Read Samoan Old Version Bible – O LE TUSI PAIA IAKOPO, 4 Bible Online

IAKOPO, 4 - Samoan Old Version Bible – O LE TUSI PAIA bible

IAKOPO, 4

¹Maifea taua ma misa o ia te outou? E le o lenei ea, mai o outou manao leaga o loo tau i o outou tino uma?

²Ua outou tu‘inanau, a e lei maua; ua outou fasioti ma outou losilosi, a e tou te le mafai ona maua; ua outou femisai ma fai taua, a e lei maua, ina ua outou le ole atu;

³ua outou ole atu, a e lei maua, auā ua ole atu ma le faaletatau, ina ia faauma ai ia mea i o outou manao leaga.

⁴O outou tane mulilulua e, ma fafine mulilulua e, tou te le iloa ea o le fefaauoai ma le lalolagi o le ita lea i le Atua? O lenei, o sē fia uo ma le lalolagi, ua avea o ia ma ita i le Atua.

⁵Fa te outou ea ua fai mai fua le Tusi. O le loto o loo nofo i totonu ia te outou ua naunau ia i le mataua?

⁶A ua foai mai e ia le alofa tunoa e sili; o lea ua faapea mai ai, E tetee atu le Atua i e faamaualuga, a e foai mai le alofa tunoa i e faamaulalo.

⁷O le mea lea ia outou gauai ai i le Atua; ia outou tetee atu i le tiapolo, ona sola ese ai lea o ia ia te outou.

⁸Ia outou faalatalata atu i le Atua, ona faalatalata mai lea o ia ia te outou. Tagata agasala e, ina fafano ia o outou lima, o outou e faalotolotolua e, ina faamamā ia o outou loto;

⁹ia puapuagatia outou, ma ia faavauvau, ma fetagisi; ia liua o outou ‘ata‘ata ma faavauvau, ma lo outou fiafia i le faanoanoa;

¹⁰ina faamaulalo ia i luma o le Alii, ona faamaualugaina lea o outou e ia.

¹¹Le au uso e, ana tou te fefaiupuai; o lē fai upu i lona uso, ma faamasino i lona uso, ua fai upu o ia i le tulafono, ma faamasino i le tulafono; afai foi ua e faamasino i le tulafono, e te le se anaana i le tulafono, a o le faamasino i ai.

¹²E toatasi lava lē fai tulafono na te mafaia ona faaola ma fasioti; o ai ea oe e te faamasino i se tasi?

¹³Faauta mai ia, outou o e fai ane, O le asō po o taeao tatou te o atu ai i lea aai, po o le tasi aai, ma nonofo ai i le tausaga e tasi, ma faatau, ma maua ai oloa;

¹⁴a e le iloa e outou se mea e tupu a taeao. Auā pe se a lo outou ola? O le puao lava lea, ua aliali mai se itu aso itiiti, ona mou ai lea.

¹⁵A e tatau ona outou faapea, A finagalo i ai le Alii, tatou te ola ai, ma tatou faia lea mea ma lea mea;

¹⁶a o lenei, ua outou mitamita i a outou upu faamaualuga; e leaga le mitamita faapena uma lava.

¹⁷O lenei, o le ua iloa e fai le mea lelei, a e le faia, o le agasala lea ia te ia.