Read Samoan Old Version Bible – O LE TUSI PAIA I. IOANE, 1 Bible Online

I. IOANE, 1 - Samoan Old Version Bible – O LE TUSI PAIA bible

I. IOANE, 1

¹O le mea sa i ai talu le amataga, na matou faalogologo i ai, na matou vaavaai atu i ai o matou mata, na matou matamata ai, na tagotago foi o matou lima i a le Lokou o le ola;

²(na faaalia mai foi le ola, na matou vaai atu, matou te molimau foi i ai, ma ua matou ta‘u atu ia te outou le ola e faavavau, o lena sa i le Tamā, a ua faaalia mai ia te i matou;)

³o le mea na matou vaavaai i ai ma faalogologo i ai, matou te ta‘u atu ai ia te outou, ina ia outou mafuta faatasi ma i matou; o loo matou mafuta faatasi foi i le Tamā lea atoa ma lona Alo o Iesu Keriso.

⁴Matou te tusi atu foi nei mea ia te outou ina ia atoatoa ai lo outou fiafia.

⁵O lenei foi le feau na matou faalogologo ai mai ia te ia, ua matou faailoa atu ai foi ia te outou, o le malamalama lava le Atua, a e leai lava se pouliuli o ia te ia.

⁶Afa tatou te fai atu, ua tatou mafuta faatasi ma ia, a e savavali i tatou i le pouliuli, ua tatou pepelo ai, ua tatou le faia foi le upu moni.

⁷A e afai tatou te savavali i le malamalama, faapei ona i ai o ia i le malamalama, ona tatou mafuta faatasi ai lea o le tasi ma le tasi, o le toto foi o Iesu Keriso lona Alo e faamamāina ai i tatou i agasala uma lava.

⁸Afai tatou te faapea, E leai sa tatou agasala, ua sese ai i tatou ia i tatou, e le o i totonu ia te i tatou le upu moni;

⁹a e afai tatou te faaali a tatou agasala, e faamaoni o ia, ma le amiotonu e faamagalo ai a tatou agasala, ma faamamā mai ia i tatou i amioletonu uma lava.

¹⁰Pe afai tatou te faapea, Tatou te lei agasala, ua tatou fai ai o ia ma pepelo, e le o i totonu ia te i tatou lana afioga.