Read Samoan Old Version Bible – O LE TUSI PAIA EPERU, 12 Bible Online

EPERU, 12 - Samoan Old Version Bible – O LE TUSI PAIA bible

EPERU, 12

¹O lenei, o i tatou foi, o loo ua vagavagaia e le faapotopotoga o e matamata mai e faapea ona toatele, ina tatou tuu ese ia o mea mamafa uma, atoa ma le agasala e faalavelavegofie ai i tatou, ia tatou taufetuli ma le onosai i le ala tanu o i o tatou luma,

²ma ia vaavaai atu ia Iesu o le na te ta‘ita‘iina ma le na te faaatoatoaina le faatuatua; o le na onosai i le satauro, na faatauvaa ia te ia le mā, ona o le olioli sa tuu i ona luma, ua nofo foi o ia i le itu taumatau o le nofoālii o le Atua.

³Auā, ia outou mafaufau i le na onosai i le faatu‘i ese faapena ia te ia o e agasala, ne‘i faavaivai o outou loto ma outou le lavatia.

⁴Ua oo i nei ona po ua outou le tetee atu e oo i le faasasaaina o outou toto i lo outou tetee atu i le agasala;

⁵ua galo foi ia te outou le apoapoaiga o loo fetalaia mai ia te outou pei ona tautala i fanau, Lo‘u atalii e, aua le faatauvaa i lou manatu le aoaiga a le Alii; aua foi le faavaivai pe a aoaiina oe e ia.

⁶Auā o le ua alofagia e le Alii, ua aoai atu o ia ia te ia; ua sasaina foi e ia atalii uma ua talia e ia.

⁷Afai e talia e outou le aoaiga, o loo tausi mai le Atua ia te outou pei ona tausi i atalii; auā o ai se atalii ua le aoaiina e lona tamā?

⁸A e afai e aunoa outou ma le aoaiga, ua tofusia ai le fanau uma lava, o tama to i fale outou, a e le ni atalii.

⁹Auā foi sa ia i tatou tamā o tatou tino e na aoai mai ia i tatou, sa tatou faalogo i ai; a e le sili ea i se a ona tatou usiusitai i le Tamā o tatou agaga tatou te ola ai?

¹⁰Auā o i latou na latou aoai mai ia i tatou i nai aso itiiti i lo latou faitalia; peitai ane o ia, ua aoai mai o ia e aoga ia i tatou, ina ia tofusia i tatou i lana amio lelei.

¹¹O aoaiga uma foi a o i ai, e le manatu i ai o se mea e olioli ai, a o le mea e faanoanoa ai; a e mulimuli ane e fua mai ai le fua o le amiotonu e manuia ai e ua a‘oa‘oina ai.

¹²O le mea lea ina faamalosi ai ia i lima ua gagase ma tulivae ua vaivai;

¹³i le ma lea, Ina fai ia o ala laulelei mo o outou vae, ne‘i mapeva le vae ua pipili, a e lelei ina faamaloloina.

¹⁴Ia outou tausisi i le filemu ma tagata uma lava, i le ma le amio lelei, a aunoa ma lea, e leai se tasi na te iloa atu le Alii.

¹⁵Ia outou faaeteete ia te outou, ne‘i ai se tasi e le maua atu le alofa tunoa o le Atua; ne‘i ai se aa oona e tupu ae e faasoesa ia te outou, ma leaga ai nisi e toatele;

¹⁶ne‘i ai se faitaaga, po o se faatalale i mea paia, pei o Esau, o le na avatu lona tofi o le ulumatua e faatau a‘i le ‘ai e tasi.

¹⁷Auā ua outou iloa e mulimuli ane, ina ua manao o ia ia maua le faamanuia, ua teena o ia; auā e ui lava ina ua matuā faatoga ma loimata, a ua le maua e ia se mea e liliu ai le loto o lona tamā.

¹⁸Auā ua outou le oo mai i le mauga e mafai ona pa‘i i ai, ma le afi mumū, ma ao uliuli, ma le pogisa, ma le afā,

¹⁹ma le taalili o le pu, ma le siufofoga ua fetalai mai, sa aioi atu e na faalogo i ai, aua le toe faaopoopo i ai se upu;

²⁰(auā na le lavatia i latou i le mea na poloaiina, Afai foi o se manu e papai atu i le mauga, e fetogia i maa, pe soso‘a ia ati i se tao.

²¹Na faapea foi ona matautia o le mea na iloa, na fai mai ai e Mose, Ou te fefe lava ma ou gatete;)

²²a ua oo outou i le mauga o Siona, ma le aai o le Atua soifua, o Ierusalema faalelagi, ma agelu e manomanō,

²³o le faapotopotoga atoatoa ma le ekalesia o le au ulumatua e ua tusia i le lagi, ma le Atua o le faamasino aoao, ma agaga o e ua amiotonu ua faaatoatoaina,

²⁴ma Iesu le puluvaga o le feagaiga fou, ma le toto e sausau ai, o loo tala mai i mea e sili ona lelei i lo le toto o Apelu;

²⁵ia outou, ne‘i liliu ese outou ia te ia o loo fetalai mai. Auā afai na le sao i latou e na liliu ese i le na fetalai i le lalolagi, e matuā le sao lava i tatou pe a liliu ese ia te ia o loo fetalai mai mai le lagi;

²⁶o lona siufofoga na luluina ai le lalolagi i ia ona po; a ua folafola mai nei e ia, ua faapea mai, E toe tasi ona ou luluina, e le na o le lalolagi, a e atoa foi ma le lagi.

²⁷O lenei upu foi, E toe tasi, ua faailoa mai ai le aveesega o ia mea e mafai ona luluina, e pei o mea ua faia, ina ia tutumau o mea e le mafai ona luluina.

²⁸O lenei, ua maua e i tatou le malo e le mafai ona luluina, ia tatou faafetai ai, tatou te auauna ai i le Atua ma le migao, ma le mata‘u ia fiafia mai ai o ia.

²⁹Auā foi o lo tatou Atua o le afi maamaai ia