Read Samoan Old Version Bible – O LE TUSI PAIA II. PETERU, 2 Bible Online

II. PETERU, 2 - Samoan Old Version Bible – O LE TUSI PAIA bible

II. PETERU, 2

¹Sa i ai foi i le nuu o perofeta pepelo, e pei ona i ai ia te outou, o a‘oa‘o pepelo, latou te faatupuina faalilolilo o vaevaega e fano ai, ma latou faafiti i le Alii na ia faatau mai ia te i latou, o i latou lava e oo mai ai ia i latou le malaia e vave mai lava.

²E toatele foi latou te mulimuli atu i a latou mea e fano ai, talu o i latou e upuleagaina ai le ala o le upu moni.

³O le matapeapea foi e fai ai outou e i latou ma mea faatau i a latou upu pepelo; e le tuai mai ia te i latou le sala na fetalaia mai talu anamua, o lo latou malaia foi e le moe lea.

⁴Auā afai na le faasaoina e le Atua le au agelu o e na agasala, a ua na tuuina atu i latou i maea uamea o le pogisa i seoli, ina ia taofia i latou e oo i le faamasinoga;

⁵e lei faasaoina foi le lalolagi tuai, na o Noa lē tala‘i le amiotonu, o lona toavalu lea na faaolaina, ina ua au mai le lolo i le lalolagi faalematau;

⁶o aai foi o Sotoma ma Komoro ua na taui atu i ai i le olapalaina, ina ua lelefu, ua tuu ma faailoga i e faalematau i aso amuli;

⁷na ia laveai foi ia Lota o le amiotonu, sa tiga i le amio faamatāitu a e faaletaupulea;

⁸(auā o lea tagata amiotonu, sa tiga lona loto faamaoni a o nofo faatasi ma i latou, i lona vaai atu ma faalogo atu i lea aso ma lea aso, i a latou amio faaletaupulea;)

⁹ua silafia e le Alii se mea e laveai mai ai i e amio Atua ai le faaosoosoga, a e taofi i e amio leaga e oo i le aso faamasino ina ia faasalaina i latou;

¹⁰a e sili lava i latou o e mulimuli atu i la le tino i le tu‘inanau i le fia ulavale, ma latou ta‘ufaatauvaa i alii; ua faamalosi, ua finau vale, ma ua le fefe ona upu leaga i e ua mamalu.

¹¹A o agelu e sili ona malosi ma le mana, e le molimau lava se upu leaga e faasala ai ia te i latou i luma o le Alii.

¹²A o i latou nei, faapei o mea ola e tutupu ma le le o i ai se mafaufau, na faia ina ia puea ma fasimatea, latou te faifai i mea latou te le iloa, e fano lava i latou i lo latou lava leaga;

¹³e maua e i latou le taui o le amioletonu; fa te i latou o le mea e fiafia ai le sololelei i le ao, o ila i latou ma mea e pona ai, o loo sololelei lava i o latou lava faasese, ina o fai faigaai i latou faatasi ma outou;

¹⁴ua tutumu o latou mata i le fafine mulilua, e le mafai foi ona mapu i le agasala, latou te maileia tagata ua le faatumauina, o ia te i latou le loto ua masani i le matapeapea, o tagata ua faafanoina;

¹⁵ua tuua e i latou le ala tonu, ua sese i latou, ua mulimuli atu i le ala o Palaamo le atalii o Posoru, o le na manao i le totogi o le amioletonu.

¹⁶A ua aoaiina o ia ona o lona lava solitulafono, ua gagana mai i le leo o le tagata le manu le tautala, ua na vavao atu i le valea o le perofeta.

¹⁷O puna o vai i latou e le o i ai se vai, o ao ua lelea i le afā, ua tuu mo i latou le pogisa o le pouliuli e faavavau.

¹⁸Auā o loo tautala i latou i upu faasausili ma le le aoga, latou te maileia i tu‘inanau o le tino ma le faamatāitu o e na matuā sosola ese i e ua nonofo ma le sese.

¹⁹Ua latou folafola atu ia te i latou le sa‘olotoga, a o i latou lava ua fai ma pologa o le amio leaga; auā pe a toilalo se tasi i se tasi, ua nofo pologa o ia ia te ia.

²⁰Auā afai na latou sosola ai mea leaga a le lalolagi ina ua iloa lelei o le Alii o le Faaola lea o Iesu Keriso, a e toe faalavelaveina, ma toilalo i latou i na mea, ona tele ai lea o le leaga o lo latou iuga i lo latou amataga.

²¹Auā e lelei pe a na latou le iloa le ala o le amiotonu, a e leaga ina ua latou iloa, ma toe liliu ese i le poloaiga paia sa tuuina mai ia te i latou.

²²A ua taunuu ia te i latou le upu faataoto moni, Ua toe foi le ulī i lona lava puaiga; i le ma lea, O le puaa na faataeleina ua toe foi ia e taafili i le palapala.