Read Samoan Old Version Bible – O LE TUSI PAIA I. TIMOTEO, 5 Bible Online

I. TIMOTEO, 5 - Samoan Old Version Bible – O LE TUSI PAIA bible

I. TIMOTEO, 5

¹Aua e te aoai atu i se toeaina, a ia aioi atu i ai, peiseai se tamā; o taulelea foi, peiseai o uso;

²o loomatutua, peiseai o tinā; o fafine muli foi, peiseai o tuafafine ia, ma ia le gaoiā lava.

³Ia ava i fafine ua oti a latou tane, o e ua ausage lava.

⁴Afai foi o i ai i se fafine ua oti lana tane ni ana tama po o fanau a ana tama, ia a‘oa‘oina i latou ia muamua ona agalelei i lo latou lava aiga, ma taui atu i o latou mātua; anā o le mea lelei lea ma le mālie i luma o le Atua.

⁵A o le ua oti lana tane ua ausage ma ua tuua toatasi, ua faamoemoe ia i le Atua, ma tumau pea i le faatoga ma le tatalo i le po atoa ma le ao.

⁶A o lē fiafia i la le tino, e ui lava ina ola, ua oti ia.

⁷Ia e matuā fai atu ia mea, ina ia le mata‘uleagaina i latou.

⁸A e afai e le tausi e se tasi i lona aiga, afai foi e le sili ona tausi i e mau ma ia, ua faafitia e ia le faatuatua, e sili foi lona leaga i le ua le faalogo.

⁹Aua ne‘i faitauina se fafine ua oti lana tane seia oo i ona tausaga e onogafulu, sa toatasi foi lana tane;

¹⁰o loo ta‘uleleia foi ona o ana galuega lelei, pe afai ua tausia e ia ni fanau, pe afai ua na alofa i tagata ese, pe afai ua na mulumulu i vae o tagata paia, pe afai ua na agalelei atu i e ua puapuagatia, pe afai ua na tausisi i galuega lelei uma lava.

¹¹A o fafine muli ua oti a latou tane, aua le talia i latou, auā pe a fia sa‘oloto i latou nai ia Keriso, ona fia nofotane ai lea o i latou;

¹²o loo i ai le faasala, ina ua latou lafoai i lo latou uluai faamaoni.

¹³E le na o lea, a e masani foi i latou ma le paie, e feoai i lea fale ma lea fale; e le gata foi ina latou paie, a e seona tautala, ma matamata fua i galuega a nisi, ma tautalatala i mea le tatau.

¹⁴O lenei, ou te loto ia nofotane o fafine muli, ia fanau ai tama, ia matai i latou i o latou aiga, ina ne‘i tuuina atu i loo tetee mai se mea e tasi e ta‘uleagaina ai i latou.

¹⁵Auā ua uma le liliueseina o isi ua mulimuli ia Satani.

¹⁶Ai se tane faatuatua, po o se fafine faatuatua o i ai ni fafine ua oti a latou tane, ia latou tausia i latou aua ne‘i mafatia ai le ekalesia; ina ia latou tausia fafine ua ausage lava.

¹⁷O toeaina o e pule lelei, ia ta‘uaogaina i latou ona faateleina atu i ai o le mamalu, a e faasili i e galulue i le upu atoa ma le a‘oa‘o atu.

¹⁸Auā o loo fai mai le Tusi, Aua ne‘i e fusi le gutu o le povi a o solisolia e ia le saito; i le ma lea, E tatau ona avatu i le faigaluega o lona taui.

¹⁹Aua ne‘i talia se mau i se toeaina, vagana o i ai se mau a le toalua po o le toatolu.

²⁰Ia aoai atu i e agasala i luma o tagata uma, ina ia matatau ai nisi uma lava.

²¹Ou te matuā fai atu lava ia te oe i luma o le Atua, ma le Alii o Iesu Keriso, ma le au agelu na filifilia, ina ia e tausi i na mea ma ia le muai faasala, aua foi le faia se mea ma le faailogaina se tasi.

²²Aua e te vave faaee atu lima i se tasi; aua foi le ‘au faatasi i agasala a isi tagata. Ia taofi oe ia te oe ina ia sao lau amio.

²³Aua e te toe inu le vai auli, a ia e inu sina uaina itiiti, ona o lou manava ma lou ma‘i e tupu soo.

²⁴E iloa tino agasala a isi tagata, e muamua atu i le faamasinoga; a o agasala a isi e mulimuli atu.

²⁵E faapea foi galuega lelei a isi, e iloa tino ia; o mea foi e le o faapea e le mafai ona natia ia.