Read Samoan Old Version Bible – O LE TUSI PAIA I. IOANE, 4 Bible Online

I. IOANE, 4 - Samoan Old Version Bible – O LE TUSI PAIA bible

I. IOANE, 4

¹Leau pele e, aua tou te faalogo i agaga uma lava, a ia outou tofotofo i agaga pe mai le Atua i latou; auā e toatele perofeta pepelo ua o atu i le lalolagi.

²O le mea lenei tou te iloa ai le Agaga o le Atua, O agaga uma o e ta‘utino, ua maliu mai Iesu Keriso i le tino, mai le Atua lava i latou.

³A o agaga uma o e le ta‘utino, ua maliu mai Iesu Keriso i le tino, e le mai le Atua i latou; o lo le anetikeriso lava lenei ua outou faalogo ai o le a sau, o loo i ai nei i le lalolagi.

⁴O outou, le fanau e, mai le Atua lava outou, ua outou manumalo foi ia te i latou, auā e sili o ia ua ia te outou, i le ua i le lalolagi.

⁵O i latou, e o le lalolagi lava i latou, o le mea lea o loo tautalatala ai i latou i la le lalolagi; e faalogo atu foi le lalolagi ia te i latou.

⁶O i matou, mai le Atua lava i matou, o le ua iloa le Atua e faalogo mai o ia ia te i matou; o le le mai le Atua e le faalogo mai o ia ia te i matou; o le mea lea ua tatou iloa ai le agaga moni ma le agaga sese.

⁷Le au pele e, ia tatou fealofani; auā mai le Atua le alofa; o i latou uma foi o e alolofa ua fanau mai i latou mai le Atua, ua iloa foi e i latou le Atua.

⁸O se le alofa ua le iloa e ia le Atua; auā o le Atua, o le alofa lava ia.

⁹O le mea lava lenei ua faaalia mai ai le alofa o le Atua ia te i tatou, ina ua auina mai e le Atua lona Alo e toatasi i le lalolagi, ina ia tatou ola ia te ia.

¹⁰O le alofa lava lenei, e le ona ua tatou alofa i le Atua, a ua alofa mai o ia ia te i tatou, ua na auina mai foi lona Alo o le togiola mo a tatou agasala.

¹¹Le au pele e, afai ua faapea ona alofa mai o le Atua a te i tatou, e tatau ai ona tatou fealofani.

¹²E lei vaaia lava le Atua e se tasi; a tatou fealofani, ua tumau le Atua i totonu ia te i tatou, ua atoatoa foi le alofa ia te ia i totonu ia i tatou.

¹³O le mea lava lenei ua tatou iloa ai ua tumau i tatou i totonu ia te ia, o ia foi i totonu ia i tatou, auā o lona Agaga ua ia foaiina mai ia te i tatou.

¹⁴O i matou foi, ua matou vaaia, ua matou molimau ai foi, na auina mai e le Tamā o le Alo, o le Faaola o le lalolagi.

¹⁵O sē ta‘utino atu, o Iesu o le Alo o le Atua o ia, o loo tumau le Atua i totonu ia te ia, o ia foi o i totonu o le Atua.

¹⁶O i tatou foi, ua tatou iloa ma ua faatuatua i le alofa ua i le Atua ia te i tatou. O le Atua, o le alofa lava ia; o lē tumau i le alofa, ua tumau ia i totonu o le Atua, o le Atua foi o i totonu ia te ia.

¹⁷O le mea lava lenei ua atoatoa ai le alofa ia te i tatou, ina ia tatou maua le faamalosi i le aso o le faamasinoga; auā e pei o ia, e faapea foi i tatou i lenei lalolagi.

¹⁸E leai se fefe i le alofa, a o le alofa atoatoa e faateaeseina ai le fefe; auā o le mea tiga le fefe; o le ua fefe, e le faaatoatoaina o ia i le alofa.

¹⁹O i tatou, ua tatou alolofa ia te ia, auā na ia muai alofa mai ia te i tatou.

²⁰Pe afai e faapea mai se tasi, Ou te alofa i le Atua, a e ita i lona uso, o le pepelo lava ia; auā o le le alofa i lona uso ua ia vaai atu i ai, pe mafai faapefea ona alofa o ia i le Atua ua ia le vaai atu i ai.

²¹O lenei foi le poloaiga ua tatou maua mai ia te ia, o lē alofa i le Atua ia alofa foi o ia i lona uso.