Read Samoan Old Version Bible – O LE TUSI PAIA IAKOPO, 1 Bible Online

IAKOPO, 1 - Samoan Old Version Bible – O LE TUSI PAIA bible

IAKOPO, 1

¹O a‘u o Iakopo, o le auauna a le Atua ma le Alii o Iesu Keriso, o ou alofa atu i itu aiga e sefulu ma le lua ua faasalalauina.

²O‘u uso e, ia outou manatu, o le mea e fiafia tele ai pe a maua outou i tofotofoga eseese;

³ina ua outou iloa o le tofotofoina o lo outou faatuatua e tupu ai le onosai;

⁴a ia atoatoa le galuega a le onosai, ina ia atoatoa ai ma ia sao ona lelei ai outou, ia leai se mea e tasi e mativa ai.

⁵A e afai ua leai se poto i so outou, ina ole atu ia i le Atua, o lē foai tele mai i tagata uma ma le le toe ta‘uta‘ua; ona foaiina mai ai lea ia te ia.

⁶A ia ole atu ma le faatuatua, aua lava ne‘i masalosalo; auā e lē masalosalo e tusa ia ma le peau o le sami ua sousou i le matagi ma felafolafoaiina.

⁷Aua lava ne‘i manatu lea tagata na te maua se mea e tasi mai le Alii;

⁸o le tagata faalotolotolua e faaletumau ia i ona ala uma.

⁹Ia olioli le uso mativa ina ua faamaualugaina o ia;

¹⁰a o le mauoa ia olioli o ia ina ua faamaulaloina; auā e mavae atu ia pei o fuga o laau;

¹¹auā pe a alu ae le la ma le vevela, ona mamae ai lea o le vao, ua malili foi lona fuga, ma ua faaumatia lona matagofie; e faapea foi ona mavae atu o le tagata mauoa i ona ala.

¹²Amuia le tagata o lē onosai i le faaosoosoga; auā a uma ona tofotofoina e maua e ia le pale o le ola, ua folafolaina mai e le Alii i e alolofa atu ia te ia.

¹³A faaosoosoina se tasi, aua le faapea, Ua faaosoosoina a‘u mai le Atua; auā e le mafai ona faaosoosoina o le Atua i mea leaga, e le faaosooso atu foi o ia i se tasi;

¹⁴a ua taitasi ma faaosoosoina, pe a tosina ma maileia i lona lava tu‘inanau;

¹⁵pe a to le tu‘inanau ona fanau mai ai lea o le agasala; a matua le agasala ona fanaua mai ai lea o le oti.

¹⁶O‘u uso pele e, aua ne‘i sese outou;

¹⁷o mea lelei uma e foaifuaina mai, atoa ma mea alofa uma e atoatoa ona lelei, mai luga lava ia, e alu ifo mai le Tamā o malamalama, e le o ia te ia se mea faaletumau, po o sina liliu itiiti;

¹⁸o lona finagalo na fanau ai i tatou i le upu moni, ina ia fai i tatou ma faapolopolo o ana lava mea na fai.

¹⁹O lenei, o‘u uso pele e, ia taitasi le tagata ma faataalise ona faalogologo, ia faagesegese ona tautala atu, ia faagesegese ona ita.

²⁰Auā e le tupu le amiotonu mai le Atua i le ita o tagata;

²¹o lea foi ia lafoai ai mea eleelea uma ma le leaga e silisili, ia talia ma le faamaulalo le upu ua totōina, o lea e mafai ai ona faaolaina o outou agaga.

²²A ia fai outou ma e anaana i le upu, a e aua le na ona faalogologo i ai, o faaseseina ai outou e outou.

²³Auā ai se tasi e faalogologo i le upu a e le anaana i ai, e tusa ia ma le tagata ua vaavaai i le faaata i ona lava mata. na fanau ma ia;

²⁴auā ua vaavaai o ia ia te ia, ona alu ese lea, ua galo loa le uiga o ona mata;

²⁵a o lē matuā matamata i le tulafono o le sa‘olotoga ua atoatoa ona lelei, ma ua tumau i ai o ia, e le se faalogologo ma le faagalogalo lena tagata, a o le anaana i le galuega, e manuia o ia i lona lava anaana.

²⁶Ai se tasi o ia te outou e manatu ifo o ia o le tagata amio Atua a e le taofi i lana upu, a e faaseseina e ia lona lava loto, ua le aoga lana amio Atua.

²⁷O lenei lava le amio Atua e lelei ma le faamaoni i luma o le Atua o le Tamā lea, ina ia tauasiasi atu i e matuā oti ma fafine ua oti a latou tane i o latou tiga, ia leoleo foi o ia ia te ia, ina ne‘i pisai mai o ia i le lalolagi.