Read Samoan Old Version Bible – O LE TUSI PAIA FAAMASINO, 4 Bible Online

FAAMASINO, 4 - Samoan Old Version Bible – O LE TUSI PAIA bible

FAAMASINO, 4

¹Ua oti Euta; ona toe amio leaga ai lea o le fanauga a Isaraelu i luma o Ieova.

²Ona tuuina atu ai lea o i latou e Ieova i le lima o Iapino le tupu o Kanana o le na pule i Hasora; a o le na pule i lana itu taua, o Sesera lea, sa nofo i Haroseta o nuu ese.

³Ona alalaga atu lea o le fanauga a Isaraelu ia Ieova; auā na ia te ia o kariota uamea e iva selau; na ia matuā faasaua i le fanauga a Isaraelu i tausaga e luafulu.

⁴O ona po ia na faamasinoina ai Isaraelu e Tepora, o le perofeta fafine, o le avā lea a Lapitota.

⁵Sa nofo o ia i lalo o le pama o Tepora i le va o Rama ma Peteli, i le mauga o Efaraima; na o ae ai ia te ia le fanauga a Isaraelu ia faamasinoina.

⁶Ona aauina atu ai lea e ia nisi e aami ia Parako le atalii o Apinoamo mai Katesanafatali; ua ia fai atu foi ia te ia, E lei poloai mai ea Ieova le Atua o Isaraelu, e te alu ma e ta‘i ‘au i le mauga o Tapora, tou te o ma tagata e sefulu afe o le fanauga a Nafatali ma le fanauga a Sepulona?

⁷Ou te tosina atu foi Sesera lē pule i le itu taua a Iapino, ma ona kariota, atoa ma ana ‘au ia te oe i le alia o Kisona; ou te tuuina atu foi o ia i lou lima.

⁸Ona fai mai ai lea o Parako ia te ia, Afai ta te o ma a‘u, ona ou alu lea; a e afai ta te le o ma a‘u, ou te le alu.

⁹Ua fai atu o ia, Ta te o lava ma oe; a e peitai e leai sou viiga i lenei mea e te alu ai oe; auā e tuuina atu e Ieova o Sesera i le lima o le fafine. Ua tu i luga Tepora, ona la o ai lea ma Parako i Katesa.

¹⁰Ona faapotopoto ai lea e Parako o Sepulona ma Nafatali i Katesa; ua alu ae foi ia atoa ma le sefulu o afe o tagata ua mulimuli atu ia te ia; ua la o ae foi ma Tepora.

¹¹O Kaveru foi o le sa Kenī, o so le fanau a Opapo, o le tamā lea o le avā a Mose, na vavae mai o ia i sa Kenī, ua na to foi lona fale ie e latalata ane i le aluna i Saanaima, ua i Katesa lea.

¹²Ua latou faailoa foi ia Sesera, ua alu ae Parako le atalii o Apinoamo i le mauga o Tapora.

¹³Ona faapotopoto ai lea e Sesera o ona kariota uma, o kariota uamea e iva selau, atoa ma le nuu uma o e na ia te ia, mai Haroseta o nuu ese e ō i le alia o Kisona.

¹⁴Ona fai atu ai lea o Tepora ia Parako, Tulai ia, auā o le aso lenei e tuuina atu ai e Ieova o Sesera i lou lima; e lei afio atu ea o Ieova i ou luma? Ona alu ifo lea o Parako nai le mauga o Tapora, atoa ma le sefulu o afe o tagata ua mulimuli atu ia te ia.

¹⁵Ua faataapeapeina e Ieova o Sesera, ma ona kariota uma, ma lana itu taua uma i le pelu i luma o Parako; ona alu ifo ai lea o Sesera nai lona kariota, ma sola i ona vae.

¹⁶A ua tuliloa atu e Parako i kariota ma le itu taua, ua oo lava i Haroseta o nuu ese; ua oti le itu taua uma a Sesera i le pelu; e leai lava se tasi na toe.

¹⁷A o Sesera, ua sola o ia i ona vae i le fale ie o Iaeli le avā a Kaveru o le sa Kenī; auā ua nofo lelei Iapino le tupu o Hasora ma le aiga o Kaveru o le sa Kenī.

¹⁸Ona alu atu lea o Iaeli e faafetaiai ia Sesera, ua fai atu ia te ia, Le alii e, afe mai ia, ina afe mai ia te au, aua e te mata‘u. Ona afe ane ai lea o ia ia te ia i le fale ie, ona ufiufi ai lea e le fafine ia te ia i le ie afu.

¹⁹Ua fai mai foi o ia ia te ia, Se‘i e au mai sina vai ou te inu ai; auā ua ou fia inu lava. Ona tatala ai lea e ia o le fagu pa‘u o suāsusu, ua avatu ia te ia e inu ai; ona ufiufi ai lea ia te ia.

²⁰Ona fai mai lea o ia ia te ia, Ina tu ia oe i le faitotoa o le faleie; a sau se tasi e fesili ia te oe, ma faapea mai, O iina ea se isi? Ia e faapea atu, E leai lava.

²¹Ona tago ai lea o Iaeli le avā a Kaveru i se fao o le fale ie, ua ave foi ma le samala i lona lima, ona alu lemu atu lea ia te ia, ua ia tutu‘i ai le fao i lona manifinifi, ua ati ifo i le eleele, auā na moegase ina ua lailoa; ona oti ai lea o ia.

²²Faauta foi, ua tuliloa mai Parako ia Sesera, ona alu atu lea o Iaeli e faafetaiai ia te ia, ua fai atu o ia ia te ia, Ina maliu mai ia, ou te faaaliina atu ia te oe le tagata ua e sailia. Ona alu ane lea o ia ia te ia, faauta, ua taatia Sesera, na oti, ua i ai foi le fao i ona manifinifi.

²³O le aso lava lea na faatoilaloina ai e le Atua o Iapino le tupu o Kanana i luma o le fanauga a Isaraelu.

²⁴Ua manumalo pea lima o le fanauga a Isaraelu, ua mamafa lava ia Iapino le tupu o Kanana, ua oo lava ona latou faaumatia o Iapino le tupu o Kanana.