Read Samoan Old Version Bible – O LE TUSI PAIA I. TIMOTEO, 4 Bible Online

I. TIMOTEO, 4 - Samoan Old Version Bible – O LE TUSI PAIA bible

I. TIMOTEO, 4

¹A o loo ta‘utino mai e le Agaga, e o ese nisi i le faatuatua i tausaga amuli, latou te faalogo i agaga e faasese ma mataupu a temoni;

²ona o le pepelo o tagata tala pepelo, o e ua faamuina o latou lava loto fuatia ifo i le uamea aasa;

³latou te vavao i le faiavā, ma faasa isi mea e ‘ai, o mea lava ua faia e le Atua ia talia ma le faafetai e i latou ua faatuatua, ma latou iloa le upu moni.

⁴Auā o mea uma ua faia e le Atua, e lelei lava ia, e le lafoaiina foi se tasi mea, a ia talia ma le faafetai;

⁵auā ua faapaiaina i le afioga a le Atua ma le tatalo.

⁶Afai e te tuuina atu na mea i le au uso, e fai ai oe ma auauna lelei a Iesu Keriso, e tausia oe i upu o le faatuatua ma le mataupu lelei ua e taofi i ai.

⁷A o tala leaga o le vavau a fafine valevalematua, ia e ‘alo ese ai; a ia e faamasani i le amio Atua.

⁸Auā e itiiti le aoga o le faamasani i la le tino; a o le amio Atua e aoga lea i mea uma lava, o loo i ai le mea ua folafolaina mai i la le olaga nei atoa ma lē atali.

⁹E moni lava le upu, e tatau foi ona matuā talia.

¹⁰Aua o le mea lava lea tatou te galulue ai, ua upuleagaina mai ai foi i tatou, auā tatou te faamoemoe i le Atua soifua, o ia o le Faaola o tagata uma, a e sili lava o e ua faatuatua.

¹¹Ia e matuā fai atu na mea, ma e a‘oa‘o atu ai.

¹²Aua ne‘i ‘ino‘ino se tasi i lou taulealea, a ia fai oe ma faaa‘oa‘o i e ua faatuatua, i le upu, ma le amio, ma le alofa, ma le loto, ma le faatuatua, ma le le gaoiā.

¹³Ia e faasaga i le faitau, ma le apoapoai atu, ma le a‘oa‘o atu, seia ou alu atu.

¹⁴Aua ne‘i e faatalale i le mea alofa na tuuina atu ia te oe i le valoaga ma le faaee atu o lima o toeaina.

¹⁵Ia e mafaufau i ia mea, ia e faamasani ai; ina ia iloa ai e tagata uma o oe o le alualu.

¹⁶Ia oe lava ia te oe, atoa ma lau e a‘oa‘o atu, ia e tumau pea i ai; auā a ē fai lena mea, e faaolaina ai oe e oe atoa ma e ua faalogologo ia te oe.