Read Samoan Old Version Bible – O LE TUSI PAIA TITO, 2 Bible Online

TITO, 2 - Samoan Old Version Bible – O LE TUSI PAIA bible

TITO, 2

¹A o oe, ia e tautala atu i mea e tusa ma le mataupu e ola ai;

²fai atu i toeaina ia mataala i latou, ia faatoeaina, ia faautauta, ia faamaoni i le faatuatua, ma le alfoa, ma le onosai.

³Ia faapena foi loomatutua, ia amio i latou i le amio Atua, aua ne‘i faatuaupua, aua ne‘i faapologaina i latou i le uaina, a ia fai ma a‘oa‘o i mea lelei,

⁴ina ia latou a‘oa‘o atu i fafine muli latou te alofa atu i a latou tane, ia alofa atu i a latou fanau, ia faautauta i latou,

⁵ia le gaoiā, ia tausi lelei i o latou aiga, ia agalelei, ia usiusitai atu i a latou lava tane, ina ne‘i upuleagaina le afioga a le Atua.

⁶Ia faapea foi ona e apoapoai atu i taulelea, ia faautauta i latou.

⁷Ia avea oe a faaa‘oa‘o o galuega lelei i mea uma lava; ia e a‘oa‘o i le mataupu ma le faamaoni,

⁸ma le faatoeaina, ma le upu e ola ai, e le mata‘uleagaina, ina ia faamāina ai o lē tetee mai, ina ua le maua e ia se mea leaga e talatala ane ai ia te outou.

⁹Apoapoai atu i pologa ia usiusitai i latou i o latou lava matai, ia latou taumafai ona faafiafia i ai i mea uma lava, aua ne‘i faatau upu i ai.

¹⁰Aua ne‘i latou gaoi, a ia faaalia e i latou ua latou faamaoni aiai, ina ia viia ai i mea uma lava talu o i latou le mataupu a le Atua lo tatou Faaola.

¹¹Auā o le alofa tunoa o le Atua ua au mai ai le olataga, ua faaalia mai lea i tagata uma lava,

¹²o loo a‘oa‘o mai ai ia te i tatou, ia tatou tete‘a ese ma le faalematau atoa ma tu‘inanau faalelalolagi, a ia tatou nonofo ma le faautauta ma le amiotonu atoa ma le amio Atua i lenei olaga;

¹³o faatalitali atu i le faatuatuaga e manuia ai, o le faaalia lea o le pupula o le Atua silisili, o lo tatou Faaola o Iesu Keriso lea;

¹⁴o le na foaiina mai o ia e ia mo i tatou, e togiola a‘i i tatou ai le solitulafono uma lava, ma ia faamamāina mai e ia e fai mona, o lona lava nuu, e maelega i galuega lelei.

¹⁵Ia e tautala atu i ia mea, ma apoapoai atu, ma aoai atu ma le pule lava. Aua ne‘i inosia oe e se tasi.