Read Samoan Old Version Bible – O LE TUSI PAIA EPERU, 7 Bible Online

EPERU, 7 - Samoan Old Version Bible – O LE TUSI PAIA bible

EPERU, 7

¹Auā o lenei Mekisateko, o le tupu o Salema, o le faitaulaga a le Atua silisili ese, o le na fetaiai ma Aperaamo ina o foi mai o ia mai le fasiga o tupu, ma na faamanuia atu ia te ia;

²sa foai atu foi e Aperaamo ia te ia mea e sefulu a‘i o mea uma, (o le uiga muamua o lona igoa, o le tupu o le amiotonu, i le ma le tupu o Salema o le tupu o le filemu lea;)

³e leai sona tamā, e leai sona tinā, e leai ni ona tupuga, e leai se amataga i ona aso, po o se gataaga i lona soifua, a ua faapei o le Alo o le Atua, ua tumau o ia o le faitaulaga e faavavau.

⁴O lenei, ina manatunatu ia i le sili o lena alii, sa foaiina atu ia te ia e lea tupuga o Aperaamo o mea e sefulu a‘i mea na faoa.

⁵O i latou foi o le fanauga a Levi, o e ua fai le faiva o ositaulaga, ua poloaiina i latou i le tulafono ia fai mā latou mea e sefulu a‘i mea a le nuu, o latou uso lava ia, a o i latou foi na tutupu mai le tino o Aperaamo;

⁶a o ia e le mai ia i latou lona tupuga, na ia maua mea e sefulu a‘i mea mai ia Aperaamo, ma na faamanuia atu i le na i ai upu na folafolaina.

⁷Ua lāuiloa foi, e faamanuia le itiiti e le sili.

⁸O i lenei mea foi o loo talia mea e sefulu a‘i mea e tagata e oti; peitai o i le la mea e talia e le ua ta‘ua mai lava o loo ola ia.

⁹Afai foi e tusa ona ou faapea atu, o Levi o lē talia o mea e sefulu a‘i mea, na ia avatua mea e sefulu a‘i mea e Aperaamo;

¹⁰auā sa i le tino o lona tamā o ia ina o faafetaiai Mekisateko ia te ia.

¹¹O lenei, afai na faaatoatoaina o mea i le faiva o faitaulaga faa-Levi, (auā na maua e le nuu le tulafono faatasi ma lea,) pe se a le toe aoga ona faatuina o le tasi faitaulaga, e uiga faatasi ma Mekisateko, a e le ta‘ua i le uiga faatasi ma Arona?

¹²Auā afai ua liua le faiva o faitaulaga, e ao lava ina liua le tulafono.

¹³Auā o ia ua ta‘ua mai i ai o nei mea, o so le tasi itu aiga ia, e leai so latou na auauna i le fata faitaulaga;

¹⁴auā ua iloa tino lava na tupu mai ia Iuta lo tatou Alii, o le itu aiga lea na le ta‘uina mai ai e Mose se upu i le faiva o faitaulaga.

¹⁵Ua atili ai foi ona iloa tino, pe afai ua faatuina le tasi faitaulaga pei o Mekisateko,

¹⁶e le o se tulafono o se poloaiga faaletino ua fai ai o ia, a o le mana o le ola e le uma;

¹⁷auā o loo molimau mai o ia, O le faitaulaga oe e faavavau, e uiga faatasi ma Mekisateko.

¹⁸Auā foi ua tatalaina le poloaiga na muamua, ona o lona vaivai ma lona le aoga.

¹⁹Auā na le faaatoatoaina se mea e tasi i le tulafono, a o le faaopoopo o le faamoemoega e sili ona lelei na faaatoatoaina ai; ona o lea ua tatou faalatalata atu ai i le Atua.

²⁰Pei ona sili foi o le ua i ai le tautoga;

²¹(auā ua faia i latou ma faitaulaga a e leai se tauto; peitai ane o ia na faia ma le tauto e le na fetalai atu ia te ia, Ua tauto le Alii, e le salamo ai lava ia, O le faitaulaga oe e faavavau, e uiga faatasi ma Mekisateko;)

²²e faapea foi ona faia o Iesu ma faataunuuga o le feagaiga e sili ona lelei.

²³E toatele foi i latou sa fai ma faitaulaga, auā na le mafai ona tumau o i latou ona o le oti;

²⁴peitai o ia ua tumau e faavavau, o le mea lea ua i ai ia te ia le faiva o faitaulaga e tumau pea;

²⁵o le mea foi lea e mafai ai ia te ia ona faaola pea lava i e faalatalata atu i le Atua ona o ia, auā o loo soifua pea ia e fautua mo i latou.

²⁶Auā e tatau ona ia ia i tatou o se faitaulaga sili faapena, e paia, e agamalu, e leai sona leaga, e taumamao ma ē agasala, e silisili foi ia i luga o lagi;

²⁷e le aoga ia te ia i aso fai soo, pei o ia faitaulaga, e muamua ona fai o taulaga mo ana lava agasala, ona fai ai lea mo agasala a le nuu; auā ua atu tasi lava ona faia e ia o lea mea ina ua avatua o ia e ia ma taulaga.

²⁸Auā o le tulafono e faatuina ai tagata o i ai le vaivai, e fai ma faitaulaga sili; a o le upu o le tauto na mulimuli i le tulafono, ua faatuina ai le Alo ua faaatoatoaina e faavavau.