Read Samoan Old Version Bible – O LE TUSI PAIA EPERU, 10 Bible Online

EPERU, 10 - Samoan Old Version Bible – O LE TUSI PAIA bible

EPERU, 10

¹Auā o le tulafono ua i ai le ata o mea lelei atali, a e le o le matuā tusa o ia mea, e le mafaia lava i ia taulaga o loo avatua soo lava i lea tausaga ma lea tausaga ona faaatoatoaina o e faalatalata i ai.

²Ana mafaia po ua tuua ia taulaga, auā ana uma ona faamamāina o e na auauna ai, po ua le toe iloa agasala i le loto fuatia ifo;

³a o ia taulaga na faamanatu ai agasala i lea tausaga ma lea tausaga;

⁴auā e le mafai ona aveeseina o agasala i le toto o povi poa ma ‘oti.

⁵O le mea lea ua fetalai mai ai o ia i lona maliu mai i le lalolagi, O manu fasia atoa ma taulaga ua e le finagalo i ai, a ua saunia e oe le tino mo a‘u;

⁶o taulaga mu ma taulaga mo agasala ua e le fiafia i ai;

⁷ona ou fai ane lea, Le Atua e, silasila mai ia, ou te alu atu e faia lou finagalo; (ua tusia a‘u i le Tusi taai.)

⁸Ua muamua ona fetalai mai, O manu fasia, o taulaga foi, ma taulaga mu, ma taulaga mo agasala ua e le finagalo i ai, ma e le fiafia i ai, o mea ia ua faia e tusa ma le tulafono;

⁹ona toe fetalai mai lea, Le Atua e, silasila mai ia, ou te alu atu e faia lou finagalo; ua aveeseina ai e ia le mea na muamua, ina ia faatumauina o lona lua.

¹⁰O le finagalo lea ua faapaiaina ai i tatou i le taulaga i le tino o Iesu Keriso na fai faatasi.

¹¹Ua tutū foi faitaulaga uma ua auauna i lea aso ma lea aso, o loo avatu soo ia lava taulaga e le mafaia lava ona aveeseina ai o agasala;

¹²peitai ane o ia, na avatua e ia le taulaga e tasi mo agasala, ona nofo lea o ia i le itu taumatau o le Atua e faavavau,

¹³o loo faatalitali atu ai pea, seia avea i latou o e fai o ia mo latou fili ma mea e tu ai ona aao.

¹⁴Auā o le taulaga e tasi ua faaatoatoaina ai e ia e faavavau o e ua faapaiaina.

¹⁵O loo molimau mai ai foi le Agaga Paia ia i tatou; auā ua uma ona muai fetalai mai o ia,

¹⁶O le feagaiga lava lenei ou te faia ma i latou pe a mavae atu ia aso, o loo fetalai mai ai le Alii, ou te tuuina atu a‘u tulafono i o latou loto, ma ou tusi ai i o latou mafaufau;

¹⁷o a latou agasala foi ma o latou solitulafono ou te le toe manatua lava.

¹⁸O lenei, o le mea o i ai le faamagaloina o ia mea, ua leai se toe taulaga mo le agasala.

¹⁹O lenei, le au uso e, ua tatou sa‘oloto e ulu atu i le mea e sili ona paia ona o le toto o Iesu,

²⁰i le ala fou e ola ai, ua faapaiaina e ia mo i tatou i le ie puipui, o lona lava tino lea,

²¹mona ua ia i tatou le faitaulaga sili e pule i le fale o le Atua,

²²ina tatou faalatalata atu ia ma le loto faamaoni i le faatuatua ua mautinoa lava, o sausauina o tatou loto nai le manatu ifo ua leaga, o taelea foi o tatou tino i le vai manino;

²³ina tatou taofi mau ia i le faamoemoe ua tatou ta‘utino atu ma le le fefoifoiai; auā e faamaoni o ia ua folafola mai;

²⁴ia tatou manatunatu foi le tasi i le tasi, ina ia taufaatupu ai le alofa ma galuega lelei;

²⁵aua le lafoaiina le faapotopotoina o i tatou, pei o le masani o isi, a ia fefaamafanafanai; ia atili ai foi ona faapea ina ua outou iloa o le aso o loo tāulata mai.

²⁶Auā afai tatou te agasala ma le loto i ai pe a uma ona talia o le malamalama o le upu moni, ua le toe lava se taulaga mo agasala,

²⁷na o le faatali ma le mata‘u tele i le faasala, ma le toasa e mumū e susunu ai e o tetee atu.

²⁸O le na faaleaogaina le tulafono a Mose na oti o ia i le mau a le toalua po o le toatolu, ua le alofagia;

²⁹pe ni a fa outou i le sili o le mamafa o le taui e ta‘utatauina ai le ua soli le Alo o le Atua, ma ua ta‘ulepaiaina e ia le toto o le feagaiga na faapaiaina ai o ia, ma ua upu leaga i le Agaga o le alofa tunoa?

³⁰Auā ua tatou iloa le na fetalaia mai, O loo faapea mai le Alii, O ia te au le taui ma sui, ou te taui atu. I le ma lea, E faamasino e le Alii lona lava nuu.

³¹O le mea e mata‘u tele ai ona maua e aao o le Atua soifua.

³²A ia outou manatu i aso anamua, ina o faamalamalamaina outou, na outou onosai ai i le taua tele o tiga;

³³ina ua faia outou ma mataaga i upu faifai ma puapuaga, tasi lea mea; i le ma lenei, ina ua faatasia outou ma e na faapeaina;

³⁴auā na outou alolofa mai i o‘u noanoataga, ma outou onosai i le vetega o a outou oloa ma le olioli, ua iloa e outou ua ia te outou le oloa i le lagi e sili ona lelei ma le tumau.

³⁵O le mea lea aua le lafoai ai o outou faamalosi, ua i ai le taui e tele.

³⁶Auā ua aoga ia te outou le onosai, ina ia maua e outou le mea na folafolaina, pe a uma ona faia e outou le finagalo o le Atua.

³⁷Auā e toe itiiti itiiti lava, ona oo mai ai lea o lē maliu mai, e le faatuai mai lava.

³⁸A e ola lē amiotonu i le faatuatua; i le ma lea, A tuumuli, e le fiafia lava lo‘u loto ia te ia.

³⁹A o i tatou e le ni e tuumuli i le malaia, a e faatuatua e ola ai le agaga.