Read Samoan Old Version Bible – O LE TUSI PAIA EPERU, 1 Bible Online

EPERU, 1 - Samoan Old Version Bible – O LE TUSI PAIA bible

EPERU, 1

¹O le Atua, o le na fetalai mai anamua i o tatou tamā e le au perofeta, na auaua‘i mai i togafiti eseese,

²ua fetalai mai o ia ia i tatou i nei ona aso e gata ai e lona Alo, o le ua tofia e ia e fai mea uma lava mona tofi, na ia faia foi e ia mea uma;

³o ia o le pupula o lona mamalu ma ua matuā tusa lava ma ia, o loo o faatumauina e ia mea uma lava i lana afioga mana, na ia faamamāina e ia lava a tatou agasala, ona nofo ai lea o ia i le itu taumatau o lē Silisili ese o i lugā;

⁴ua faapea ona silisili ese o ia i agelu, pei ona sili o lona suafa ua maua i o latou.

⁵Auā o anafea ea na fetalai atu ai o ia i se tasi o le au agelu, O lo‘u Atalii oe, ua ou fanaua oe i le aso nei; i le ma lea, E fai a‘u mona Tamā, e fai foi o ia mo‘u Atalii?

⁶Ua faapea mai foi o ia i lona toe au mai o lana ulumatua i le lalolagi, Ma ia ifo agelu uma lava a le Atua ia te ia.

⁷O agelu foi ua fetalai mai ai o ia, Ua faia e ia ana agelu o matagi, ma ana auauna o le afi mumū;

⁸a ua faapea mai i le Alo, O lou nofoālii, le Atua e, faavavau faavavau lava lea; o le tootoo o lou malo, o le tootoo o le amiotonu lea.

⁹Ua e fiafia i le amiotonu, a ua e ‘ino‘ino i le amio leaga; o le mea lea, ua faauuina ai oe e le Atua, o lou lava Atua i le suāuu o le olioli e sili i e tou te faatasi.

¹⁰I le ma lea, Le Alii e, na e faavaeina le lalolagi i le amataga, o lagi foi o galuega ia a ou aao;

¹¹e faaumatia ia mea, a o oe e te tumau pea; e pala ia mea uma lava pei o se ofu,

¹²pei o se ie pulupulu e te taataaia, e liua foi ia; a o oe, e te le liliu lava, e leai foi se iuga i ou tausaga.

¹³A o anafea na fetalai atu ai o ia i se tasi o le au agelu, Ina nofo ia oe i lo‘u itu taumatau, seia ou faia e ua fai oe mo latou fili ma mea e tu ai ou vae?

¹⁴E le o agaga e auauna ea i latou uma, ua aauina e auauna ona o i latou o e a maua le ola?