Read Samoan Old Version Bible – O LE TUSI PAIA FAAMASINO, 2 Bible Online

FAAMASINO, 2 - Samoan Old Version Bible – O LE TUSI PAIA bible

FAAMASINO, 2

¹Ua alu ae le agelu a Ieova mai Kilikala i Pokima, ua faapea atu, Na ou aveina ae outou mai Aikupito, na ou faaooina foi outou i le nuu na ou tauto ai i o outou tamā; na ou faapea ane foi, Ou te le tuumavaega lava i la‘u feagaiga ma outou e faavavau.

²O outou foi, aua ne‘i outou fai se feagaiga ma e o nonofo i lenei nuu; ia outou sofaia o latou fata faitaulaga a ua outou le faalogo i la‘u upu; se a le mea ua outou fai ai lenei mea?

³O le mea lea na ou fai atu ai, Ou te le tulia i latou i o outou luma; a e avea i latou ma sasa i o outou itu, e avea foi o latou atua ma mailei ia te outou.

⁴Ua fai atu le agelu a Ieova i nei upu i le fanauga a Isaraelu uma, ona matuā taufaitagi ai lea o le nuu.

⁵Ua latou faaigoa lea mea o Pokima; ona latou fai taulaga lea ia Ieova i lea mea.

⁶Sa tuu atu e Iosua le nuu e o, ona o ai lea o le fanauga a Isaraelu e taitasi i lona tofi, e fai mo latou le nuu.

⁷Sa auauna le nuu ia Ieova i aso uma o Iosua, ma aso uma o toeaina e na ola mai a ua mavae Iosua, o e na iloa galuega tetele uma a Ieova na ia faia mo Isaraelu.

⁸Ua oti Iosua le atalii o Nuno, le auauna a Ieova; ua tasi le selau ma le sefulu o tausaga o lona ola.

⁹Ua latou tanu foi ia te ia i le fanua o lona tofi i Timenata-heresa i le mauga o Efaraima, i le itu i matu o le mauga o Kaasa.

¹⁰Ua faaopoopoina atu foi o lea tupulaga uma i o latou tamā; ua mavae i latou, ona tupu ai lea o le tasi tupulaga o e na le iloa Ieova ma ana galuega na ia faia mo Isaraelu.

¹¹Ona amio leaga lea o le fanauga a Isaraelu i luma o Ieova, ua latou auauna foi ia Paala.

¹²Ua latou tuua Ieova le Atua o latou tamā, o le na aumaia i latou mai le nuu o Aikupito, a ua latou mulimuli atu i atua ese, o atua o nuu ua vagavagai ia te i latou, ua latou ifo foi i ai, ma latou faaonoono ai ia Ieova.

¹³Ua latou tuua Ieova, ma auauna ia Paala ma Asaira.

¹⁴Ona tupu tele ai lea o le toasa o Ieova ia Isaraleu, ua ia tuuina atu i latou i lima o e vete mea, o e na vetea a latou mea; ua tuuina atu foi i latou i lima o e vagavagai mai ua ita ia te i latou; ua latou le toe mafai ai ona tutū atu i luma o e ua ita ia te i latou.

¹⁵O mea uma foi na latou o i ai, sa i ai le aao o Ieova ia leaga ai i latou, e pei ona fetalai mai ai o Ieova, e pei ona tauto foi o Ieova ia te i latou; na puapuagateleina ai i latou.

¹⁶A ua faatuina e Ieova o faamasino, ua latou faaola ia te i latou ai lima o e vetea a latou mea.

¹⁷A e lei faalogo i latou i o latou faamasino, a ua mulimuli atu i atua ese e mulilulua ai, ua latou ifo foi i ai; ua vave ona latou o ese i le ala na savavali ai o latou tamā, ē sa anaana i poloaiga a Ieova; ua le faapea ona latou faia.

¹⁸Ua faatuina e Ieova o faamasino mo i latou, ona i ai lea o Ieova ma le faamasino, ma ua faaolaina i latou ai lima o e ua ita ia te i latou i aso uma o le faamasino; auā ua salamo Ieova i o latou feoi, ona o e ua faasaua ma faatiga ia te i latou.

¹⁹A ua oo ina oti o le faamasino, ona latou liliu ai lea, ua sili foi lo latou leaga i o latou tamā, ina ua latou mulimuli atu i atua ese e auauna i ai, ma ifo i ai. Ua latou le tuua a latou amio ma lo latou faalogogatā.

²⁰O le mea lea ua tupu tele ai le toasa o Ieova ia Isaraelu, ua fetalai mai foi o ia, Ua tuumavaega lenei nuu i la‘u feagaiga na ou poloai atu ai i o latou tamā, e lei faalogo foi i latou i la‘u upu.

²¹O le mea lea ou te le toe tulia ai ai ia te i latou so ia nuu na tuua e Iosua ina ua oti o ia.

²²Ina ia tofotofoina o Isaraelu e i latou, pe latou te tausiusi i le ala o Ieova e savavali ai, pei ona tausiusi ai e o latou tamā, pe leai.

²³O le mea lea na tuuina atu ai e Ieova o ia nuu, ua le vave tulia i latou; e lei tuuina atu foi e ia i latou i le lima o Iosua.