Read Samoan Old Version Bible – O LE TUSI PAIA II TIMOTEO, 2 Bible Online

II TIMOTEO, 2 - Samoan Old Version Bible – O LE TUSI PAIA bible

II TIMOTEO, 2

¹O lenei, o oe lo‘u atalii e, ia faamalosia oe i le alofa tunoa o loo ia Keriso Iesu.

²O mea foi na e faalogologo mai ai ia te au i molimau e toatele, ia e tuuina atu ai i tagata faamaoni, o e ua mafaia ona a‘oa‘oina atu i nisi.

³O lenei, ia e onosai i mea e tiga ai, faapei o se tagata tau e lelei a Iesu Keriso.

⁴E leai sē tau i le taua na te faalavelavea e ia ia te ia i mea a lenei olaga, ina ia faafiafia o ia i lē na filifili ia te ia e fai ma tagata tau.

⁵Afai foi e finau se tasi i le fia malo, e le faapaleina o ia pe a le finau e tusa ma tulafono.

⁶O lē galue i fanua e tatau ona muai maua e ia le fua.

⁷Ia e mafaufau i mea ou te fai atu na; ona foaiina atu ai lea e le Alii ia te oe le loto matala i mea uma.

⁸Ia e manatua Iesu Keriso o le fanau lava a Tavita, ua faatuina mai o ia nai e ua oti, e tusa ma la‘u tala lelei;

⁹ona o lea ua tigaina ai a‘u, ua oo ina noanoatia o a‘u, peiseai se pagota; a o le afioga a le Atua e le noatia lava lea.

¹⁰O le mea lea ou te onosai ai i mea uma ona o le au filifilia, ina ia maua e i latou lava le ola o loo ia Keriso Iesu ma le manuia e faavavau.

¹¹O le upu moni lenei; auā pe afai tatou te oti faatasi ma ia, tatou te ola faatasi ai foi;

¹²pe afai tatou te onosai, e fai foi i tatou ma tupu faatasi ma ia; pe afai tatou te faafiti ia te ia, e faafiti foi o ia ia te i tatou;

¹³afai e le faamaoni i tatou; e faamaoni pea lava ia, e le mafaia e ia ona faafiti ia te ia.

¹⁴Ia e faamanatu ia te i latou i ia mea, ma ta‘utino i luma o le Alii, aua ne‘i latou fefinauai i upu e leai se aoga, a e faaseseina ai o e faalogologo i ai.

¹⁵Ia e taumafai ina ia avea oe ma le ua fiafia mai i ai le Atua, o le faigaluega e leai se mea e mā ai, na te vavaetonuina le upu moni.

¹⁶A ia e taumamao ma upu leaga ma le le aoga; auā e tupu atili ai le amio faalematau,

¹⁷o a latou upu foi e aati pei o se papala; e i ai Umenio ma Fileto;

¹⁸o i laua ia ua sese i le upu moni, o loo faapea ane, Ua mavae lava le toe tu; ua faaliliu ese ai nisi tagata i le faatuatua.

¹⁹A e ui lava i lea o le faavae mau o le Atua e tu lava lea, o loo i ai lenei faailoga, Ua silafia e le Alii ona lava tagata; atoa ma lea, Ia o ese i le amio leaga i latou uma o e ta‘uta‘u le suafa o Keriso.

²⁰A e le na o ipu auro ma ario ua i le fale tele, a o ipu laau ma omea; o isi ua ta‘uleleia, a o isi ua ta‘uleagaina.

²¹O lenei, ai se tasi e faamamā ia te ia ai nei mea, e fai o ia ma ipu e ta‘uleleia, e faasaina, e aoga foi mo le alii, ua saunia mo galuega lelei uma.

²²Ia e sola ese i tu‘inanau o taulelea, ia e tausisi i le amiotonu, ma le faatuatua, ma le alofa, atoa ma le filemu, faatasi ma i latou o e valaau i le Alii ai le loto mamā.

²³A o sailiga valea ua le a‘oa‘oina mai, ia e ‘alo ese ai, auā ua iloa o mea ia e tupu ai le fefinauaiga.

²⁴Auā e le tatau ona finau o le auauna a le Alii, a ia agamalu i tagata uma, ia mafaia ona a‘oa‘o atu, ma ia onosai,

²⁵ia a‘oa‘o atu ma le agamalu i e o finau mai; pe mafai lava le Atua ona foai atu ia te i latou le salamo, ina ia latou iloa lelei le upu moni;

²⁶ia latou ala mai foi na moe i le mailei a le tiapolo, o e ua maua e ia, ina ia faia lona lava finagalo.