Read Samoan Old Version Bible – O LE TUSI PAIA FAAALIGA, 12 Bible Online

FAAALIGA, 12 - Samoan Old Version Bible – O LE TUSI PAIA bible

FAAALIGA, 12

¹Ua iloa foi le faailoga tele i le lagi, o le fafine ua ofu i le la, o i lalo o ona vae le masina, o i lona ulu foi le palealii fetu e sefulu ma le lua;

²ua to foi o ia; ua faatiga ma alaga i le tiga a fanau.

³Ua iloa foi le tasi faailoga i le lagi, faauta foi, o le tarako tele e mūmū, e fitu ona ulu ma ona nifo e sefulu; ua i ona ulu o palealii e fitu.

⁴Ua toso e lona iu i lona tolu o vaega o fetu i le lagi, ma lafo ifo ia i latou i le lalolagi. Ua tu foi le tarako i luma o le fafine o le a fanau, ina ia ‘ai e ia o lana tama pe a fanau.

⁵Ua fanau foi e ia o le tama tane, o le na te pule i nuu uma i le tootoo uamea; ona segia ae lea o lana tama i le Atua i lona nofoālii.

⁶Ona sola lea o le fafine i le vao, o i ai le mea ua saunia e le Atua e nofo ai o ia, ina ia latou fafaga ai ia te ia i aso e tasi le afe ma le lua o selau ma le onogafulu.

⁷Ua tau foi le taua i le lagi; o Mekaeli ma ana agelu ua latou tau ma le tarako, ua ‘au foi le tarako ma ana agelu e tau ai le taua,

⁸a ua latou le manumalo, e le toe maua foi i le lagi se mea latou te nonofo ai.

⁹Ua lafo foi le tarako tele, o le gata tuai lea, ua igoa i le tiapolo, i le ma Satani, o lē faasese i le lalolagi uma; ua lafo ifo i le lalolagi, ua lafo foi ana agelu faatasi ma ia.

¹⁰Na ou faalogo foi i le leo tele i le lagi, ua faapea, O ona po nei ua oo mai ai le olataga, ma le mana, ma le malo o lo tatou Atua ma le pule a lona Keriso; auā ua lafo i lalo le na molia o tatou uso, o le na molia i latou i luma o lo tatou Atua i le ao ma le po.

¹¹A ua latou manumalo ia te ia ona o le toto o le Tamai mamoe, ma le upu a la latou mau, ua latou le faapelepeleina foi lo latou ola ua oo i le oti.

¹²O le mea lea ia outou olioli ai, le lagi e atoa ma e ua nonofo ai. O i talofa ia te outou o e nonofo i le fanua ma le sami, auā ua alu ifo ia te outou le tiapolo ua lotoa tele, auā ua na iloa ua saasaa ona po.

¹³Ua iloa e le tarako ua lafo ifo o ia i le lalolagi, ona faasaua lea o ia i le fafine na na fanaua le tama tane.

¹⁴Ona foaiina atu lea i le fafine apaau e lua o le aeto tele, ina ia lele ai o ia ai luma o le gata i le vao i le mea e nofo ai o ia, e fagaina ai o ia i le tausaga, ma tausaga, ma lona vaeluagalemu o le tausaga.

¹⁵Ona luai atu lea e le gata le vai, e pei o se vaitafe nai lona gutu i tua o le fafine, ina ia tafea o ia i le vai.

¹⁶Ona fesoasoani ai lea o le fanua i le fafine, ua faamaga ae foi e le fanua lona gutu, ma ua inu i le vaitafe ua luai atu e le tarako nai lona gutu.

¹⁷Ua ita foi le tarako i le fafine, ona alu atu ai lea o ia e tau le taua ma i latou ua totoe o lana fanau, o e ua tausi i poloaiga a le Atua, ma ua taofi le mau ia Iesu Keriso.