Read Samoan Old Version Bible – O LE TUSI PAIA EPERU, 13 Bible Online

EPERU, 13 - Samoan Old Version Bible – O LE TUSI PAIA bible

EPERU, 13

¹Ia tumau le fealofani o le au uso.

²Aua le galo le alofa i tagata ese; auā o lea ua talia ai e isi o agelu ma le le iloa.

³Ia manatua e ua noanoatia, peiseai ua noanoatia outou faatasi ma i latou; ia manatua foi e ua agaleagaina, auā o loo i le tino foi outou.

⁴Ia lelei le faiavā i tagata uma, o le moega foi ia leai sona leaga; e faasalaina e le Atua o e faitaaga ma e mulilulua.

⁵Ia aunoa a outou amio ma le matapeapea; ia gata ia o outou manao i mea ua ia te outou; auā ua fetalai mai o ia, Ou te le tuua lava oe, ou te le tuulafoai lava ia te oe.

⁶O le mea lea tatou te mafai ai ona fai atu ma le faamalosi, O le Alii o lo‘u fesoasoani ia, ou te le fefe lava i se mea e faia e tagata ia te au.

⁷Ia outou manatua o outou ta‘ita‘i, o e ua folafola atu le afioga a le Atua ia te outou; ia outou faaa‘oa‘o i lo latou faatuatua, ma ia mafaufau i le iuga o a latou amio.

⁸O Iesu Keriso e le liu lava ia o ananafi, ma le asō, e oo foi i le faavavau.

⁹Aua le feaveaiina outou i mataupu ese ma uiga eseese; auā e lelei ina faatumauina o le loto i le alofa tunoa, e le o mea e ‘ai, ua leai se aoga i e ua taofi i ai.

¹⁰Ua ia i tatou le fata faitaulaga, e le tatau ona ‘ai i mea o i ai ē o auauna i le fale fetafai.

¹¹Auā o ia manu ua ave o latou toto i le mea paia e le faitaulaga sili e fai ma taulaga mo agasala, ua susunu o latou tino i tua o le toagālauapi.

¹²O lea na tiga ai Iesu i tua o le faitotoa o le aai, ina ia faapaiaina ai e ia o le nuu i lona lava toto.

¹³O le mea lea ina tatou o atu ai ia te ia i tua o le toagālauapi, ma ia tatou onosai i le upu faifai pei o lona faifaiga;

¹⁴auā ua leai so tatou aai tumau iinei, a ua tatou saili i lē atali.

¹⁵O lenei, o ia tatou te avatu soo ai le taulaga o le viiga i le Atua, o le fua lea o tatou laugutu, o loo faafetai atu i lona suafa.

¹⁶Aua le galo ia te outou ona agalelei ma alolofa atu; auā o taulaga faapena e fiafia ai le Atua.

¹⁷Ia outou usiusitai i o outou ta‘ita‘i ma outou gauai i ai; auā o loo leoleo i latou mo o outou agaga, latou te tala atu le tala i ai, ina ia faia ma le olioli, a e aua ma le tiga; auā e le aoga lea ia te outou.

¹⁸Ia outou tatalo mo i matou; auā o loo taofi i matou ua ia te i matou le loto fuatia ifo lelei, o loo loto i matou e amio lelei i mea uma lava;

¹⁹ua atili lo‘u aioi atu ia te outou e fai lena mea, ina ia vave ona toe tuuina atu ai o a‘u ia te outou.

²⁰A o le Atua e ona le manuia, o le na toe faatuina mai nai e ua oti le Leoleo mamoe sili, o lo tatou Alii o Iesu, ona o le toto o le feagaiga e faavavau,

²¹ia faaatoatoaina outou e ia i galuega lelei uma lava, ina ia outou faia lona finagalo, ia galue o ia i totonu ia te outou le mea e mālie i ona luma, ona o Iesu Keriso; ia ia te ia le viiga e faavavau faavavau lava. Amene.

²²Le au uso e, ou te aioi atu ia te outou, ia outou talia lenei upu apoapoai; auā foi ua ou tusi faasaasaa atu ia te outou.

²³Ia outou iloa ua tuuina atu lo tatou uso o Timoteo, afai e vave sau ia, ma te asiasi atu ia te outou ma ia.

²⁴Ua ou alofa atu i o outou ta‘ita‘i uma, atoa ma le au paia uma lava. O loo o alolofa atu i latou o i Italia ia te outou.

²⁵Ia ia te outou uma le alofa tunoa. Amene.