Read Samoan Old Version Bible – O LE TUSI PAIA I. PETERU, 2 Bible Online

I. PETERU, 2 - Samoan Old Version Bible – O LE TUSI PAIA bible

I. PETERU, 2

¹O lenei, ia tuueseina e outou le loto leaga uma lava, ma le faa‘ole‘ole uma, ma le taupelopelo, ma le mataua, ma tautalatalaga leaga uma lava;

²faapei o tama meamea faatoa fanau mai ia naunau outou i le suāsusu e le suia o le upu, ina ia outou tutupu ai,

³pe afai ua outou iloa e agalelei lava le Alii.

⁴Ua outou o mai ia te ia, o le maa ola o ia na lafoaiina e tagata, a ua filifilia e le Atua, ua tāua lava,

⁵o outou foi, ua atiina ae outou pei o maa ola, o le fale faaleagaga, o le au ositaulaga paia, e avatu taulaga faaleagaga e mālie i le Atua ona o Iesu Keriso.

⁶Auā foi ua i le Tusi, Faauta, ou te tuu i Siona le maa tulimanu ua filifilia, ma le tāua; e le ma foi sē faatuatua ia te ia.

⁷O lenei, ua ia te outou o e faatuatua o lenei mamalu; a o e faalogogata, O le maa na lafoaiina e tufuga fai fale, ua avea lava lea ma tulimanu aupitoaluga, ma maa e tausuai ai, ma papa e tautevateva ai;

⁸o e tausuai i latou ua faalogogata i le upu, na tofia foi i latou i lea lava mea.

⁹A o outou o le tupulaga ua filifilia outou, o tupu ma ositaulaga, o le nuu paia, ma le nuu na faatauina mai, ina ia outou ta‘uta‘u atu ona lelei na ia valaau ia te outou nai le pouliuli e oo i lona lava malamalama e matuā ofo ai;

¹⁰o e na le fai ma nuu anamua, a o ona po nei ua fai ai ma nuu o le Atua; o e na le alofaina, a o lenei ua alofaina lava.

¹¹Le au pele e, ou te aioi atu ia te outou o tagata ese ma e āumau, ia mamao outou ma tu‘inanau o le tino, o mea ia e tau ma le agaga.

¹²Ia lelei a outou amio i luma o nuu ese, o le mea latou te fai upu leaga ai ia te outou, peiseai o tagata amio leaga outou, latou te vaavaai ai i a outou amio lelei, ona latou vivii atu ai lea i le Atua i le aso e asiasi mai ai.

¹³O lenei, ia outou usiusitai atu i tofiga uma a tagata auā o le Alii; po o le tupu ina ua sili;

¹⁴po o alii, o i latou ua aauina mai e ia ina ia faasalaina ai ē amio leaga, a ia viia ē amio lelei.

¹⁵Auā o le finagalo lea o le Atua, o la outou amio lelei ia faalologo ai le valea o tagata pouliuli;

¹⁶pei o e sa‘oloto, a e aua ne‘i fai le sa‘olotoga ma ufiufi o le loto leaga, a ia faapei o auauna a le Atua.

¹⁷Ia outou ava i tagata uma; ia alolofa atu i le au uso; ia matatau i le Atua; ia ava i le tupu.

¹⁸O outou auauna, ia outou usiusitai ma le mata‘u uma i o outou matai, ana ne‘i gata ai i e agalelei ma e agamalu, a o e amio paaa foi.

¹⁹Auā o le mea lenei e mālie, pe afai o le loto fuatia i la le Atua e onosai ai se tasi i le tiga, o loo faatigaina fua lava o ia.

²⁰Auā pe se a se viiga e maua pe afai tou te onosai pe a tu‘ia outou ona o le agasala? a e afai tou te onosai pe a tigaina outou a o amio lelei, o le mea lava lea e mālie i le Atua.

²¹Auā na valaauina outou ona o lea lava mea; auā na tigaina Keriso lava o le sui o outou, ua tuuina mai ai e ia le faaa‘oa‘o mo outou, ina ia outou mulimuli atu i ona tulagāaao.

²²O le na le agasala lava, na le iloa foi se pepelo i lona fofoga;

²³o le sa agateleina, a e lei toe agatele atu, na faatigaina o ia, a e lei faamatau atu, a ua tuuina atu o ia e ia i le na te faamasino tonu.

²⁴O le na aveina e ia lava a tatou agasala i lona lava tino i luga i le laau, ina ia tete‘a outou ma agasala, tatou te nofo ai i le amiotonu, O ona faalavalava ua malolo ai i tatou.

²⁵Auā o outou sa faapei o mamoe na sē, a o lenei ua toe liliu mai outou i Le na te leoleoina ma tausia o outou agaga.