Read Samoan Old Version Bible – O LE TUSI PAIA TITO, 3 Bible Online

TITO, 3 - Samoan Old Version Bible – O LE TUSI PAIA bible

TITO, 3

¹Ia e faamanatu atu ia i latou ia latou usiusitai i alii sili ma faipule, ia gauai i alii, ia nofo sauniuni foi i latou i galuega lelei uma lava,

²aua ne‘i upu leaga i se tasi, aua ne‘i faamisa, a ia faapalepale, ma ia faaali atu le agamalu uma i tagata uma lava.

³Auā o i tatou foi, sa vālea i tatou anamua, ma faalogogata, ma faaseseina, sa auauna i tu‘inanau ma mea eseese e fiafia ai, sa nonofo ma le loto leaga ma le mataua, sa inosia ma feitagai.

⁴A ua faaalia mai le agalelei ma le alofa i tagata o lo tatou Faaola le Atua,

⁵ona faaola mai ai lea o ia ia i tatou, e le ona o galuega o i le amiotonu sa tatou faia, a e tusa ma lona lava alofa i le faataeleina i le toefuataiina ma le faafouina e le Agaga Paia,

⁶ua na faamaligi tele mai i luga ia i tatou, ona o Iesu Keriso lo tatou Faaola;

⁷ina ia ta‘uamiotonuina i tatou i lona lava alofa tunoa, ia fai i tatou ma suli e tusa ma le faamoemoe i le ola e faavavau.

⁸O le upu moni lena ou te loto foi ina ia e matuā faamalosi atu i ia mea, ina ia naunau i latou o e ua faatuatua i le Atua ona ia faia galuega lelei; e lelei lava ia mea ma aoga i tagata.

⁹A ia taumamao ma sailiga valea ma tala tupuga, ma le femisaiga, ma le fefinauaiga i la le tulafono; auā o upu le aoga ia ma le faatauvaa.

¹⁰O le tagata na te faatupu le fevaevaeaiga ia e ‘alo ese ia te ia pe a uma atu ia te ia le aoaiga e atu tasi pe atu lua;

¹¹auā ua iloa o le tagata faapena ua liliueseina lava o ia, ma ua agasala, ua faasalaina o ia e ia.

¹²A ou auina atu ia te oe o Aretima, po o Tuiko ia e faataalise ona sau ia te au i Nikopoli; auā ua tonu lo‘u manatu ou te nofo ai i le tausaga maalili.

¹³Ia e matuā fesoasoani i le malaga a Sena le a‘oa‘o tulafono, atoa ma Apolo, ina ia le mativa i laua i se mea e tasi.

¹⁴Ia a‘oa‘oina foi o latou uso ia faia e i latou galuega lelei e maua ai mea aoga, ina ne‘i le fua mai i latou.

¹⁵O i latou uma lava o ia te au o loo alolofa atu i latou ia te oe; ua ou alofa atu ia i latou o e alolofa mai ia te i matou i le faatuatua. Ia ia te outou uma lava le alofa tunoa. Amene.