Read Samoan Old Version Bible – O LE TUSI PAIA IUTA. 1 Bible Online

IUTA. 1 - Samoan Old Version Bible – O LE TUSI PAIA bible

IUTA. 1

¹O a‘u o Iuta, o le auauna a Iesu Keriso, o le uso foi o Iakopo, o la‘u tusi lenei i e ua faapaiaina e le Atua le Tamā, ma leoleoina e Iesu Keriso ma valaauina.

²Ia faateleina ia te outou le alofa, ma le manuia, ma le agalelei.

³Le au pele e, o loo ou matua faamalosi e tusi atu ia te outou i le faaolataga ua tuu tele, e tatau ai lava ona ou tusi atu ia te outou ia apoapoai atu ia outou faamalolosi ona finau mo le faatuatua na tuuina mai faatasi i le au paia.

⁴Auā ua o ane faaleiloga o isi tagata, ua leva foi ona muai tusia o i latou ia oo i lenei lava faasala, e faalematau i latou, ua liua e i latou le alofa tunoa o lo tatou Atua i le faamatāitu, ma ua latou faafiti i le Alii e tasi, o le Atua, ma lo tatou Alii o Iesu Keriso.

⁵Ou te fia faamanatu atu foi ia te outou i le mea na outou iloa anamua, na faaolaina e le Alii le nuu ai le nuu o Aikupito, a e mulimuli ane ua faaumatia e ia o e na le faatuatua.

⁶O agelu foi o e na le taofi i lo latou mamalu, a ua tuua e i latou le mea sa latou nofo ai, ua taofia e ia i noanoataga e faavavau i lalo o le pogisa, seia oo i le faamasinoga o le aso tele.

⁷E pei o Sotoma ma Komoro, ma aai sa vagavagai ai, ua faitaaga pei o i latou, ma mulimuli atu i nisi tino, o lea ua tuu mai ai i latou e fai ma faailoga, ua faasalaina i latou i le afi e faavavau.

⁸E faapea foi lava o ia tagata moemiti, latou te faaleaga le tino, ma latou ta‘ufaatauvaa i alii, ma upu leaga i e ua mamalu.

⁹A o Mekaeli o le agelu silisili, ina ua la finau ma le tiapolo na ia finau i le tino o Mose, ua na le faamalosi ona lafo atu o se upu leaga e faasala ia te ia, a ua na faapea atu, Ia aoai le Alii ia te oe.

¹⁰A o ia tagata, latou te upu leaga i mea latou te le iloa, o mea foi e iloa fua e i latou, e pei o mea ola e leai se mafaufau, latou te faaleaga ia te i latou i ia lava mea.

¹¹Oi talofa ia te i latou! auā ua latou savavali i le ala o Kaino, ma feosofi atu i le sese o Palaamo ona o le totogi, ua fano foi i latou i le fouvale o Koru.

¹²O papa i latou i o outou faigaai alofa, pe a latou aai faatasi ma outou ma le le mata‘u, ua na ona aai lava i latou; o ao i latou e le o i ai se vai, ua feleleaiina i matagi; o laau ua malili o latou lau, ua le fua, ua mate faalua, ua liaiina lava;

¹³o peau sousou o le sami, ua faapunaia ae mea e masiasi ai i latou; o fetu feoai ua tuu mo i latou le pogisa o le pouliuli e faavavau.

¹⁴Na valoia foi i latou e Enoka, o le toafitu lea talu mai ia Atamu, ua faapea ane, Faauta, e afio mai le Alii ma ona au paia e manomano,

¹⁵e faamasino ai i tagata uma, ma faasalaina ai e ua amio faalematau uma lava o ia i latou, ona o a latou galuega faalematau uma ua latou faia ma le faalematau, ona o a latou upu faatautala foi na fai ia te ia e tagata agasala ua faalematau.

¹⁶O e muimui i latou ma faameo, o loo o savavali i latou e tusa ma o latou tu‘inanau, ma ua tautala mai o latou gutu i upu faasausili, o loo faaneenee atu foi i latou i alii e maua ai ni mea.

¹⁷A o outou le au pele e, ia outou manatua upu na fai mai anamua e le au aposetolo a lo tatou Alii o Iesu Keriso;

¹⁸na latou fai atu ia te outou, E i ai i ona aso e gata ai o tagata tauemu, o e savavali e tusa ma o latou lava tu‘inanau ma le faalematau.

¹⁹O tagata lava ia ua latou vavae ese, ua amio faaletino, ua le i ai le Agaga.

²⁰A o outou le au pele e, ia outou ati ae ia te outou i lo outou faatuatua e silisili ona paia, o le Agaga Paia tou te tatalo ai,

²¹ia outou faatumau ia te outou i le alofa o le Atua, ma faatalitali atu i le alofa o lo tatou Alii o Iesu Keriso, e oo atu i le ola e faavavau.

²²Ia outou alofa atu i nisi ma ia faatatau;

²³a o isi ia outou faaola ia i latou ma le mata‘u, ia se‘i ia te i latou mai le afi, ma ia outou ‘ino‘ino i le ofu ua pisia i le tino.

²⁴O lenei, ia ia te ia na te mafaia ona leoleo ia te outou ina ne‘i pauu, ma tuuina atu ia te outou ua le ponā i luma o lona lava mamalu ma le fiafia tele,

²⁵ia i le Atua poto e toatasi o lo tatou Faaola, le viiga ma le mamalu, o le malosi ma le pule, i nei ona po, ma ia oo i le faavavau lava. Amene.