Read Samoan Old Version Bible – O LE TUSI PAIA FAAMASINO, 5 Bible Online

FAAMASINO, 5 - Samoan Old Version Bible – O LE TUSI PAIA bible

FAAMASINO, 5

¹Ona pepese ai lea o Tepora ma Parako le atalii o Apinoamo i lea lava aso, ua faapea atu,

²Auā o le ta‘ita‘iina o Isaraelu e alii ta‘i ‘au ma le ofo fua mai o le nuu, ia outou faamanu ia Ieova.

³Ina faafofoga mai ia outou tupu; alii e, ina liliu mai ia o outou fofoga; o a‘u, ou te pese lava a‘u ia Ieova, ou te fai pesega ia Ieova le Atua o Isaraelu.

⁴Ieova e, na e afio atu nai Seira, na e afio atu ai le laueleele o Etoma, ona luluina ai lea o le lalolagi, na tautulu ifo le lagi, o ao foi ua tautulu ifo ai le vai.

⁵Na tafe ifo mauga i luma o Ieova, o lea lava Sinai i luma o Ieova le Atua o Isaraelu.

⁶O ona po o Samekara le atalii o Anato; o ona po o Iaeli na gase ai ala tele, na ui atu ai malaga i ala ‘alo.

⁷Ua leai ni ta‘ita‘i ia Isaraelu; ua leai lava; ua oo i ona po na tulai atu ai a‘u o Tepora; na tulai atu ai a‘u, o le tinā i Isaraelu.

⁸Na latou filifilia atua fou; ona oo ai lea o le taua i faitotoa; na iloa ea se talita po o se tao i le fagafulu o afe o Isaraelu?

⁹Ua uai atu lo‘u loto i faipule o Isaraelu, o e na ofo fua i le nuu; ia outou faamanu atu ia Ieova.

¹⁰O outou e tietie i asini sisina, o outou e nonofo i ie lelei, o outou foi o e savavali i le ala; ia outou talatala i ai;

¹¹auā o le leo o e tufatufa vete i mea e utu ai vai, latou te ta‘u atu le amiotonu a Ieova i lea mea; o le amiotonu i ona ta‘ita‘i i Isaraelu; ona o ifo ai lea o le nuu o Ieova i faitotoa.

¹²Ala mai, ala mai ia, Tepora e; ala mai, ala mai ia; ia e pese i le vii. Tulai mai ia, Parako e, o oe na le atalii o Apinoamo, ia e ta‘ita‘i i le tafeaga ou tagata o taua.

¹³Ona ou faapea ai lea, Ina o ifo ia e ua totoe i alii o le nuu; Ieova e, ina e afio ifo ia te au e tau ma e ua malolosi.

¹⁴Mai Efaraima o e mau i Amaleka; e mulimuli atu ia te oe o Peniamina faatasi ma lou nuu; mai Makira na o ifo ai faipule; mai Sepulona foi o e ua ‘u‘u le tootoo o le avea ‘au.

¹⁵O alii o Isakara sa ia Tepora; o Isakara e pei o Parako lava ia, na auina i le vanu e mulimuli atu ia te ia; o i vaitafe o Reupena sa tele ai filifiliga o le loto.

¹⁶Se a le mea na e nofo ai i lotoā mamoe, e faalogologo ai i le leo o le fagufagu a le au leoleo mamoe? O i vaitafe o Reupena sa tele ai filifiliga o le loto.

¹⁷Na nofo foi Kiliata i le la itu o Ioritana. Se a foi le mea na nofo ai Tanu i vaa? Na nofo foi Asera i le afaga, ua nofo lava i ona faga.

¹⁸O Sepulona, o le nuu lea na tuulafoaiina lona ola ia oti; e faapea foi Nafatali i mea maualuluga o le nuu.

¹⁹Ua o mai tupu, ua latou tau; ona tau ai lea o le taua e tupu o Kanana i Tanaka, e latalata ane i le vai i Mekito; latou te lei maua lava ni oloa ario.

²⁰Na latou tau mai le lagi; ua tau lava ma Sesera o fetu i o latou ala.

²¹Na tafea i latou i le alia o Kisona; o le alia lea o le vavau, o le alia o Kisona. Lo‘u agaga e, ua e solia lē ua malosi.

²²Ona nuti ai lea o atigivae o solofanua, ona o taufetuliga, o taufetuliga lava o ana ‘au malosi.

²³Ua fai mai le agelu a Ieova, Ia outou faafano ia Merosa, ia outou matuā faafano lava i e o nonofo ai; auā na latou le o mai e fesoasoani ia Ieova; e fesoasoani ia Ieova, e tau ma e ua malolosi.

²⁴E sili le manuia o Iaeli i fafine uma, o le avā lea a Kaveru o le sa Kenī; e sili lona manuia i fafine uma o i fale ie.

²⁵Na ole mai o ia i se vai, ona avatu ai lea e ia o le suāsusu; na ia avane le suāsusu to‘a i le ipu tāua.

²⁶Na tago atu lona lima i le fao, ma lona lima taumatau i le samala a le tufuga; ona ta lea e ia ia Sesera, ua momomo ai lona ulu; na ia tu‘i ua ati i ona manifinifi.

²⁷Ua punou, ua paū, ua taoto i ona vae; ua punou, ua paū i ona vae; o le mea na punou ai o ia, na paū ma oti ai lava.

²⁸Na vaavaai atu i le faamalama le tinā o Sesera, na ia alaga atu i le mea faamatāupega o le faamalama, Se a le mea ua tuai mai ai lona kariota? Se a le mea ua tuai ai ona oo mai o ona kariota?

²⁹Ona tali mai ai lea ia te ia o tamaitai popoto ua ia te ia, o ia lava ua toe fai atu o ia ia te ia,

³⁰Latou te lei maua ea? Latou te lei tufatufaina ea o vete? E taitoatasi ma se teine e toatasi pe toalua; o le vete o ofu lanu eseese a Sesera, o le vete o ofu lanu eseese ua matagofie; o le ofu lanu eseese ua faamatagofie i itu e lua, mo ua o e ua iai vete.

³¹Ieova e, ia faapea ona fanoia atoa uma o e ita ia te oe; a o e ua alolofa atu ia te ia, ia pei o le la i latou ina o mu toto‘a. Ona filemu lea o le nuu i tausaga e fagafulu.