Read Samoan Old Version Bible – O LE TUSI PAIA II TIMOTEO, 4 Bible Online

II TIMOTEO, 4 - Samoan Old Version Bible – O LE TUSI PAIA bible

II TIMOTEO, 4

¹O lenei ou te matuā fai atu ia te oe i luma o le Atua ma le Alii o Iesu Keriso, o le na te faamasinoina o e ola atoa ma e ua oti, pe a oo i lona faaali mai ma lona malo;

²ia e tala‘i atu le upu, ia e faamalosi i ona aso e taugalemu ai, ma ona aso e le taugalemu ai, ia e faatonu atu, ia e aoai atu, ia e apoapoai atu ma le onosai uma atoa ma le a‘oa‘o atu.

³Auā e oo i ona po latou te le mafafai ai ona talia o le mataupu e ola ai, a e tusa ma o latou lava tu‘inanau, latou te faapotopoto ai a‘oa‘o mo i latou, ina ua feū o latou taliga;

⁴latou te liliu ese foi o latou taliga i le upu moni, a e liliu atu i tala o le vavau.

⁵A o oe, ia e faautauta i mea uma lava, ia e onosai i mea e tiga ai, ia e fai le galuega a lē folafola le tala lelei, ia e matuā faaiuina lau faiva.

⁶Auā o a‘u ua faamaligiina nei lo‘u toto, ua lata ona po ou te alu ai.

⁷Ua ou tau le taua lelei, ua iu ia te au le tausinioga, ua ou taofi i le upu o le faatuatua.

⁸O lenei, ua teuina mo a‘u le pale o le amiotonu, e foaiina mai ia te au i lea lava aso o le Alii le faamasino amiotonu; e le gata foi ia te au, a o i latou uma lava o e fiafia i lona faaali mai.

⁹Ia e taumafai ona sau ia te au ia vave lava;

¹⁰auā ua tuulafoaiina a‘u e Tema, ina ua manao ia i lenei olaga, ua alu foi i Tesalonia; o Kerese ua alu ia i Kalatia, o Tito ua alu ia i Talamatia;

¹¹na o Luka o loo ia te au. Ia oulua o mai ma Mareko; auā e aoga ia ia te au i le galuega.

¹²Ua ou auina atu Tuiko i Efeso.

¹³A ē sau, ia e au mai le ofu talaloa na tuu e a‘u i Teroa, o loo ia Kaapo, atoa ma tusi, a e tautuana a pa‘u e tusi ai ne‘i tuu.

¹⁴E tele mea leaga na faia ia te au e Alesana le fai mea ‘apa memea; ia taui atu e le Alii ia te ia e tusa ma ana galuega.

¹⁵Ia oe foi ia te ia, auā ua na matuā tetee mai i a tatou upu.

¹⁶O la‘u uluai faatonu atu e lei faatasi mai ai se tasi ia te au, a ua lafoai mai e tagata uma lava ia te au; aua ne‘i tauiina atu ia te i latou

¹⁷a e peita sa ia te au le Alii, ma na faamalosi mai ia te au; ina ia faaatoatoaina e a‘u le tala‘iga, ina ia faalogologo i ai o nuu uma lava; ua laveaiina foi a‘u ai le gutu o le leona.

¹⁸E laveai mai foi le Alii ia te au ai mea leaga uma, ma faaola mai ia te au ia oo i lona malo i le lagi; ia ia te ia le viiga e faavavau faavavau lava. Amene.

¹⁹Ua ou alofa atu ia Piseka ma Akula, ma le aiga o Oneseforo.

²⁰Ua nofo pea Erato i Korinito; a o Tofimo na tuua o ia e a‘u i Meleto o ma‘i.

²¹Ia e taalise mai a o lei oo i le tausaga maalili. O alolofa atu ia te oe o Eupolo, ma Paute, ma Lino, ma Kalaotia, ma le au uso uma lava.

²²Ia i ai i lou agaga le Alii o Iesu Keriso. Ia ia te outou le alofa tunoa. Amene.