¹Ua iloa e Iosua ma Isaraelu uma, ua maua le aai e ‘au na tanu, ua alu ae foi le asu o le aai; ona latou toe foi mai ai lea, ma latou fasia tagata o Ai.

²²Ua o mai foi i latou nai le aai e fetaiai ma i latou; sa i le va o Isaraelu i latou, o isi i lea itu ma isi i lea itu; ua latou fasi ia te i latou ua le toe se tasi, pe sao se tasi o i latou.

²³Ua latou pue ola le tupu o Ai, ma avane o ia ia Iosua.

²⁴Ua uma ona fasia e Isaraelu o e na nonofo uma i Ai, i le fanua i le vao na tuliloaina ai i latou; ua fasia i latou uma i le pelu, ua faaumatia; ona toe foi mai ai lea o Isaraelu uma i Ai, ma latou fasia ai i le pelu.

²⁵O i latou uma na fasia i lea aso, o tane atoa ma fafine, e sefulu o afe ma afe e lua, o tagata uma o Ai.

²⁶Auā na le toe faafoi mai e Iosua lona lima na faaloaloa atu ma le tao, seia matuā faaumatia e ia i latou o e na nonofo uma i Ai.

²⁷Na o manu, ma le vete o lea aai, na ave e Isaraelu mā latou, e tusa ma le afioga a Ieova na ia fetalai atu ai ia Iosua.

²⁸Ua susunuina e Iosua o Ai, ua na faia foi ma faupuegāmaa e faavavau, e faatafunaina lava e oo i le aso nei.

²⁹Ua faatautauina foi e ia le tupu o Ai i le laau ua oo i le afiafi; ua goto le la, ona fai atu ai lea o Iosua ia latou ave ifo lona tino i le laau, ma lafo ai i le mea e ui atu ai i le faitotoa o le aai, ma faaputuina i ona luga le faupuegāmaa tele, ua oo i le aso nei.

³⁰Ona ati ae lea e Iosua o le fata faitaulaga ia Ieova, le Atua o Isaraelu, i le mauga o Evalu,

³¹e pei ona poloai mai ai o Mose le auauna a Ieova i le fanauga a Isaraelu, e pei ona tusia i le tusi o le tulafono a Mose, o le fata faitaulaga e fai i maa atoatoa, e le talai ai e se tasi i se uamea; ona latou fai ai lea i ona luga o taulaga mu ia Ieova, ua faia foi e i latou taulaga faafetai.

³²Ua tusia foi e ia i lea mea i luga o na maa, o le ata o le tulafono a Mose, na tusia e ia i luma o le fanauga a Isaraelu.

³³O Isaraelu uma foi, ma o latou toeaina, ma le au faipule, ma o latou faamasino, ua latou tutū i lea itu ma lea itu o le atolaau i luma o faitaulaga o sa Levī o e na tauave le atolaau o le feagaiga a Ieova; o le tagata ese atoa ma le tama a le eleele; o le tasi vaega o i latou e feagai ma le mauga o Keresema; ma le isi vaega o i latou e feagai ma le mauga o Evalu; e pei ona poloai mai ai o Mose le auauna a Ieova anamua, latou te faamanuia ai le nuu o Isaraelu.

³⁴E mulimuli ane ua faitauina e ia upu uma o le tulafono, o le manuia ma le malaia; e pei o mea uma ua tusia i le tusi o le tulafono.

³⁵Ua leai se upu o upu uma na poloai mai ai Mose, e lei faitaulia e Iosua i luma o le faapotopotoga uma o Isaraelu, ma fafine, ma tama iti, ma tagata ese na feoai ma i latou.