Read Samoan Old Version Bible – O LE TUSI PAIA II TIMOTEO, 3 Bible Online

II TIMOTEO, 3 - Samoan Old Version Bible – O LE TUSI PAIA bible

II TIMOTEO, 3

¹A e ia e iloa e oe lenei mea, o ona aso e gata ai e oo mai ai aso faigata;

²auā e avea tagata ma e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i mātua, o e le faafetai, o e amio leaga,

³o e le lotoaiga, o e tuumavaega, o e faatuaupua, o e le taofi manao o le tino, o e faasaua, o e le alolofa i tagata amio lelei,

⁴o e faalata, o e soona fai, o e ua faafefeteina, o e ua tele le manao i mea faafiafia a e leai se manao i le Atua;

⁵o e ua peiseai ua amio Atua, a o le mana ua i lea mea ua latou teena; ia e ‘alo ese lava i tagata faapena.

⁶E i ai foi nisi o e ulu atu i fale, ma ave faatagataotaua fafine valelea, ua mafatia i agasala, o e ua ta‘ita‘ieseina e tu‘inanau eseese,

⁷ua a‘oa‘oina e le aunoa, a e le āu mafai ona oo ina iloa lelei o le upu moni.

⁸Faapei o Iani ma Iameri e na tetee atu ia Mose, e faapea foi i latou ia ona tetee atu i le upu moni, o tagata ua loto leaga, o e ua le faamaoni i la le faatuatua.

⁹A e le alualu pea i latou, auā e iloa lelei lava lo latou valea e tagata uma, faapei o i laua.

¹⁰A o oe, ua e iloa lelei o la‘u mataupu, o la‘u amio, o le loto mau, o le faamaoni, o le faapalepale; o le alofa,

¹¹ma le onosai, o sauaga ma mea tiga, o mea ia na oo mai ia te au i Anetioka, ma Ikonio, ma Lusa; o sauaga faapena na tigaina ai a‘u; a o le Alii na ia laveai mai ia te au i na mea uma lava.

¹²O i latou uma foi o e loto ina nonofo ma le amio Atua ia Keriso Iesu, e sauaina i latou.

¹³A o tagata amio leaga ma e taupelopelo, e alualu pea lava lo latou leaga, o loo faasese atu, ua faaseseina foi i latou.

¹⁴A o oe, ia e tumau i mea ua a‘oa‘oina ai oe, ma ua mautinoa ia te oe, ina ua e iloa o ia na a‘oa‘o atu ai ia te oe;

¹⁵talu foi ina o e tama itiiti ua e iloa Tusi Paia, e mafaia ona faapoto ai ia te oe e iu ai i le ola i le faatuatua ua ia Keriso Iesu.

¹⁶O Tusi Paia uma lava e mai le Agaga o le Atua ia, e aoga foi ia e a‘oa‘o ai, e aoai ai, e faatonu ai, e faapoto ai foi i le amiotonu,

¹⁷ina ia atoatoa ona lelei ai o le tagata o le Atua, ia saunia lava ia i galuega lelei uma lava.