Read Samoan Old Version Bible – O LE TUSI PAIA IAKOPO, 2 Bible Online

IAKOPO, 2 - Samoan Old Version Bible – O LE TUSI PAIA bible

IAKOPO, 2

¹O‘u uso e, aua tou te faailoga tagata i lo outou taofi i le mataupu o le faatuatua i lo tatou Alii mamalu o Iesu Keriso.

²Auā afai e ulu atu se tagata i la outou faapotopotoga ma ni mama auro i ona lima ma le ofu pupula, a e ulu atu ai foi se tagata mativa ma le ofu leaga,

³ona outou faaaloalo atu lea ia te ia ua ofu i le ofu pupula, ma faapea atu i ai, Ina alāla ia oe i lenei mea lelei; a e fai atu i le tagata mativa, Ina tu ia oe iina, pe nofo ia iinei i lalo o le mea e tu ai o‘u vae;

⁴e le ua filitaa ea outou ia te outou lava, ma outou fai ma faamasino e leaga o outou manatu?

⁵O‘u uso pele e, faalogologo mai ia; e le ua filifilia ea e le Atua o e matitiva i lenei lalolagi, o tamaoaiga i le faatuatua, ua tofia foi i latou i le malo ua ia folafolaina mai i e alolofa ia te ia?

⁶Peitai outou, ua outou faaletaualoa le tagata mativa, E le ua faasaua ea o e tamaoaiga ia te outou, ma latou fetoso ia te outou i le faamasinoga?

⁷E le ua upu leaga ea i latou i le suafa lelei ua igoa a‘i outou?

⁸Afai foi ua atoatoa ona anaana o outou i le tulafono silisili, e tusa ma le Tusi, Ia e alofa atu i lē lua te tuaoi, ia pei o oe lava ia te oe, tou te amio lelei ai;

⁹a e afai tou te faailogaina tagata, ua outou agasala ai, ua faailoaina ai i le tulafono o solitulafono outou;

¹⁰auā o sē tausi le tulafono uma, a e agasala i se mea e tasi, ua nofo sala ia i mea uma.

¹¹Auā o ia na fetalai mai. Aua le mulilua, ua fetalai mai foi o ia, Aua le fasioti tagata; afai e te le mulilua, a ua e fasioti tagata, ua fai oe ma solitulafono.

¹²Ia faapea ona outou tautala, ia faapea foi ona outou faia, pei o e a faamasinoina i le tulafono o le sa‘olotoga;

¹³aua o le le alofa, e le alofagia o ia i le faamasinoga; a o lē alofa, e olioli ia pe a faamasinoina.

¹⁴O‘u uso e, se a le aoga pe a fai mai se tasi ua ia te ia le faatuatua, a e le ia te ia galuega? e mafai ea le faatuatua ona faaola ia te ia?

¹⁵Afai ua le ofu se uso po o se tuafafine, ua leai foi sana mea e ‘ai i lea aso ma lea aso,

¹⁶a fai atu so outou ia te i latou, Ina o ia outou ma le manuia, ia mafanafana, ma ia maoona, a ua le foai atu ia te i latou ni mea e tatau i le tino, se a lona aoga?

¹⁷E faapea foi le faatuatua, pe afai e le i ai galuega, e mate lava ia ina ua na o ia.

¹⁸A e fai mai se tasi, O ia te oe le faatuatua, o ia te au foi galuega; ia, ina faaali mai ia ia te au lou faatuatua i au galuega, ou te faaali foi ia te oe lo‘u faatuatua i a‘u galuega.

¹⁹Ua e talitonu e toatasi lava le Atua; ua lelei lava lea; ua talitonu foi temoni ma latou tetemu.

²⁰Le tagata valea e, e te le fia iloa ea ua mate lava le faatuatua pe a leai ni galuega?

²¹E lei ta‘uamiotonuina ea lo tatou tamā o Aperaamo i galuega, ina ua avatu e ia o Isaako lona atalii i luga o le fata faitaulaga?

²²E te le iloa ea, na galulue faatasi le faatuatua ma ana galuega, o galuega foi ua atoatoa ai le faatuatua?

²³Sa taunuu ai foi le Tusi, ua faapea mai, Na faatuatua Aperaamo i le Atua, ona ta‘ua ai lea ia te ia e fai ma amiotonu; sa ta‘ua foi o ia o le uo a le Atua.

²⁴O lenei, ua outou iloa ua ta‘uamiotonuina le tagata i galuega, a e le na o le faatuatua.

²⁵E faapea foi Raava le fafine talitane, e lei ta‘uamiotonuina ea o ia i galuega, ina ua talia e ia e na aauina atu, na ia au ese atu ai foi ia te i laua i le tasi ala?

²⁶E faapei o le tino ua oti ia pe a te‘a le agaga, e faapea foi le faatuatua ua mate pe a leai ni galuega.