Read Samoan Old Version Bible – O LE TUSI PAIA II TESALONIA, 2 Bible Online

II TESALONIA, 2 - Samoan Old Version Bible – O LE TUSI PAIA bible

II TESALONIA, 2

¹O lenei, matou te aioi atu ia te outou, le au uso e, i le mataupu i le afio mai o lo tatou Alii o Iesu Keriso, ma lo tatou faapotopotoina ia te ia;

²ina ne‘i vave luluina o outou loto, pe faaatuatuvaleina i se agaga, po o se upu, po o se tusi, peiseai nai ia i matou, peiseai ua oo mai le aso o Keriso.

³Aua ne‘i faasese se tasi ia te outou i se togafiti e tasi; auā e le oo mai lena aso, seia muai ona taunuu o le tete‘a ese, ma ia faaalia mai o le tagata o le agasala, o le tagata lea o le malaia,

⁴o lē tetee atu, ma faamaualugaina e ia ia te ia e sili i mea uma lava ua ta‘uatuaina, ma mea uma ua ifo i ai tagata, o lea ua tietie ai o ia i le malumalu o le Atua, peiseai o le Atua o ia, o loo faaali mai o ia, o le Atua lava o ia.

⁵Tou te le manatu ea, na ou fai atu ia mea ia te outou, a o tatou i ai ma outou?

⁶O lenei foi, ua outou iloa le mea o loo faalavelave, ina ia faaalia mai o ia i ona lava aso.

⁷Auā o loo galue nei lava le mea lilo a le amio leaga, na ona seia aveeseina le o faalavelave.

⁸Ona faaalia mai ai lea o le ua amio leaga, e fano o ia i le Alii, i le mānava mai o lona fofoga, ma faaumatia i le faaali mai o lana afio;

⁹o lona sau foi e pei o le galuega a Satani, i le mana uma, ma faailoga, ma vavega pepelo,

¹⁰ma mea faasese uma o le amio leaga i e a fano; auā ua latou le talia le upu moni ma le fiafia i ai, ina ia faaolaina ai i latou.

¹¹O le mea foi lea e auina atu ai e le Atua ia te i latou le galuega e faasese ai, ina ia latou talia le mea pepelo;

¹²ina ia faasalaina o i latou uma lava o e le talia le upu moni, a e fiafia i le amioleaga.

¹³A o i matou e tatau ona matou faafetai i le Atua e le aunoa ona o outou, le au uso e, e ua alofagia e le Alii, auā na filifili le Atua ia te outou mai le amataga ia faaolaina i le faapaiaina e le Agaga,

¹⁴ma le talitonu i le upu moni, na valaauina ai outou e ia i la matou tala lelei, ina ia maua le manuia o lo tatou Alii o Iesu Keriso.

¹⁵O le mea lea le au uso e, ia outou tumau ai, ma ia taofi mau i upu tuu na a‘oa‘oina ai outou i la matou upu ma la matou tusi.

¹⁶O lo tatou Alii lava o Iesu Keriso, atoa ma le Atua lo tatou Tamā, o le ua alofa mai ia te i tatou, ma na foai mai le faamatala loto e faavavau, ma le faamoemoe lelei i le alofa tunoa, ia faamafanafana atu e ia i o outou loto,

¹⁷ma ia faatumauina outou i upu lelei uma ma galuega lelei uma.