Read Samoan Old Version Bible – O LE TUSI PAIA EPERU, 3 Bible Online

EPERU, 3 - Samoan Old Version Bible – O LE TUSI PAIA bible

EPERU, 3

¹O lenei, le au uso paia e, e ua tofutofusia i le valaau mai le lagi, ina mafaufau ia i le aposetolo ma le faitaulaga sili ua ta‘uta‘uina e i tatou, o Keriso Iesu lea;

²ua faamaoni i le na tofia o ia, pei o Mose foi i lona aiga uma.

³Auā e ta‘uaogaina o ia i le mamalu e sili i lo Mose, pei ona sili o le viiga o lē saunia le fale i lo le fale.

⁴Auā e taitasi fale ma saunia e se tasi; a o le na te saunia mea uma lava o le Atua lea.

⁵Na faamaoni lava Mose i lona aiga uma, o le auauna ia, ina ia molimau o ia i mea o le a talaina mai;

⁶peitai ane o Keriso; o le Alo ia e pule i lona lava aiga; o lona aiga i tatou, pe afai tatou te taofi mau i le faamalosi ma le mitamita i le faamoemoe seia oo i le gataaga.

⁷O le mea lea, pei ona fetalai mai ai le Agaga Paia, O le aso nei afai tou te faalogo ai i lona siufofoga,

⁸aua tou te faamaaa i o outou loto, pei o le faaonoono i le aso na faaosooso ai i le vao;

⁹sa faaosooso mai ai o outou tamā ia te au, sa tofotofo mai ai ia te au, a ua latou iloa a‘u galuega i ona tausaga e fagafulu;

¹⁰o le mea lea na ou ‘ino‘ino ai i lena tupulaga, ma ou fai ane, Ua sese pea lava i o latou loto, ua le iloa e i latou o‘u ala;

¹¹ona ou tauto ai lea i lo‘u ita, Latou te le sao atu lava i lo‘u malologa.

¹²Le au uso e, ia outou, ne‘i ai i so outou le loto leaga ma le le talitonu, tou te o ese ai i le Atua soifua;

¹³a ia outou fefaamafanafanai i lea aso ma lea aso, manū o ta‘ua o le aso nei, ina ne‘i loto fatu so outou i le pepelo o le agasala;

¹⁴auā e mafuta faatasi o i tatou ma Keriso, pe afai tatou te taofi mau lava i lo tatou muai faatuatua e oo i le gataaga;

¹⁵Manū o fai mai, O le aso nei afai tou te faalogo ai i lona siufofoga, aua tou te faamaaa i o outou loto, pei o le faaonoono.

¹⁶Auā o ai ea i latou e na faaonoono ina ua latou faalogologo? e le o i latou uma ea e na o atu nai Aikupito sa ta‘ita‘iina e Mose?

¹⁷O ai foi i latou sa ‘ino‘ino o ia i ai i ona tausaga e fagafulu? e le o i latou ea e na agasala, sa oti o latou tino i le vao?

¹⁸O ai foi i latou na ia tauto i ai, latou te le sao atu i lona malologa? e le o i latou ea e na faalogogata?

¹⁹O lenei, ua tatou iloa na le mafai ona sao atu i ai i latou ona o le le talitonu.