Read Samoan Old Version Bible – O LE TUSI PAIA FAAMASINO, 8 Bible Online

FAAMASINO, 8 - Samoan Old Version Bible – O LE TUSI PAIA bible

FAAMASINO, 8

¹Ona faapea mai ai lea o tagata o Efaraima ia te ia, Se a lenei mea ua e faia ia te i matou, ina ua e le amia mai i matou ina ua e alu atu e tau ma Mitiana? Ua latou matuā finau tele mai ia te ia.

²Ona faapea atu ai lea o ia ia te i latou, Se a se mea ua ou faia nei e tusa ma la outou? E lei sili ona lelei ea nai toe fuifui vine o Efaraima i le taugāvine o Apieseru?

³Ua tuuina atu e le Atua i o outou lima o tamaalii o Mitiana, o Oreva ma Seeva; se a foi se mea ou te mafaia ona fai e tusa ma outou? Ona faalauleleiina ai lea o i latou ia te ia, ina ua fai atu e ia lena upu.

⁴Ua oo atu Kitiona i Ioritana, ua sopoia atu e ia atoa ma le tolu selau o tagata ua ia te ia, ua lailoa i latou, a e tuliloa lava.

⁵Ona fai atu ai lea o ia i tagata o Sukota, Ia outou avane ni potoi areto i le nuu ua mulimuli mai ia te au, auā ua lailoa i latou, a o a‘u, ou te tuliloa atu lava ia Seva ma Salemuna o tupu o Mitiana.

⁶Ona faapea mai ai lea o alii o Sukota, Po ua e maua nei ea o Seva ma Salemuna matou te avatu ai mea e ‘ai ma au ‘au.

⁷Ona faapea atu ai lea o Kitiona, A tuuina mai e Ieova o Seva ma Salemuna i lo‘u lima, ona ou solia ai lea o outou tino i laau tuitui mai le vao ma mea talatala.

⁸Ua alu ae ia nai lea mea i Penueli, ua faapea foi ona fai atu o ia ia te i latou. Ona tali mai ai lea ia te ia o tagata o Penueli, e pei ona tali mai e tagata o Sukota.

⁹Ona fai atu ai lea o ia i tagata o Penueli, ua faapea atu, Pe a a‘u foi mai ma le manuia, ona ou soloia lava lea o lena ‘olo.

¹⁰Sa i Karekori o Seva, ma Salemuna, atoa ma la la itu taua faatasi ma i laua, pe sefulu o afe ma afe e lima, na o i latou ia ua totoe o le itu taua uma a tagata mai sasae; auā na fasia tagata e fai pelu e selau afe ma afe e luafulu.

¹¹Ona alu ae ai lea o Kitiona i le ala o e ua mau i fale ie i sasae o Nopa ma Iakepea; ona faia ai lea e ia o le itu taua, auā sa nofo talanoa lava le itu taua.

¹²Ua sosola foi Seva ma Salemuna, ona tuliloa atu lea e ia ia te i laua, ua ia maua lava o tupu o Mitiana e toalua, o Seva ma Salemuna; ua ia faagateteina le itu taua uma.

¹³Ona foi mai lea o Kitiona le atalii o Ioasa mai le taua, ua ui ane i le aega o Heresa.

¹⁴Ona maua lea e ia o le tasi taulealea o tagata o Sukota, ua ia fesili ia te ia, ona tusi ai lea e ia ia te ia i alii o Sukota ma o latou toeaina, o tagata e toafitugafulu ma le toafitu.

¹⁵Ona alu atu ai lea o ia i tagata o Sukota, ua faapea atu ai, Faauta, o Seva ma Salemuna na outou tauemua mai ai au, ua faapea mai, Po ua e maua nei ea o Seva ma Salemuna, matou te avatu ai mea e ‘ai mā ou tagata ua lailoa.

¹⁶Ona ave ai lea e ia o toeaina o le aai, ma laau tuitui mai le vao ma mea talatala, ua ia aoaiina ai tagata Sukota.

¹⁷Ona soloia lea e ia o le ‘olo o Penueli, ma ua fasioti i tagata o le aai.

¹⁸Ona fai atu ai lea o ia ia Seva ma Salemuna, Pe ni tagata faapefea na outou fasiotia i Tapora? Ona la fai mai ai lea, E pei o oe sa faapea foi i latou; e taitasi ma aulelei e pei ni alo o se tupu.

¹⁹Ona fai atu ai lea o ia, O o‘u uso ia, o tama a lo‘u tinā i latou; o loo soifua Ieova, ana oulua faaolaina i latou po ua ou le fasiotia oulua.

²⁰Ona fai atu ai lea o ia ia Ietero lana ulumatua, Ina tulai mai ia, ma e fasiotia i laua. A ua le se‘i e le tama lana pelu ina ua fefe o ia, auā o le tama lava ia.

²¹Ona fai mai ai lea o Seva ma Salemuna, Ina e tulai mai ia oe, ma fasi ia te i maua; auā e pei o le tagata e faapea foi lona malosi. Ona tulai atu ai lea o Kitiona, ua ia fasiotia Seva ma Salemuna; ona ave ese ai lea e ia o mea na asoa ai i ua o a la kamela.

²²Ona fai atu ai lea o tagata o Isaraelu ia Kitiona, Ia e pule ia te i matou, o oe, ma lou atalii, ma le atalii o lou atalii; auā na e faaolaina mai i matou ai lima o Mitiana.

²³Ua fai mai Kitiona ia te i latou, Ou te le pule ia te outou, e le pule foi lo‘u atalii ia te outou; e pule lava Ieova ia te outou.

²⁴Ua fai mai foi Kitiona ia te i latou, Ou te ole atu ia te outou i le tasi mea; ia outou au mai ia te au e taitasi le tagata ma le mama o ana lava vete; (auā sa ia te i latou o mama auro; auā o sa Isamaelī i latou.)

²⁵Ona fai atu ai lea o i latou ia te ia, Matou te avatu lava. Ona latou folasia lea o le ofu, ma lafo i ai e taitasi le tagata ma le mama o ana lava vete.

²⁶O le mamafa o mama auro na ia ole atu ai, o sekeli auro ia e tasi le afe ma le fitu o selau, a e tuu ia o mea na asoa ai, ma mama i taliga, ma ofu pāuli na i ai i tupu o Mitiana, atoa ma filifili auro sa i ua o a la kamela.

²⁷Ona fai ai lea e Kitiona o le efota, ua tuu ai e ia i lana aai o Ofira; ua o atu i ai o Isaraelu uma, ua mulilua ai; ona avea lea o lenei mea ma mailei ia Kitiona ma lona aiga.

²⁸Ua toilalo lava Mitiana i luma o le fanauga a Isaraelu, ua latou le toe ea lava. Ona filemu ai lea o le nuu i tausaga e fagafulu i ona po o Kitiona.

²⁹Ona alu ai lea o Ierupaala le atalii o Ioasa, ua nofo o ia i lona lava aiga.

³⁰Sa ia Kitiona ona atalii e toafitugafulu na fanaua lava e ia; auā na toatele lava ana avā.

³¹O lana palake sa i Sekema, na fanau foi e ia se atalii mona; ona faaigoaina ai lea o ia o Apimeleko.

³²Ua oti foi Kitiona le atalii o Ioasa, ua toeaina lava ia; na tanu foi o ia i le tuugamau o Ioasa lona tamā i Ofira o sa Apieserū.

³³Ua oti Kitiona, ona toe liliu ese ai lea o le fanauga a Isaraelu e mulimuli ia Paala, e mulilua ai, ua latou faia foi o Paala-perita mo latou atua.

³⁴Ua le manatua e le fanauga a Isaraelu o Ieova lo latou Atua, o le na laveaiina i latou ai lima o i latou uma lava e na vagavagai, o e ita ia te i latou.

³⁵E lei agalelei atu foi i latou i le aiga o Ierupaala, o Kitiona lea, e tusa ma mea uma lava na agalelei atu ai o ia ia Isaraelu.