Read Samoan Old Version Bible – O LE TUSI PAIA FAAMASINO, 3 Bible Online

FAAMASINO, 3 - Samoan Old Version Bible – O LE TUSI PAIA bible

FAAMASINO, 3

¹O nuu foi ia na tuua e Ieova e tofotofoina e i latou o Isaraelu, o i latou uma e na le iloa taua uma o Kanana.

²Tau ina ia iloa e tupulaga o le fanauga a Isaraelu e a‘oa‘o ia te i latou i le taua, o i latou foi lava na le iloa anamua;

³o alii e toalima o Filisitia, ma sa Kananā uma, ma sa Saitonū, ma sa Hevī o e nonofo i le mauga o Lepanona, e pau atu i le mauga o Paala-heremone e oo i le ala o Amato.

⁴Na i ai i latou ina ia tofotofoina Isaraelu e i latou, ina ia iloa pe latou te faalogo i poloaiga a Ieova na ia poloai atu ai i o latou tamā na oo mai ia Mose.

⁵Ua nonofo le fanauga a Isaraelu faatasi ma sa Kananā, o sa Hetī, ma sa Amorī, ma sa Perisē, ma sa Hevī, ma sa Iepusē.

⁶Ona latou fai avā lea i o latou afafine; ua latou avatu foi o latou afafine i o latou atalii, ma latou auauna atu i o latou atua.

⁷Ua amio leaga le fanauga a Isaraelu i luma o Ieova; ua latou faagalogalo foi ia Ieova lo latou Atua, a ua latou auauna atu ia Paala ma Asaira.

⁸O le mea lea na tupu tele ai le toasa o Ieova ia Isaraelu, na ia tuuina atu i latou i le lima o Kusa-risatima, o le tupu lea o Mesopotamia; ona auauna lea o le fanauga a Isaraelu ia Kusa-risatima i tausaga e valu.

⁹Ua alalaga atu le fanauga a Isaraelu ia Ieova, ona faatuina ai lea e Ieova o le faaola mo le fanauga a Isaraelu, na ia faaolaina i latou, o Otinielu lea, o le atalii o Kinasa, o le uso itiiti o Kalepo.

¹⁰Ua oo ia te ia le Agaga o Ieova, ona faamasino lea e ia o Isaraelu; ua alu atu foi o ia i le taua, ona tuuina mai lea e Ieova i lona lima o Kusa-risatima le tupu o Mesopotamia; ua manumalo foi o ia ia Kusa-risatima.

¹¹Ona filemu ai lea o le nuu i tausaga e fagafulu. Ona oti lea o Otinielu le atalii o Kinasa.

¹²Ua toe amio leaga le fanauga a Isaraelu i luma o Ieova, ona faamalosi ai lea e Ieova ia Ekelona le tupu o Moapi e tau ma Isaraelu, ina ua latou amio leaga i luma o Ieova.

¹³Ua ia faapotopoto ane ia te ia le fanauga a Amoni ma Amaleka; ona alu atu lea o ia, mana fasia Isaraelu, ua latou maua foi le aai o pama.

¹⁴Ona auauna ai lea o le fanauga a Isaraelu ia Ekelona le tupu o Moapi i tausaga e sefulu ma le valu.

¹⁵A ua alalaga atu le fanauga a Isaraelu ia Ieova, ona faatuina ai lea e Ieova o le faaola mo i latou, o Euta lea le atalii o Kira o le sa Peniaminā, o le tagata tauagavale ia; ua auina o ia e le fanauga a Isaraelu e momoli le taulaga ia Ekelona le tupu o Moapi.

¹⁶Ua gaosia e Euta māna se pelu e faataumaai itu o lona umi o le kupita e tasi; ua ia fusia ai foi i lalo i ona ofu i lona vae taumatau.

¹⁷Ua ia avatua le taulaga ia Ekelona le tupu o Moapi; o le tagata ua matuā puta lava Ekelona.

¹⁸Ua uma ona avatua le taulaga, ona aauina atu ai lea e ia o le nuu na au mai le taulaga,

¹⁹a ua foi mai o ia i le mea o i ai tupua ua ta ua i Kilikala. Ona fai atu ai lea o ia, Le tupu e, ua ia te au le feau faalilolilo ia te oe. Ona fai mai ai lea o ia, Ina fāalologo ia. Ona o uma atu ai lea nai ia te ia o e na tutū atu ia te ia.

²⁰Ua alu atu foi Euta ia te ia, sa nofo o ia i lona afeafe faasavili, e gata ia te ia lava; ona fai atu ai lea o Euta, Ua ia te au le feau mai le Atua ia te oe; ona tulai ai lea o ia nai le nofoa.

²¹Ua tuu ane e Euta lona lima tauagavale, ma tago i le pelu na i lona vae taumatau, ona tutu‘i atu ai lea e ia i lona manava.

²²Ua gālo atoa ma le ‘au o le pelu, ua lilo foi le pelu i le tino ua puta, ua ia le ma toso ai le pelu nai lona manava, ua ati loa i nofoaga.

²³Ua alu atu Euta i le faapaologa, ua ia pupuni foi i ona tua o puipui o le afeafe, ma faamau ai.

²⁴Ua alu atu o ia, ona o mai ai lea o ana auauna; ua latou iloa atu, faauta, ua faamauina o puipui o le afeafe; ona latou fai ane ai lea, Ai lava o loo ufiufi e ia ona aao i le afeafe faasavili.

²⁵Ua latou faatali faatali ua mamā i latou; faauta foi, e lei tatalaina lava e ia o puipui o le afeafe; ona latou ave ai lea o se ki, ma tatala a‘i; faauta foi, ua paū i le eleele lo latou alii, ua oti.

²⁶Ua sola Euta a o faatali i latou, na tuana‘i atu e ia o tupua ua ta, ua sao atu foi i Seirata.

²⁷Ua oo atu ia, ona ili ai lea e ia o le pu i le mauga o Efaraima; ua o ifo foi ma ia o le fanauga a Isaraelu mai le mauga, na muamua o ia ia te i latou.

²⁸Ua ia fai atu foi ia te i latou, Ia outou mulimuli mai ia te au; auā ua tuuina mai e Ieova o outou fili o Moapi i o outou lima. Ua latou mulimuli ifo ia te ia, ona latou maua ai lea o asaga o Ioritana e ui atu ai i Moapi; ua le mafafai i latou ona ui atu ai o se tasi.

²⁹Na fasia e i latou o Moapi i lea aso pe sefulu ni afe o tagata, ua malolosi ma totoa i latou uma lava, e leai foi se tasi na sao.

³⁰Ua toilalo Moapi i lea aso i le lima o Isaraelu. Ona filemu ai lea o le nuu i tausaga e valugafulu.

³¹Ua mavae o ia, ona nofo mai lea o Samekara o le atalii o Anato, na fasia e ia o Filisitia e toaono selau i le tui povi; o ia foi na ia faaolaina Isaraelu.