Read Samoan Old Version Bible – O LE TUSI PAIA II. PETERU, 1 Bible Online

II. PETERU, 1 - Samoan Old Version Bible – O LE TUSI PAIA bible

II. PETERU, 1

¹O a‘u o Simona Peteru, o le auauna ma le aposetolo a Iesu Keriso, o la‘u tusi lenei i e ua maua le faatuatua e tusa lona lelei ma lo matou, i le amiotonu o lo tatou Atua, o lo tatou Faaola lea o Iesu Keriso.

²Ia faateleina ia te outou le alofa tunoa ma le manuia i lo outou iloa lelei le Atua, atoa ma lo tatou Alii o Iesu.

³Faapei ona foaiina mai ia te i tatou ai lona mana Atua o mea uma, e oo ai i le ola ma le amio Atua, i lo tatou iloa lelei o le na valaau mai ia i tatou i lona lelei e silisili lava.

⁴Ona o lea ua ia folafolaina mai ai o mea e silisili ese lava ma le aoga, ina ia tofusia faatasi ai outou i le amio Atua, ina ua sosola ese outou i le amio leaga o i le lalolagi i le tu‘inanau.

⁵O le mea lava lea ia outou matuā faamalosi ai lava, ina ia faaopoopoina le amio lelei i lo outou faatuatua, ia faaopoopo foi le poto i le amio lelei,

⁶ia faaopoopo foi le le gaoiā i le poto, ma ia faaopoopo le onosai i le le gaoiā, o le amio Atua foi i le onosai,

⁷ia faaopoopo foi le alofa i le au uso i le amio Atua, o le alofa foi i le alofa i le au uso.

⁸Auā pe a maua e outou ia mea, ma ua faateleina, ona avea ai lea o outou ma e ua le paie, a o e fua mai le iloa lelei o lo tatou Alii o Iesu Keriso.

⁹Auā o ia e le o i ai nei mea, ua tauaso ia, ua faasegosego, ua faagalogalo foi e ia o le faamamāina o ana agasala tuai.

¹⁰O lenei, le au uso e, ia atili ai ona faamalolosi outou ia faamauina lo outou valaauina ma lo outou filifilia, auā pe a outou faia ia mea tou te le iu vale lava.

¹¹Auā a faapea, ona matuā faaofia ai lea o outou i le ala o le malo e faavavau o lo tatou Alii o lo tatou Faaola lea o Iesu Keriso.

¹²O le mea lea ou te le faatamala ai, e ui lava ina ua iloa e outou, ma ua faatumauina i lenei lava upu moni, a e saga faamanatu atu ia te outou i na mea.

¹³O lo‘u manatu foi e tatau ina ia ou faamalosi atu ia te outou i lo‘u faamanatu atu i aso uma ou te i ai i lenei fale apitaga;

¹⁴ina ua ou iloa e vave ona tuueseina o lo‘u nei fale apitaga, faapei ona faailoa mai ia te au e lo tatou Alii o Iesu Keriso.

¹⁵Ou te matuā taumafai foi ina ia mafaia e outou ona manatu soo i ia mea pe a mavae lo‘u alu ese i le olaga nei.

¹⁶Auā e lei usiusitai i matou i tala o le vavau ua fatua ma le poto, ina ua matou faailoa atu ia te outou le mana ma le afio mai o lo tatou Alii o Iesu Keriso; peitai na matou vaavaai atu i lona lava mamalu.

¹⁷Auā na maua e ia mai le Atua le Tamā o le mamalu ma le viiga, ina ua tŭlei mai ia te ia le siufofoga lava nai le mamalu silisili ese, ua faapea mai, O lo‘u Atalii pele lenei, ou te fiafia lava ia te ia.

¹⁸O le siufofoga lava lea na matou faalogologo ai, na tŭlei mai mai le lagi, ina o matou i ai ma ia i le mauga paia.

¹⁹O loo ia te i tatou foi le upu o le valoaga e sili lona mausali, e lelei ona outou naunau i ai, e pei o se lamepa e mumū i le mea pogisa, seia tafa mai ata, seia alu ae foi le fetu ao i o outou loto.

²⁰Ia muai iloa lenei mea, ua leai se valoaga o i le Tusi e faamatalafuaina.

²¹Auā e le o le loto o tagata na tuu mai ai le valoaga anamua, a o tagata paia o le Atua na talatalaina mai ina ua osofia mai e le Agaga Paia.