Read Samoan Old Version Bible – O LE TUSI PAIA II. PETERU, 3 Bible Online

II. PETERU, 3 - Samoan Old Version Bible – O LE TUSI PAIA bible

II. PETERU, 3

¹Le au pele e, ou te tusi atu ia te outou lenei tusi e lua, o ia tusi, ou te faamafanafana atu ai i o outou loto faamaoni i lo‘u faamanatu atu;

²ina ia outou manatu ai i upu na muai fai mai e le au perofeta paia, ma le poloaiga a matou o aposetolo a le Alii o le Faaola lea;

³ua muamua, ona iloa o lenei mea, e o mai i ona aso e gata ai o e tauemu, latou te savavali e tusa ma o latou lava tu‘inanau;

⁴e faapea mai foi i latou, O ifea o i ai le upu na folafolaina ai lona afio mai? auā talu ona momoe o le augātamā, ua tutumau pea o mea uma talu ona faatoa faia.

⁵Auā latou te mananao ia lilo lenei mea ia te i latou, sa i ai le lagi talu anamua, o le lalolagi foi na i le moana lea, ua faatumauina foi i le moana, ona o le afioga a le Atua,

⁶o lea mea foi sa faaumatia ai le lalolagi tuai ina ua lofia i le vai;

⁷a o le lagi nei ma le lalolagi ua tuu ona o lea lava afioga, ia taofia mo le afi i le aso e faamasino ai ma fano ai tagata faalematau.

⁸A e aua ne‘i lilo ia te outou, le au pele, lenei mea e tasi, e tusa i luma o le Alii le aso e tasi ma tausaga e afe, o le afe foi o tausaga e tusa ma le aso e ta si.

⁹E le faatuai mai le Alii i le mea na folafolaina mai, faapei o le manatu a isi tagata i le faatuai; a e peitai ua onosai mai lava o ia ia i tatou, ona ua le finagalo ia fano se tasi, a ia oo uma lava i le salamo.

¹⁰A e sau le aso o le Alii pei o se gaoi i le po, e mavaeeseina ai le lagi ma le gogolo tele, e te‘a eseese ai foi o mea na fai a‘i ina ua mu; o le lalolagi foi ma galuega o i ai e susunuina lava.

¹¹O lenei, o le a te‘a eseese nei mea uma, pe faapefea la outou amio e tatau ai i le amio lelei ma le amio Atua;

¹²o loo faatalitali ma naunau atu ia aulia mai le aso o le Atua, e te‘a eseese ai le lagi ina ua mu, e liu suāvai foi o mea na fai a‘i ina ua mu?

¹³A e faatalitali i tatou i le lagi fou ma le lalolagi fou, pei o lana na folafola mai, e mau ai le amiotonu.

¹⁴O lenei, le au pele e, ua outou faatalitali i ia mea, o lea ia outou finafinau ai lava ina ia maua outou e ia ma le manuia, ua le ponā, ma le le mata‘uleagaina.

¹⁵Ia outou manatu o le onosai o lo tatou Alii o le olataga lea; faapei ona tusi atu ia te outou e Paulo lo tatou uso pele, e tusa ma le poto ua foaiina atu ia te ia;

¹⁶faapei o ana tusi uma lava, o loo talatalaina ai nei mea; o i ai nisi upu faamatalagatā, ua faauigaeseina e tagata e lei a‘oa‘oina, ma ua le faatumauina, faapea o isi Tusi foi e oo ai lo latou lava malaia.

¹⁷O lenei, le au pele e, ia outou faaeteete ia te outou, auā ua muai iloa e outou, ne‘i ta‘ita‘ieseina outou i le sese o e faaletaupulea, tou te pauu ai i le mea sa outou tumau ai.

¹⁸A ia tutupu outou i le alofa tunoa ma le poto i a lo tatou Alii o lo tatou Faaola lea o Iesu Keriso. Ia ia te ia le viiga i ona po nei, ma ia oo i le faavavau lava. Amene.