Read Samoan Old Version Bible – O LE TUSI PAIA EPERU, 8 Bible Online

EPERU, 8 - Samoan Old Version Bible – O LE TUSI PAIA bible

EPERU, 8

¹O le aano lenei o mea o loo tautala ai nei, ua ia i tatou le faitaulaga sili e faapena, o le ua nofo i le itu taumatau o le nofoālii o lē Silisili ese o i le lagi,

²o le auauna i le mea paia, ma le fale fetafai moni, sa faatuina e le Alii, a e le o tagata.

³Auā ua tofia faitaulaga sili uma ina ia faitaulaga i mea alofa ma taulaga; o le mea lea e ao ai ina ia i ai foi i lenei faitaulaga sili o se mea e faitaulaga a‘i.

⁴Auā afai ana i ai o ia i le lalolagi, po ua le fai o ia ma faitaulaga, auā o loo i ai faitaulaga o e faitaulaga i mea alofa e tusa ma le tulafono,

⁵o e o auauna i le mea faaa‘oa‘o ma le ata o mea faalelagi, pei ona a‘oa‘oina o Mose e le Atua, ina a fai le fale fetafai; auā na fetalai mai o ia, Ia oe, ne‘i e le faia mea uma lava e pei o le faatusa sa faaali atu ia te oe i le mauga;

⁶a o lenei, ua maua e ia le faiva e sili, e pei ona faia o ia ma puluvaga o le feagaiga e sili ona lelei, o le ua faamauina i mea na folafolaina e sili ona lelei.

⁷Auā ana sao ona lelei o le feagaiga na muamua, po ua le sailia sona lua.

⁸Auā ua ta‘ua e ia ua le sao le na muamua, ona fetalai atu lea o ia ia te i latou, O loo fetalai mai le Alii, Faauta mai, e oo mai, ona aso ou te osi ai se feagaiga fou ma le aiga o Isaraelu atoa ma le aiga o Iuta;

⁹e le pei o le feagaiga na ou faia ma o latou tamā, i le aso na ou tago atu ai i o latou lima e ta‘ita‘i atu ia te i latou nai le nuu o Aikupito; auā o loo fetalai mai le Alii, na le tumau i latou i la‘u feagaiga, ona ou tuulafoai ai lea ia te i latou;

¹⁰a o le feagaiga lenei ou te faia ma le aiga o Isaraelu pe a mavae atu ia aso, o loo fetalai mai ai le Alii, ou te tuuina atu a‘u tulafono i o latou mafaufau, ma ou tusia i o latou loto; e fai foi a‘u mo latou Atua, e fai foi i latou mo‘u nuu.

¹¹Latou te le a‘oa‘o atu foi taitasi i lē la te tuaoi, ma taitasi i lona uso, e faapea atu, Ia e iloa le Alii; auā e iloa a‘u e tagata uma lava, o tagatānuu atoa ma alii;

¹²auā ou te faamagalo i a latou amioleaga, ou te le toe manatua foi a latou agasala ma o latou solitulafono.

¹³O lana fetalaiga lea, O le feagaiga fou, ua ta‘utuai ai e ia o le ua muamua; a o le mea ua ta‘utuai ma ua tauāu ina vaivai, ua latatala lea ina mavae.