Read Samoan Old Version Bible – O LE TUSI PAIA II TESALONIA, 1 Bible Online

II TESALONIA, 1 - Samoan Old Version Bible – O LE TUSI PAIA bible

II TESALONIA, 1

¹O i matou, o Paulo, ma Siluano, ma Timoteo, o la matou tusi lenei i le ekalesia o tagata Tesalonia, o i le Atua lo tatou Tamā, ma le Alii o Iesu Keriso.

²Ia ia te outou le alofa tunoa ma le manuia mai le Atua lo tatou Tamā, ma le Alii o Iesu Keriso.

³E tatau ona matou faafetai e le aunoa i le Atua ona o outou, le au uso e, e faapei ona tusa, auā ua tupu tele lava lo outou faatuatua, ua faateleina foi lo outou fealofani o outou uma lava taitoatasi.

⁴O lea matou te mitamita ai ia te outou o i matou nei lava, i ekalesia a le Atua, ona o lo outou onosai ma lo outou faatuatua, i ona po o sauaga uma ma puapuaga ua outou faatoatoa ai;

⁵o le faailoga lea o le faamasinoga tonu a le Atua, ina ia ta‘uaogaina outou i le malo o le Atua, o le mea lea e tigaina ai outou.

⁶Auā ua tonu i le Atua e taui atu le puapuaga i e ua faapuapuagaina ai outou;

⁷e ia te outou foi o e puapuagaina, o le mapusaga faatasi ma i matou, pe a faaalia le Alii o Iesu mai le lagi, faatasi ma agelu o lona malosi, i le afi mumū,

⁸na te taui ma sui i e ua le iloa le Atua, ma ua le anaana i le tala lelei a lo tatou Alii o Iesu Keriso;

⁹e faasalaina i latou lava i le fanoga e faavavau lava, ia te‘a ma le Alii ma le mamalu o lona malosi;

¹⁰pe a afio mai o ia ina ia viia i ona lava tagata paia, ma ia ofo ia te ia i lena aso ia te i latou uma o e faatuatua, auā na outou talitonu mai lava i la matou mau.

¹¹O le mea foi lea matou te faatoga atu ai e le aunoa mo outou, ina ia ta‘uaogaina outou e lo tatou Atua ia valaauina, ma ia faaatoatoaina e ia ma le malosi le loto fiafia uma o le agalelei, ma le galuega a le faatuatua;

¹²ina ia viia ona o outou le suafa o lo tatou Alii o Iesu Keriso, ma outou foi ona o ia, e tusa ma le alofa tunoa o lo tatou Atua, ma le Alii o Iesu Keriso.