Read Samoan Old Version Bible – O LE TUSI PAIA FAAMASINO, 19 Bible Online

FAAMASINO, 19 - Samoan Old Version Bible – O LE TUSI PAIA bible

FAAMASINO, 19

¹O ia ona aso sa leai se tupu ia Isaraelu, ua āumau le tagata sa Levī i le itu o le mauga o Efaraima; sa fai avā o ia, o le palake foi, mai Peteleema o Iuta.

²Ua mulilua lana palake, ua alu ese ia te ia i le aiga o lona tamā i Peteleema o Iuta, sa i ai i masina e fa.

³Ona tulai lea o lana tane, ua alu atu ia te ia e tautala lelei ma ia, ma toe aumaia o ia; sa ia te ia lana auauna ma asini e lua. Ona aumaia lea o ia e le fafine i le fale o lona tamā; ua vaai mai le tamā o le teine, ona fiafia lea ina ua feiloai ma ia.

⁴Ona taofia lea o ia e le tamā o lana avā, o le tamā o le teine, ua la nonofo ma ia i aso e tolu; ua latou aai ma inu, ma latou momoe ai.

⁵Ona oo lea i le aso fa, ua vave ala lava ia i le taeao, ua tulai a alu. Ona fai mai lea o le tamā o le teine i le tane o lona afafine, Ia e faamalosi lou loto i sina mea e ‘ai, ona lua o ai lea.

⁶Ona la nonofo ai lea, ua aai ma inu faatasi i laua, auā na fai atu le tamā o le teine i le tagata, Ia e loto mai ona tatou momoe, ma e faafiafia lou loto.

⁷Ona tulai lea o le tagata e alu; ona pulunaunau lea ia te ia o le tamā o lana avā, ona nofo ai lea, ua toe moe ai.

⁸Ona vave ala lea o ia i le taeao o le aso lima, o le a alu; ona fai mai lea le tamā o le teine, Ia e faamalosi lou loto; ona faatuatuai lea o i laua, ua oo i le faliu o le la; sa la aai faatasi.

⁹Ona tulai lea o le tagata, a latou o ma lana palake ma lana auauna; ua fai mai ia te ia le tamā o lana avā, ole tamā o le teine. Faauta ea, o le a po lenei aso, o le a afiafi, se‘i tatou momoe; faauta, ua tāli po, ina moe ia iinei, ma faafiafia lou loto, a e usuusu outou taeao i la outou malaga, ma e alu i lou aiga.

¹⁰E le mafai le tagata ona latou momoe, ua tulai ma savali; ona oo atu lava lea e feagai ma Iepuse, (o Ierusalema foi lea;) sa ia te ia asini e lua ua faanofoaina, ua ia te ia foi lana palake.

¹¹Ua latalata i latou i Iepuse, ua matuā maulalo ifo le la; ona fai mai lea o le auauna i lona alii, Se‘i tatou o, ma tatou afe ane i lenei aai o Iepuse, ma tatou momoe ai.

¹²A ua fai atu lona alii ia te ia, Aua tatou te afe i le aai o tagata ese, e le o le fanauga a Isaraelu i latou, a e tatou o atu ia i Kipea.

¹³Ua fai atu foi i lana auauna, Sau ia, ina tatou faalatalata atu i so ia nuu, ma tatou momoe i Kipea, po o Rama.

¹⁴Ona latou o loa lea, ua savavali; ua goto le la a o latalata i latou i Kipea o Peniamina.

¹⁵Ona latou afe atu ai lea, ma ulu atu e momoe i Kipea; ua oo i ai, ona latou nonofo lea i le malae o le aai, a ua leai se tagata na talia i latou i lona fale e momoe ai.

¹⁶Faauta, o le toeaina ua sau mai lana galuega i le vao i le afiafi, o ia foi le tagata mai le mauga o Efaraima, sa āumau o ia i Kipea; a o tagata o le nuu o sa Peniaminā i latou.

¹⁷Ua tepa ae o ia, ua na iloa le malaga i le malae o le aai. Ona fai mai lea o le toeaina, Po o fea e te alu i ai? Mai fea foi na e sau ai?

¹⁸Ua tali atu o ia ia te ia, Na matou o mai i Peteleema o Iuta, o le a o atu i le itu o le mauga o Efaraima, na ou sau ai i lea mea, na ou alu i Peteleema o Iuta, a ou te alu nei i le fale o Ieova, ua le talia a‘u e se tasi i lona fale;

¹⁹a o i ai lava ‘au o saito ma mea e ‘ai a matou asini, atoa ma mea e ‘ai ma uaina ma‘u, ma lau auauna fafine, ma le taulealea o loo i lau auauna, e leai lava se mativa i se mea e tasi.

²⁰Ua fai mai le toeaina, Ia manuia oe, tuu mai pea, faitalia a‘u i mea uma e te mativa ai, tau lava ina ne‘i e moe i le malae.

²¹Ona ia avatu lea o i latou i lona fale, ua fafaga i asini; ua latou mulumulu i o latou vae, ma latou aai ma inu.

²²Sa faafiafia e i latou o latou loto, faauta o tagata o le nuu, o tagata ulavavale, ua latou siomia le fale o loo patu‘i i le puipui; ua latou fai mai i le tagata e ona le fale, o le toeaina lea, o loo faapea mai, Tuu mai ia le tagata na alu atu i lou fale, ina ia matou iloa o ia.

²³Ona alu atu lea ia te i latou o le tagata e ona le fale, ua fai atu ia te i latou, Aua, o‘u uso e, aua lava ne‘i outou agaleaga, ina ua ulu mai lenei tagata i lo‘u fale, aua tou te faia lenei mea leaga;

²⁴faauta, o lo‘u afafine o le taupou, atoa ma lana palake, se‘i ou aumaia i laua, tou te faaleaga ia i laua, ma ia faia e outou mea tou te loto i ai ia i laua; a o lenei tagata, aua tou te faia lena mea leaga ia te ia.

²⁵A e le mafafai tagata ona faalogo ia te ia, ona pue atu lea e le tagata i lana palake, ua na tuu atu ai o ia ia te i latou i fafo; ua latou iloa o ia, ma latou faaleaga ia te ia ua atoa lava le po; ua oo i le taeao, ona latou tuu atu lea ia te ia e alu ina a malama ae le taeao.

²⁶Onā sau ai lea o le fafine i le vave ao, ua paū i le faitotoa o le fale o le tagata sa i ai lona alii, ua oo i le malama aee ae o le taeao.

²⁷Ua tulai lona alii i le taeao, ma tatala puipui o le fale, ua ulufafo atu o le a alu lana malaga; faauta i le fafine, o lana palake, ua paū i le faitotoa o le fale, ma ona lima ua i le faitotoa.

²⁸Ona fai mai lea o ia ia te ia, Tulai ia, ina tatou o; a e leai se tali; ona tago ai lea o ia ia te ia, ma faaee i le asini, ua tulai le tagata, ua alu i lona nuu.

²⁹Ona oo lea o ia i lona fale, ua tago i le polo, ona ‘u‘u atu lea i lana palake, ua pena ia te ia atoa ma ona ivi i tufaaga e sefulu ma le lua, ona avatu ai lea i itu uma o Isaraelu.

³⁰O i latou uma e na vaai i ai ua faapea ane i latou, E lei faia, e lei iloa foi se mea faapena talu le aso na o mai ai le fanauga a Isaraelu mai le nuu o Aikupito e oo i lenei aso; ia outou manatunatu i lenei mea, ia outou filifili, ma fai mai so outou loto.