Read Samoan Old Version Bible – O LE TUSI PAIA IAKOPO, 3 Bible Online

IAKOPO, 3 - Samoan Old Version Bible – O LE TUSI PAIA bible

IAKOPO, 3

¹O‘u uso e, aua le toatele outou e fai ma a‘oa‘o, ina ua tatou iloa e atili ai ona faasalaina o i tatou.

²Auā o mea e tele e sese ai i tatou uma; a le sese se tasi i le upu, o le tagata lea ua sao, na te mafaia foi ona taofi i le tino uma.

³Faauta, ua tatou avane faagutu i gutu o solofanua, ia latou usiusitai mai ia te i tatou, ua tatou liliu ai foi o latou tino uma.

⁴Faauta mai foi i vaa, e ui lava ona tetele, ma faalelelelea i matagi tetele, e liua i le foeuli itiiti lava i le mea e manao i ai le tautai.

⁵E faapea foi le laulaufaiva, o le mea itiiti lea, a ua lafo upu faasili. Faauta, o le afi itiiti e mu ai le vao laau e tele.

⁶O le laulaufaiva o le afi lea, o le faupuega o amio leaga; ua faapea ona tuuina le laulaufaiva i o tatou itu tino, o loo leaga ai le tino uma, ua faamuina ai le olaga nei uma lava; ua faamuina foi lena mai Kēna.

⁷E mafai ona faalataina, ua uma foi ona faalataina i le poto o tagata, o manu amio eseese o manu feai ma manu felelei, o mea fetolofi ma mea ola i le sami.

⁸Peitai e le mafai e se tasi tagata ona faalata i le laulaufaiva; o le mea leaga e le mataofia, ua tumu i le mea oona e oti ai;

⁹o lea ua tatou vivii a‘i i le Atua le Tamā, o lea foi ua tatou fetuu a‘i i tagata ua faia e foliga i le Atua;

¹⁰e luai mai i le gutu e tasi le vivii ma le fetuu. O‘u uso e, e le tusa ona faia faapea o na mea.

¹¹O le puna foi, e puna mai ai ea i le gutu e tasi le vai suamalie ma le vai oona?

¹²O‘u uso e, e mafai ea i le mati ona fua mai ai o le olive, po o le vine e fua mai ai le mati? e faapea foi ua leai se puna e puna mai ai le vai māi ma le vai magalo.

¹³O ai ea so outou ua poto ma ua malamalama? Ina faaali mai ia e ia ai le amio lelei o ana lava galuega i le agamalu o i ai le poto.

¹⁴A e afai o ia te outou le finau leaga ma le misa i o outou loto, soia le mitamita, aua foi le pepelo e faaleaga ai le upu moni.

¹⁵E le o le poto lenei ua alu ifo mai lugā; a o la le lalolagi ia, o le mea faaletino, o le faatemoni ia.

¹⁶Auā o le mea e i ai le mataua ma le misa, o i ai le feavauai ma mea leaga uma.

¹⁷A o le poto mai lugā e muamua ona mamā, i le ua filemu, e agamalu, e ganagofie, e tumu i le alofa ma fua lelei, e le alofa faapito, e le faatagā fai.

¹⁸Ua luluina foi le fua o le amiotonu ma le filemu e i latou o e faatupuina le filemu.