Read Samoan Old Version Bible – O LE TUSI PAIA FAAMASINO, 6 Bible Online

FAAMASINO, 6 - Samoan Old Version Bible – O LE TUSI PAIA bible

FAAMASINO, 6

¹Ona fai ai lea e le fanauga a Isaraelu le amio leaga i luma o Ieova; ona tuuina atu ai lea o i latou e Ieova i lima o Mitiana i tausaga e fitu.

²Ua manumalo Mitiana ia Isaraelu; ona fai ai lea e le fanauga a Isaraelu mo i latou o lua o i mauga, o ana foi, ma ‘olo, ona o Mitiana.

³A totō mea e Isaraelu ona o ae ai lea o Mitiana, ma Amaleka, atoa ma tagata mai sasae, ua latou o ae lava e tau ma i latou.

⁴Ua latou to lauapi e tau ma i latou, ona latou faataumaoi ai lea o mea na tutupu i le laueleele, e oo atu lava i Kasa; latou te lei tuuna lava sina mea e ‘ai mā Isaraelu, po o se mamoe, po o se povi, po o se asini.

⁵Auā na latou o ae ma a latou manu ma o latou fale ie, ua latou o ae lava e pei o sē ina taa tele; e le mafaitaulia lava i latou ma a latou kamela; na latou oo atu foi i le nuu e faataumaoi ai.

⁶Ona matuā matitiva ai lea o Isaraelu ona o Mitiana; ona alalaga ai lea o le fanauga a Isaraelu ia Ieova.

⁷Ua alalaga atu ia Ieova le fanauga a Isaraelu ona o Mitiana,

⁸ona auina mai ai lea e Ieova o le perofeta i le fanauga a Isaraelu, ua faapea mai o ia ia te i latou, Ua faapea ona fetalai mai o Ieova le Atua o Isaraelu, O a‘u na ou aveina ae outou nai Aikupito, ma au aumaia outou nai le mea sa nofo pologa ai;

⁹na ou laveaiina outou nai le lima o Aikupito, ai lima lava o i latou uma e na faasaua ia te outou, ma ou tulia i latou i o outou luma; na ou avatu foi lo latou laueleele mo outou.

¹⁰Na ou faapea atu foi ia te outou, O a‘u o Ieova lo outou Atua; aua tou te matatau i atua o sa Amorī, e o latou le nuu ua outou nonofo ai; a ua outou le anaana i la‘u upu.

¹¹Ona alu atu ai lea o le agelu a Ieova, ua nofo i lalo o le tapeneto sa i Ofira, na ia Ioasa le sa Apieserū; o Kitiona lona atalii ua ia sasa saito i le mea e soli ai vine, ina ia lilo ai ia Mitiana.

¹²Ua faaali mai ia te ia le agelu a Ieova, ua faapea mai ia te ia, Oe na le toa malosi, o ia te oe Ieova.

¹³Ona fai atu ai lea o Kitiona ia te ia, E! le Alii e, afai ua ia te i matou Ieova, se a le mea ua oo mai ai ia mea uma ia te i matou; o ifea ona vavega uma, na ta‘u mai ai e o matou tamā ia te i matou, ua faapea mai, E lei aveina ae ea o i tatou e Ieova ai Aikupito? A o ona po nei ua lafoaiina ai i matou e Ieova, ua ia tuuina mai foi i matou i lima o Mitiana.

¹⁴Ona silasila mai ai lea o Ieova ia te ia, ua faapea mai, Alu ia oe i lenei lou malosi, e te laveaiina Isaraelu ai le lima o Mitiana; ou te lei auina atu ea oe?

¹⁵Ona faapea atu ai lea o ia ia te ia, E! Le Alii e, ou te laveaiina Isaraelu i ni a? Faauta mai, ua topito ona faatauvaa lo‘u aiga i Manase; o a‘u foi, o le aupito itiiti i le aiga o lo‘u tama.

¹⁶Ona faapea mai ai lea o Ieova ia te ia, Auā ta te faatasi lava ma oe; e te fasia foi Mitiana, e peiseai o se tagata e toatasi.

¹⁷Ona fai atu ai lea o ia ia te ia, Afai ua e alofa mai ia te au, ia e faia se faailoga mo a‘u e iloa ai o oe lava ua ta tautalatala ma a‘u.

¹⁸Ou te faatoga atu, aua ne‘i e maliu ese iinei, seia a‘u sau ia te oe, ma ou au mai la‘u taulaga, ma ou tuuina atu i ou luma. Ona faapea mai ai lea o ia, Ou te nofo lava seia e foi mai.

¹⁹Ua alu atu Kitiona, ua ia saunia le tamai ‘oti, ma areto e le faafefeteina na faia i le efa o falaoa; ua tuu e ia tufaaga i le ato, ua ia tuu foi le sua i le pani, ona avatu lea ia te ia i lalo o le tapeneto, ma tuu atu ai.

²⁰Ua fai mai le agelu a le Atua ia te ia, Ina tago ia i tufaaga, ma areto e le faafefeteina, ma e tuu atu i luga o lenei papa, ia liligi atu ai foi le sua. Ona faapea ai lea o ia ona fai.

²¹Ona faaloaloa atu lea e le agelu a Ieova le pito tootoo na i lona lima, ua pai atu i tufaaga ma areto e le faafefeteina; ona alu ae ai lea o le afi nai le papa, ua susunuina ai tufaaga ma areto e le faafefeteina. Ona alu ai lea o le agelu a Ieova na ia te ia.

²²Ua iloa e Kitiona o le agelu a Ieova lava o ia, ona faapea ane ai lea o Kitiona, Aue, le Alii e, Ieova, auā ua ou iloa le agelu a Ieova, ua ma fesagai lava.

²³Ona fetalai mai ai lea o Ieova ia te ia, Ina filemu ia oe, aua e te mata‘u, e te le oti.

²⁴Ona faia ai lea e Kitiona i lea mea o le fata faitaulaga ia Ieova, ua faaigoa i ai o Ieova-saloma; ua i ai i Ofira o sa Apieserū ua oo i ona po nei.

²⁵Ua fetalai mai Ieova ia te ia i lea lava po, Ina ave ia le povi poa taanoa a lou tamā, ma lona lua o povi poa, e fitu ona tausaga, ma ia e sōloi i lalo le fata faitaulaga o Paala, o i lou tamā; ia vavae foi i lalo le tupua o Asaira ua latalata ane i ai;

²⁶a ia e faia se fata e fai ai taulaga ia Ieova lou Atua i luga o lenei ‘olo, ma le fafie ua faaafu; e te ave foi lona lua o povi poa, e te fai ai se taulaga mu i le laau o le tupua o Asaria o le a e vavae i lalo.

²⁷Ona ave ai lea e Kitiona o tagata e toasefulu o ana auauna, ua faia lava e pei ona fetalai mai ai o Ieova ia te ia; ua faia e ia i le po, auā e le mafai ia te ia ona faia i le ao, ina ua mata‘u lava o ia i le aiga o lona tamā atoa ma tagata o le aai.

²⁸Ua ala i le taeao tagata o le aai, faauta ua sōloia i lalo le faia faitaulaga o Paala, ma le tupua o Asaira na latalata ane i ai ua vavaeina i lalo; ua fai foi le taulaga i le lua o povi poa i luga o le fata ua faia.

²⁹Ona latou faapea ane ai lea o le tasi i le tasi, Po o ai ea ua faia le mea nei? Ua fesilisili ma suesue i latou, ona fai ane ai lea o i latou, Na faia le mea nei e Kitiona le atalii o Ioasa.

³⁰Ona faapea atu ai lea o tagata o le aai ia Ioasa, Au mai ia lou atalii, ina ia oti o ia; auā ua ia sōloia le fata faitaulaga o Paala, auā foi ua ia vavaeina i lalo le tupua o Asaira na latalata ane i ai.

³¹Ona faapea mai ai lea o Ioasa ia te i latou uma na tutū mai ia te ia, O outou na, tou te finafinau ea mo Paala? Tou te fia laveaiina o ia? O le na te finau mo ia, ia oti lava ia i le taeao nei; afai o se atua ia, ina faia e ia lava lana finauga, auā ua sōloia e se tasi lona fata faitaulaga;

³²o lea lava aso na ia faaigoaina ai o ia, o Ierupaala, ua faapea atu, Ia la finau o Paala ma ia, auā ua ia sōloia lona fata faitaulaga.

³³Ona faapotopoto faatasi ai lea o Mitiana uma lava, ma Amaleka atoa ma tagata mai sasae, ua latou sopoia mai le vaitafe, ua latou to lauapi i le vanu o Isereelu.

³⁴A ua ufitia Kitiona e le Agaga o Ieova; ona ili ai lea e ia o le pu, ona faapotopotoina lea o Apieseru e mulimuli atu ia te ia.

³⁵Ua ia aauina atu sāvali ia Manase uma, ua faapotopotoina foi i latou e mulimuli atu ia te ia; ua ia aauina atu o sāvali ia Asera, ma Sepulona, ma Nafatali, ona latou o ae ai lea e faafetaiai ia te i latou.

³⁶Ua faapea atu Kitiona i le Atua, Afai e te faaolaina Isaraelu i lo‘u lima, e pei ona e fetalai mai ai, faauta mai, o a‘u,

³⁷ou te tuuina atu le fulufulu mamoe i le mea e sasa ai le saito; afai ua na o le fulufulu mamoe e i ai le sau, a e matutu le laueleele uma, ona ou iloa ai lea e te faaolaina Isaraelu i lo‘u nei lima, e pei ona e fetalai mai ai.

³⁸Ona faapea ai lava lea; ua ala usu atu ia i le taeao, ona tatao ai lea e ia o le fulufulu mamoe, ua ia tāulia foi le sau nai le fulufulu mamoe, ua tumu le ipu i le suāvai.

³⁹Ona fai atu lea o Kitiona i le Atua, Aua e te toatamai ia te au, ua na o le toe upu ou te fai atu ai nei; ou te aioi atu ia te oe, ia toe tasi ona ou tofotofo i le fulufulu mamoe; ia matutu na o le fulufulu mamoe, a o le lalueleele uma, ia i ai le sau.

⁴⁰Ua faapea lava ona faia e le Atua i lea lava po; auā ua matutu na o le fulufulu mamoe, a o le laueleele uma, sa i ai le sau.