Read Samoan Old Version Bible – O LE TUSI PAIA I. IOANE, 2 Bible Online

I. IOANE, 2 - Samoan Old Version Bible – O LE TUSI PAIA bible

I. IOANE, 2

¹Si a‘u fanau e, ou te tusi atu nei mea ia te outou, ina ne‘i agasala outou; pe afai foi e agasala se tasi, o ia te i tatou le fautua i luma o le Tamā, o Iesu Keriso lea, o lē amiotonu.

²O le togiola foi o ia mo a tatou agasala, e le gata foi i a tatou, a e atoa foi ma agasala a le lalolagi uma lava.

³O le mea foi lea tatou te iloa ai ua tatou iloa o ia, pe afai tatou te tausi i ana poloaiga.

⁴O sē faapea, Ua ou iloa o ia, a e le tausi e ia i ana poloaiga, o le pepelo lava lea, e le o i totonu ia te ia le upu moni.

⁵A o lē tausi i lana afioga, e moni, ua atoatoa le alofa i le Atua i totonu ia te ia. O le mea lea ua tatou iloa ai o i totonu ia te ia i tatou.

⁶O lē faapea o loo tumau ia i totonu ia te ia, e tatau ona savali o lena tagata faapei ona savali o ia.

⁷Le au uso e, ou te le tusi atu ia te outou se poloaiga fou, a o le poloaiga tuai, ua ia te outou talu le amataga; o le poloaiga tuai o le upu lea ua outou faalogologo ai talu le amataga.

⁸Ou te tusi atu foi le poloaiga fou ia te outou, ua moni lea mea ia te ia, atoa ma outou, auā o loo mavae atu le pouliuli, a ua pupula mai nei lava le malamalama moni.

⁹O lē faapea, o i le malamalama o ia, a o loo ita i lona uso, o i le pouliuli lava ia ua oo mai i ona po nei.

¹⁰O sē alofa i lona uso, o loo tumau ia i le malamalama, e leai foi se mea ia te ia e tausuai ai.

¹¹A o lē ita i lona uso, o i le pouliuli o ia, o loo savali foi i le pouliuli, e le iloa foi e ia le mea e alu i ai, auā ua faatauasoina ona mata e le pouliuli.

¹²Le fanau e, ou te tusi atu ia te outou, auā ua faamagaloina a outou agasala ona o lona suafa.

¹³Outou tamā e, ou te tusi atu ia te outou, auā ua outou iloa o ia o loo i ai talu le amataga. Taulelea e, ou te tusi atu ia te outou, auā ua outou manumalo i loo leaga. Tama iti e, ou te tusi atu ia te outou, auā ua outou iloa le Tamā.

¹⁴Outou tamā e, ua a‘u tusi atu ia te outou, auā ua outou iloa o ia o loo i ai talu le amataga. Taulelea e, ua ou tusi atu ia te outou, auā o malolosi outou, o loo tumau foi ia te outou le afioga a le Atua, ua outou manumalo foi i loo leaga.

¹⁵Aua tou te mananao i le lalolagi, po o mea o i ai i le lalolagi. Pe afai e manao se tasi i le lalolagi, e le o ia te ia le alofa i le Tamā.

¹⁶Auā o mea uma lava o i le lalolagi, o le tu‘inanau o le tino, ma le tu‘inanau o mata, ma le faalialia o lenei olaga, e le mai le Tamā ia, a e mai le lalolagi.

¹⁷O le a mavae atu foi le lalolagi, atoa ma lona tu‘inanau, a o lē fai le finagalo o le Atua, e tumau lea e faavavau.

¹⁸Tama iti e, o ona aso nei e gata ai, faapei ona outou faalogo ai foi o loo sau le anetikeriso, o loo i ai nei foi anetikeriso e toatele; o le mea lea ua tatou iloa ai o ona aso nei e gata ai.

¹⁹Na latou o ese ia i tatou, a e lei ni o tatou i latou; auā pe afai ni o tatou i latou, po ua latou tumau ma i tatou; a ua o ese i latou ina ia faaalia ai e le ni o tatou i latou uma.

²⁰A o outou, o ia te outou le faauuina mai le Paia, ua outou iloa ai foi mea uma.

²¹Ua ou le tusi atu ia te outou, auā ua outou le iloa le upu moni, a e peitai ina ua outou iloa lava, ua iloa foi e leai se tala pepelo mai le upu moni.

²²O ai ea le tagata pepelo, pe afai e le o le ua faafiti, ua faapea, E le o le Keriso o Iesu? O le anetikeriso lava lea o le ua faafiti i le Tamā atoa ma le Alo.

²³Ai se faafiti i le Alo, e le o ia te ia le Tamā; (o le ua ta‘uta‘ua le Alo, ua ia te ia foi le Tamā.)

²⁴O lenei, o le mea ua outou faalogologo i ai talu le amataga, ia tumau lava lea ia te outou; afai e tumau ia te outou le mea ua outou faalogologo i ai talu le amataga, ona outou tumau ai lea i le Alo atoa ma le Tamā.

²⁵O le mea foi lenei na folafola mai e ia ia te i tatou, o le ola e faavavau.

²⁶Ua ou tusi atu ia mea ia te outou i e o faasese atu ia te outou.

²⁷O le faauuina foi ua outou maua mai ia te ia, e tumau lea ia te outou, e le aoga foi ona a‘oa‘oina atu e se tasi ia te outou; a e faapei ona a‘oa‘o atu ia te outou e lea lava faauuina i mea uma lava, e moni foi lea, a e leai sona pepelo; faapei ona a‘oa‘o atu foi ia te outou, ia outou tumau lava ia te ia.

²⁸O lenei foi, le fanau e, ia outou tumau ia te ia, ina ia maua ai e i tatou le faamalosi pe a faaali mai o ia, ia le faamāina foi i tatou i ona luma i lona afio mai.

²⁹Afai ua outou iloa o lē amiotonu ia, ua outou iloa ai o i latou uma o e fai le amiotonu ua fanau mai i latou ia te ia.