Read Samoan Old Version Bible – O LE TUSI PAIA FAAALIGA, 1 Bible Online

FAAALIGA, 1 - Samoan Old Version Bible – O LE TUSI PAIA bible

FAAALIGA, 1

¹O le faaaliga a Iesu Keriso, na tuuina atu e le Atua ia te ia ina ia faaali mai i ana auauna o mea e tusa ona vave oo mai, ua auina mai foi e ia lana agelu e faailoa mai ai i lana auauna o Ioane,

²o le na molimau i le afioga a le Atua, ma le mau ia Iesu Keriso, o mea uma foi na ia vaaia.

³Amuia lē faitau, atoa ma e faalogologo i upu o lenei valoaga, ma tausi i mea ua tusia ai; auā ua latalata ona po.

⁴O a‘u o Ioane o la‘u tusi lenei i ekalesia e fitu o i Asia; ia ia te outou le alofa tunoa ma le manuia mai ia te ia o loo soifua, na soifua foi, o le a afio mai; mai Agaga foi e toafitu o i luma o lona nofoālii;

⁵mai ia Iesu Keriso foi, o le molimau faamaoni, o le ulumatua o e ua oti, ma le pule i tupu o le lalolagi. O le na alofa mai ia te i tatou, na ia fufulu mai foi ia te i tatou i a tatou agasala i lona lava toto,

⁶na ia faia foi i tatou ma tupu ma faitaulaga i le Atua o lona lava Tamā, ia ia te ia le viiga ma le malosi e faavavau faavavau lava. Amene.

⁷Faauta, o loo afio mai o ia ma ao, e iloa atu foi o ia e mata o tagata uma, atoa ma e na tu‘ia o ia; e taufaitagitu‘i foi itu aiga uma o le lalolagi ona o ia. E moni, Amene.

⁸O a‘u le Alefa ma le Omeka, o le amataga ma le gataaga, ua fetalai mai ai le Alii, o loo soifua, na soifua foi, o le a afio mai, e ona le malosi uma lava.

⁹O a‘u o Ioane, o lo outou uso ma le ua faatasi ma outou i le puapuaga, ma le malo, atoa ma le onosai o Iesu Keriso, na a‘u i le motu e igoa ia Patamo ona o le afioga a le Atua ma le mau ia Iesu Keriso.

¹⁰Na ou i le Agaga i le aso o le Alii; ona ou faalogo ai lea i o‘u tua i le leo tele e pei o se pu, ua faapea mai,

¹¹O a‘u le Alefa ma le Omeka, o le muamua ma le mulimuli; i le ma lea, O mea e te vaaia ia e tusi i se tusi, ma avatu i ekalesia o i Asia, o Efeso, ma Semurana, ma Perekamo, ma Tuatira, ma Sarataisa, ma Filatelefaia, ma Laotikaia.

¹²Na ou fāliu atu e vaai i le leo na tautala mai ia te au; ua ou fāliu, ona ou iloa atu lea o tuugālamepa auro e fitu.

¹³Ua i totonu foi i tuugālamepa e fitu le tasi e pei o le Atalii o le tagata, ua ofu ia i le ofu tatapuvae, ua fusia foi lona fatafata i le fusi auro;

¹⁴ua sinasina foi lona ao ma ona lauao e pei o le fulufulu mamoe ona sinasina, e pei o le kiona lava; o ona fofoga foi e pei o le mumū o le afi;

¹⁵ma ona vae e pei o le ‘apa pupula, e peiseai ua mu i le ogāumu; o lona siufofoga foi e pei o le taalili o vai e tele;

¹⁶ua i lona aao taumatau o fetu e fitu; ua alu atu foi ai lona fofoga o le pelu e faataumaai ona itu e maamaai lava; o ona fofoga foi e pei o le pupula o le la ina o mu toto‘a.

¹⁷Ua ou iloa atu ia te ia, ona ou paū ifo lea i ona vae e peiseai ua oti; a ua ia faaee mai lona aao taumatau i luga ia te au, ua faapea mai ia te au, Aua e te fefe; o a‘u le muamua ma le mulimuli;

¹⁸o lē ola nei lava, sa ou oti, faauta foi, ou te ola e faavavau faavavau lava; Amene, o ia te au foi ki o seoli ma le oti.

¹⁹Ia e tusi i mea na e iloa, ma mea o i ai nei, atoa ma mea e tutupu amuli;

²⁰o le uiga lilo o fetu e fitu na e iloa i lo‘u lima taumatau, ma tuugālamepa auro e fitu. O fetu e fitu o agelu ia a ekalesia e fitu; o tuugālamepa foi e fitu na e iloa, o ekalesia ia e fitu.