Read Samoan Old Version Bible – O LE TUSI PAIA I. PETERU, 1 Bible Online

I. PETERU, 1 - Samoan Old Version Bible – O LE TUSI PAIA bible

I. PETERU, 1

¹O a‘u o Peteru, o le aposetolo a Iesu Keriso, o la‘u tusi lenei i e ua āumau, ma ua faataapeapeina i Pono, ma Kalatia, ma Kapatokia, ma Asia, ma Pitunia,

²o e ua filifilia e tusa mona muai silafia e le Atua le Tamā, i le faapaiaina e le Agaga, ia iu ai i le gauai ma le saaluuga o le toto o Iesu Keriso; ia faateleina ia te outou le alofa tunoa ma le manuia.

³Ia faafetaia le Atua, le Tamā o lo tatou Alii o Iesu Keriso, o le na fanaufouina i tatou ona o lona alofa tele, ina ia iu i le faamoemoe ua ola, i le toe tu mai o Iesu Keriso nai e ua oti,

⁴ia iu i le tofi e le pala, e leai se leaga o i ai, e le mamae lava, o loo teu i le lagi mo i tatou,

⁵o e o leoleoina e le mana o le Atua, i le faatuatua, ia iu i le ola ua saunia, e faaalia mai i ona po e gata ai.

⁶O lea ua outou olioli ai, e ui lava ona faanoanoa o outou i nai aso nei, (pe afai e tatau ai,) i tofotofoga eseese.

⁷O le tofotofo foi o lo outou faatuatua, e silisili ona aoga i le auro e faaumatia, e ui lava ina tofotofoina i le afi, e avea ma mea e iu i le viiga, ma le mamalu, ma le manuia pe a faaalia mai Iesu Keriso;

⁸e le o iloa atu outou ia te ia, a ua alolofa ia te ia; e le o vaai atu nei foi ia te ia, a o loo faatuatua ia te ia, tou te olioli ai ma le fiafia e le matalatalaina, e silisili ese lava;

⁹e maua foi le iuga o lo outou faatuatua, o le faaolaina lea o outou agaga.

¹⁰O le olataga lea na tausailiili i ai ma tausuesue i ai o perofeta, o e na valoia mai le alofa tunoa e oo ia te outou na,

¹¹o e na sailiili po o afea ona po, ma le uiga o ona po na faailoa mai e le Agaga o Keriso sa i totonu ia te i latou, ina ua muai faailoa mai o tiga o Keriso, ma le mamalu e mulimuli ane i ai;

¹²na faaalia mai ia te i latou e le ona o i latou, a o i tatou, na latou tuuina mai ai ia mea, o mea ia ua faamatalaina atu nei ia te outou e i latou o e folafola atu le tala lelei ia te outou, ma le Agaga Paia ua auina mai mai le lagi; o mea ia e naunau i ai le au agelu i le fia matamata i ai.

¹³O lenei, ia outou fusi ae i sulugatiti o outou mafaufau, ia faautauta, ia atoatoa ona faamoemoe, i le alofa tunoa e molia mai ia te outou pe a faaalia mai Iesu Keriso.

¹⁴Ia pei o fanau gauai, aua ne‘i faatusaina outou e outou i o outou tu‘inanau tuai, a o vālea outou;

¹⁵a e pei ona paia o ia na valaauina outou, ia faapea foi outou ona paia i a outou amio uma;

¹⁶auā ua tusia, Ia paia outou, auā o a‘u nei e paia lava a‘u.

¹⁷Afai foi tou te valaau atu i le Tamā o le na te le faailogaina tagata, o le na te faamasino e tusa ma le galuega a tagata e taitoatasi, ia outou nonofo ma le mata‘u, a o outou a āumau iinei.

¹⁸Auā ua outou iloa e lei togiolaina outou i mea e pala, o le ario po o le auro, nai la outou amio le aoga na tuuina mai e o outou tamā;

¹⁹a o le toto tāua o Keriso pei o lo le tamai mamoe e le ponā lava, e leai foi sona leaga;

²⁰na silafia lava e ia anamua a o lei faavaeina le lalolagi, a ua faaalia mai i ona po nei e gata ai ona o outou

²¹o e faatuatua i le Atua talu o ia, na ia toe faatu mai ia te ia nai e ua oti, ma na avatu le mamalu ia te ia, ina ia i ai i le Atua lo outou faatuatua ma lo outou faamoemoe.

²²Ua outou faamamā i o outou loto i le gauai i le upu moni e le Agaga, ua iu i le alofa faamaoni i le au uso, o le mea lea ia matuā fealofani ai outou ai le loto naunau;

²³ua fanaufouina outou e le o le fua e pala, a o le fua e le pala lava, o le afioga a le Atua lea ua oia ma ua tumau e oo i le faavavau.

²⁴Auā o tagata uma lava e tusa ia ma le mutia, o le matagofie uma foi o tagata e pei o le fuga o le vao; e magumagu le mutia, e toulu foi ona fuga;

²⁵a o le afioga a le Alii e tumau lea e faavavau lava. O le afioga foi lea ua folafolaina atu ia te outou na.