Read Samoan Old Version Bible – O LE TUSI PAIA I. IOANE, 3 Bible Online

I. IOANE, 3 - Samoan Old Version Bible – O LE TUSI PAIA bible

I. IOANE, 3

¹Faauta i le silisili o le alofa ua foaiina ma e le Tamā ia te i tatou, ina ua ta‘ua i tatou o le fanau a le Atua; o le mea lea e le iloa ai i tatou e le lalolagi, auā na le iloa o ia.

²Le au pele e, o le fanau i tatou a le Atua i nei ona po, a e lei faaalia mai nei le uiga o i tatou a amuli; a ua tatou iloa, pe a faaali mai o ia, ona foliga ai lea o i tatou ia te ia, auā tatou te iloa tino ai lava o ia.

³O i latou uma foi o i ai lenei faamoemoe ia te i latou, ua taitasi ma faamamāina o ia e ia, faapei ona mamā o ia.

⁴O i latou uma lava o e fai le agasala, ua latou soli foi i tulafono; o le agasala o le solitulafono lava lea.

⁵Ua outou iloa foi na faaalia o ia ina ia aveeseina e ia a tatou agasala; e le o ia te ia foi se agasala.

⁶E le agasala se tasi o e tumau ia te ia; o sē agasala ua le vaai o ia ia te ia, ua le iloa foi o ia e ia.

⁷Le fanau e, aua ne‘i faasese se tasi ia te outou; o lē fai le amiotonu, o le amiotonu lea, faapei ona amiotonu o ia.

⁸O lē fai le agasala, mai le tiapolo lava ia; auā ua agasala le tiapolo talu le amataga. O le mea lava lea na faaalia mai ai le Alo o le Atua, ina ia faaumatia e ia galuega a le tiapolo.

⁹O i latou uma o e ua fanau mai i le Atua, latou te le faia le agasala; auā o loo tumau i totonu ia te i latou lana fua; e le mafai foi ona agasala, auā ua fanau mai i latou i le Atua.

¹⁰O le mea lea ua iloa ai le fanau a le Atua ma le fanau a le tiapolo. O i latou uma o e le fai le amiotonu, e le mai le Atua i latou, atoa ma ē le alolofa i o latou uso.

¹¹Auā o le poloaiga lenei ua outou faalogologo i ai talu le amataga, ia tatou fealofani.

¹²E le pei o Kaino na i loo leaga, na fasioti foi i lona lava uso; se a foi le mea na ia fasioti ai ia te ia? Ona o lana amio ina leaga, a o le amio a lona uso ua tonu.

¹³O‘u uso e, aua tou te ofo pe a ita mai le lalolagi ia te outou.

¹⁴O i tatou, ua tatou iloa ua oo i tatou i le ola sa i le oti, auā o loo alolofa i tatou i le au uso; o se le alofa i le uso, o loo tumau ia i le oti.

¹⁵O i latou uma o e ita i o latou uso, o fasioti tagata i latou; ua outou iloa foi e leai sē fasioti tagata e tumau ia te ia le ola e faavavau.

¹⁶O le mea lava lenei ua tatou iloa ai le alofa, ina ua tuuina atu e ia o lona lava soifua e sui a‘i i tatou; e tatau foi ona tatou tuuina atu lo tatou ola e sui a‘i le au uso.

¹⁷O sē ua i ai le oa a le lalolagi nei, pe a iloa atu e ia lona uso ua mativa, a e punitia lona loto alofa ia te ia, pe faapefea ona tumau o le alofa i le Atua i lea tagata?

¹⁸La‘u fanau e, aua ne‘i tatou alolofa tau o le upu ma le gutu, a o le amio ma le faamaoni.

¹⁹O le mea foi lea ua tatou iloa ai ua i le upu moni i tatou, e mautinoa foi o tatou loto i ona luma.

²⁰Auā pe afai e faasala o tatou loto ia i tatou, ua sili lava le Atua i o tatou loto, ua silafia foi e ia mea uma.

²¹Le au pele e, afai e le faasala o tatou loto ia i tatou, e maua ai e i tatou le faamalosi i luma o le Atua.

²²O mea uma foi tatou te ole atu ai, e maua mai ia te ia, auā ua tatou tausi i ana poloaiga, tatou te faia foi mea e lelei i ona luma.

²³O lenei foi lana poloaiga, ia tatou faatuatua i le suafa o lona Alo o Iesu Keriso, ma ia tatou fealofani, faapei ona tuuina mai e ia o le poloaiga ia i tatou.

²⁴O lē tausi foi i ana poloaiga, o loo tumau lea i totonu ia te ia, o ia foi o i totonu ia te ia; o le mea foi lenei ua tatou iloa ai o loo tumau o ia i totonu ia i tatou, auā o le Agaga ua ia foaiina mai ia te i tatou.