Read Samoan Old Version Bible – O LE TUSI PAIA FAAMASINO, 15 Bible Online

FAAMASINO, 15 - Samoan Old Version Bible – O LE TUSI PAIA bible

FAAMASINO, 15

¹Ua mavae nisi aso i ona po o le seleselegāsaito, ona asiasi atu lea o Samasoni i lana avā, ua ave ai se tamai ‘oti; ua fai ane, ou te alu atu i la‘u avā i le afeafe; a e le mafai lona tamā ina ia ulu atu ai o ia.

²Ua fai mai lona tamā, Fā‘i ua e ‘ino‘ino lava ia te ia, ona ou avatu lea o ia i lau uo; e le ua sili ea ona lalelei lona uso itiiti ia te ia? Ia fai lea mona sui ia te oe.

³A ua fai atu Samasoni ia te i latou, Ou te le sala a‘u i lenei mea ia Filisitia, pe a a‘u faia se mea e tiga ai i latou.

⁴Ona alu lea o Samasoni, ua ia puea alope e tolu selau; ua ia ave foi sulu, ma na liliu le tasi iu i le tasi iu, ua tuu foi le sulu e tasi i le va o iu e lua i totonugalemu.

⁵Ona tugia lea e ia o sulu i le afi, ma tuu atu ai i saito o tu a Filisitia; ona mu lea o faaputugāsaito atoa ma saito o tu, o tovine atoa ma olive.

⁶Ona fai ane lea o Filisitia, O ai ea ua faia lenei mea? Ua latou fai atu ai, O Samasoni le tane a le afafine o le Timenata, ina ua na fao lana avā, ma avatu ai i lana uo. Ona o ae lea o Filisitia, ma latou susunuina o ia ma lona tamā i le afi.

⁷Ua fai atu Samasoni ia te i latou, E ui lava ina outou faia o lea mea, a e ou te taui atu ia te outou, e mulimuli ane ona ou mapu lea.

⁸Ona fasia lea o i latou e ia o vae ma ogavae, o le fasi tele; ona alu ifo lea o ia, ua nofo i le va i papa o Etama.

⁹Ona o ae lea o Filisitia, ua to lauapi i Iuta, sa faasalalau i latou i Le‘i.

¹⁰Ua fai atu tagata o Iuta, O le a le mea ua outou o mai ai e tau ma i matou? Ua fai mai i latou, Matou te o mai e fusifusi ia Samasoni, e fai ia te ia e pei ona faia e ia ia i matou.

¹¹Ona o ifo lea o tagata o Iuta e tolu gaafe i le va i papa o Etama, ua latou fai mai ia Samasoni, E te lei iloa ea ua pule lava Filisitia ia i tatou? O le a lenei mea ua e faia ia te i matou? Ua fai atu o ia ia te i latou, E faapei ona latou faia ia te au, ua faapei ona ou faia ia te i latou.

¹²Ua latou fai mai ia te ia, Ua matou ifoifo mai nei e fusifusi ia te oe, ma tuuu atu ia te oe i lima o Filisitia. Ona fai atu lea o Samasoni ia i latou, Ina outou tauto mai ia te au, tou te le fasia a‘u e outou.

¹³Ua latou fai mai ia te ia, o loo faapea, E leai; a e matou te fusifusia lava oe, ma tuu atu ia te oe i o latou lima, a e matou te le fasia lava oe. Ona latou fusifusia lea o ia i maea fou e lua, ua latou avae ia te ia ai le papa.

¹⁴Ua oo o ia i Le‘i, ona alalaga fiafia lea o Filisitia ona o ia. Ona osofia lea o ia e le Agaga o Ieova, ua avea maea sa i ona lima e pei se manoa lino ua mu i le afi, ua matala noanoaga i ona lima.

¹⁵Ona maua lea e ia o le ivi auvae fou o le asini, na ia tuu atu lona lima, ma tago i ai, ma fasi a‘i tagata e afe.

¹⁶Ona fai ane lea o Samasoni, O le ivi auvae o le asini, o le faupuega, e lua faupuega; o le ivi auvae o le asini ua ou fasi a‘i tagata e afe.

¹⁷Ua oo ina uma lana upu, ona ia lafoai lea o le ivi auvae nai lona lima; ua ia faaigoa ai lea mea o Ramale‘i.

¹⁸Ona matuā fia inu lea o ia; ua ia valaau ia Ieova, ua faapea atu, Ua e foai mai i lau auauna lenei olataga tele a o le a a‘u oti i le fia inu, ona maua lea o a‘u e le au le peritomeina.

¹⁹Ona māvae lea i le Atua se mea magoto sa i Le‘i, ona alu atu ai lea o le vai, ua inu ai o ia, ona foi atu lea o lona agaga, ua ola lava ia; o le mea lea ua ia faaigoa ai lea mea o Eniakori, o loo i Le‘i, ua oo mai i lenei lava aso.

²⁰Ua ia faamasino ia Isaraelu i ona po na malo ai Filisitia, o tausaga e luafulu.