Read Samoan Old Version Bible – O LE TUSI PAIA FAAMASINO, 1 Bible Online

FAAMASINO, 1 - Samoan Old Version Bible – O LE TUSI PAIA bible

FAAMASINO, 1

¹Ua mavae le oti o Iosua, ona fesili ai lea o le fanauga a Isaraelu ia Ieova, ua faapea atu, Po o ai e muamua ona alu ae i sa Kananā mo i matou, e tau ma i latou?

²Ua fetalai mai Ieova, E alu ae Iuta; faauta, ua ou tuuina atu le nuu i lona lima.

³Ona fai atu ai lea o Iuta ia Simeona lona uso, Ia ta o ae ma a‘u i lo‘u tofi, ina ia tatou tau ma sa Kanana; o a‘u foi, ta te o ae ma oe i lou tofi. Ona la o ae ai lea ma Simeona.

⁴Ua alu ae foi Iuta, ona tuuina atu ai lea e Ieova o sa Kananā ma sa Perisē i o latou lima; ua latou fasia foi o latou i Piseka e sefulu afe o tagata.

⁵Ua latou maua foi Atonipiseka i Piseka; ona latou tau ai lea ma ia; ua latou fasia foi sa Kananā ma sa Perisē.

⁶A ua sola Atonipiseka; ua latou tuliloa ia te ia, ua maua, ona latou tipiesea ai lea ona lima matua ma ona vae matua.

⁷Ona fai ane ai lea o Atonipiseka, E toafitugafulu tupu ua tipieseina o latou lima matua ma o latou vae matua, na latou samusamu i lalo o la‘u laoai; e pei ona ou faia, e faapea lava ona tauia mai au e le Atua. Ua latou avea o ia i Ierusalema, ona oti lea o ia i lea mea.

⁸Ua sii foi le taua e le fanauga a Iuta i Ierusalema, ma ua latou aea, ua latou fasia ai i le pelu, ma latou susunuina le aai i le afi.

⁹E mulimuli ane foi ua o ifo le fanauga a Iuta e tau ai le taua ma sa Kananā, o e sa nonofo i le atu mauga, ma le itu i toga, ma le nuu maulalo.

¹⁰Ua alu foi Iuta e tau ma sa Kananā, o e sa nonofo i Heperona; (o Kiriata-arapa, o le igoa lea anamua o Heperona;) ua latou fasia foi o Sesai, ma Aimano, ma Talemai.

¹¹Ona o atu lea o i latou ai lea mea e tau ma e sa nonofo i Tiperi; (o Kiriata-sapera, o le igoa lea anamua o Tiperi.)

¹²Ona fai atu lea o Kalepo, O se na te fasia Kiriata-sapera, ma aea ai, ou te avatu ia te ia o Akesa lo‘u afafine e fai mana avā.

¹³Ona aea ai lea e Otinielu le atalii o Kinasa, o le uso itiiti lea o Kalepo; ona avatu ai lea e ia o Akesa lona afafine ia te ia e fai mana avā.

¹⁴Ua alu atu ia, ona faaoso ai lea o ia ia te ia, na te ole atu i se fanua mai lona tamā; ua alu ifo ia nai le asini, ona fai mai ai lea o Kalepo ia te ia, Se a ea lou manao?

¹⁵Ona fai atu lea o ia ia te ia, Ia e alofa mai ia te au; auā na e avane ia te au le fanua i le itu i toga; ia e foai mai foi ma ni vaipuna. Ona avatu ai lea e Kalepo ia te ia o vaipuna o i luga atoa ma vaipuna o i lalo.

¹⁶O le fanau a le sa Kenī, o le tamā lea o le avā a Mose, ua latou o ae nai le aai o pama faatasi ma le fanauga a Iuta, i le vao o Iuta i lona itu i toga o Arata; ua latou o foi ma nonofo faatasi ma le nuu.

¹⁷Ona o lea o Iuta ma Simeona lona uso, ua latou fasia sa Kananā, e sa nonofo i Sefata, ua latou faaumatia ai lava; ona faaigoa ai lea o le igoa o le aai o Horema.

¹⁸Ua maua foi e Iuta o Kasa ma ona fanua, ma Asekelona ma ona fanua, o Ekerona foi ma ona fanua.

¹⁹Na i ai Ieova ia Iuta; ua na tulia e sa nonofo i le mauga, a ua le tulia e sa nonofo i le vanu, auā sa ia te i latou kariota uamea.

²⁰Ua latou faatoina atu o Heperona mo Kalepo, pei ona fai mai ai o Mose; ua ia tulia foi ai lea mea atalii o Anaki e toatolu.

²¹A o sa Iepusē, e ua nonofo i Ierusalema, e lei tulia i latou e le fanauga a Peniamina; a ua nonofo faatasi o sa Iepusē ma le fanauga a Peniamina i Ierusalema, ua oo mai i ona po nei.

²²Ua o ae foi le aiga o Iosefa i Peteli; na ia te i latou foi o Ieova.

²³Na auina nisi e le aiga o Iosefa e asiasi i Peteli; (o Lusa, o le igoa lea o le aai anamua.)

²⁴Ua iloa atu e na lamalama o le tasi tagata ua sau mai le aai, ona latou fai atu ai lea ia te ia, Ina e faasino mai ia te i matou le ala i le aai, ona matou agalelei atu ai lea ia te oe.

²⁵Ua faasino atu e ia ia te i latou le ala i le aai, ona latou fasia ai lea o le aai i le pelu; a ua latou tuu atu le tagata ma lona aiga uma e o.

²⁶Ua alu atu foi le tagata i le nuu o sa Hetī, ona faia lea e ia le aai, ma na faaigoa atu ai o Lusa; o lona igoa lea ua oo mai i ona po nei.

²⁷E lei maua foi e Manase o Peteseana atoa ma ona faoa aai, o Tanaka foi atoa ma ona faoa aai, ma e nonofo i Toro atoa ma ona faoa aai, o e nonofo foi i Ipelamo atoa ma ona faoa aai, o e nonofo foi i Mekito atoa ma ona faoa aai; a ua finau sa Kananā e nonofo i lea nuu.

²⁸Ua oo ina malosi o Isaraelu, ona totogi atu ai lea o taulaga i sa Kananā, a e lei matuā tulia i latou.

²⁹E lei tulia foi e Efaraima sa Kananā o e nonofo i Kasera; a ua nonofo sa Kananā faatasi ma i latou i Kasera.

³⁰E lei tulia foi e Sepulona o e nonofo i Kiterona, o e nonofo foi i Naalolo; a ua nonofo sa Kananā faatasi ma i latou, ma latou fai taulaga mai.

³¹E lei tulia foi e Asera o e nonofo i Ako, o e nonofo foi i Saitonu, ma e o i Ailava, ma e o i Akasepa, ma e o i Helipa, ma e o i Afeka, ma e o i Reopa.

³²A ua nonofo sa Aserā faatasi ma sa Kananā o e nonofo i le nuu; auā ua latou le tulia i latou.

³³E lei tulia foi e Nafatali o e nonofo i Petesemesa, ma e nonofo i Peteanata; a ua latou nonofo faatasi ma sa Kananā e ua nonofo i le nuu; a o e nonofo i Petesemesa ma Peteanata, ua fai taulaga mai ia te i latou.

³⁴O sa Amorī ua latou tetee atu i le fanauga a Tanu ia nonofo i le mauga; auā na latou le mafafai ona ia o ifo o i latou i le vanu.

³⁵A ua finau sa Amorī e nonofo i le mauga o Heresa i Ailona ma Salapima; a ua lima malosi le aiga o Iosefa, ona latou fai taulaga mai ai lea.

³⁶O le tuaoi foi o sa Amorī, e pau mai i le aega o Akarava i Sela, ma ona tala atu i luga.