Read Samoan Old Version Bible – O LE TUSI PAIA FAAALIGA, 15 Bible Online

FAAALIGA, 15 - Samoan Old Version Bible – O LE TUSI PAIA bible

FAAALIGA, 15

¹Na ou iloa foi i le lagi le tasi faailoga tele e ofo ai, o agelu e toafitu ua i ai mala e fitu e gata ai; auā e faaiuina ai le toasa o le Atua.

²Na ou iloa atu foi ua peiseai o se sami tioata ua fefiloi ma le afi; o i latou foi na manumalo i le manu feai, ma lona faatagata, ma lona faailoga, ma le faitau aofai o lona igoa, ua tutū i latou i le sami tioata, ua ia te i latou kitara a le Atua.

³Ua latou pepese i le pese a Mose le auauna a le Atua, ma le pese a le Tamai mamoe, ua faapea atu, Le Alii e, le Atua e ou le malosi uma lava, ua tetele au galuega e ofo ai; e tonu ma faamaoni ou ala, le Tupu o le au paia e.

⁴Le Alii e, o ai se le mata‘u ia te oe, ma vivii atu i lou suafa? auā ua na o oe e lelei; auā e o mai nuu uma lava, ma latou ifo i ou luma; auā ua faaalia au faamasinoga tonu.

⁵Ua mavae nei mea, ona ou vaai lea, faauta foi, ua faaavanoaina i le lagi le malumalu o i le fale fetafai o i ai le mau;

⁶ona o atu lea nai le malumalu o agelu e toafitu ua i ai mala e fitu, ua oofu i latou i ie lino e mamā ma le pupula, ua fusia foi o latou fatafata i fusi auro.

⁷O le tasi foi o mea ola e fa ua ia avatu i agelu e toafitu o ipu auro e fitu, ua tutumu i le toasa o le Atua o lē soifua e faavavau faavavau lava.

⁸Ua tumu foi le malumalu i le asu nai le pupula o le Atua atoa ma lona mana; e le mafaia foi e se tasi ona ulu atu i le malumalu, seia faaiuina mala e fitu a agelu e toafitu.