Read Samoan Old Version Bible – O LE TUSI PAIA FAAALIGA, 16 Bible Online

FAAALIGA, 16 - Samoan Old Version Bible – O LE TUSI PAIA bible

FAAALIGA, 16

¹Na ou lagona foi le leo tele mai le malumalu, ua faapea atu i agelu e toafitu, O ia, ina liligi atu ipu o le toasa o le Atua i le lalolagi.

²Ona alu atu ai lea o lē muamua, ua liligi ifo lana ipu i le fanua; ona oo lea o le papala leaga e tiga ai tagata ua i ai le faailoga o le manu feai, atoa ma ē ua ifo i lona faatagata.

³Ua liligi foi e lona toalua o agelu lana ipu i le sami; ona liu toto ai lea e pei o le toto o le tagata oti; ona mamate ai lea o mea ola uma o i le sami.

⁴Ua liligi foi e lona toatolu o agelu lana ipu i vaitafe ma puna o vai; ona liu toto ai lea.

⁵Na ou lagona foi le agelu e pule i vai ua faapea atu, Le Alii e, o lē amiotonu oe, o lē soifua, o le na soifua, ma loo lelei, auā ua faapea ona e faasalaina.

⁶Auā na latou faamaligiina le toto o tagata paia ma perofeta, i le ua e avatu ai ia te i latou le toto e inu ai; auā ua tatau lea mo i latou.

⁷Na ou lagona foi i le tasi mai le fata faitaulaga, ua faapea atu, E moni, le Alii e, le Atua e ou le malosi uma lava; e faamaoni ma le tonu au faamasinoga.

⁸Ua liligi foi e lona toafa o agelu lana ipu i le la; ua tuuina atu i ai ia mu ai tagata i le afi;

⁹ua mu foi tagata i le mu tele, ona latou faifai lea i le suafa o le Atua e ana le pule i ia mala; a ua le salamo i latou e avatu ai le viiga ia te ia.

¹⁰Ua liligi foi e lona toalima o agelu lana ipu i le nofoālii o le manu feai; ona faapouliuligia lea o lona malo; ona latou feati ai lea o latou laulaufaiva ona o le puapuaga;

¹¹ua latou faifai foi i le Atua o le lagi ona o latou puapuaga atoa ma o latou papala, ua le salamo foi i latou i a latou amio.

¹²Ua liligi foi e lona toaono o agelu lana ipu i le vaitafe tele o Eufirate; ona mate ai lea o lona vai, ina ia saunia le ala o tupu mai nuu e alu ae ai le la.

¹³Ona ou iloa ai lea o agaga leaga e toatolu e pei o rane ua o mai mai le gutu o le tarako, ma le gutu o le manu feai, atoa ma le gutu o le perofeta pepelo;

¹⁴auā o agaga ia o temoni e fai faailoga, ua latou o atu i tupu o le lalolagi ma le atu laulau uma, e faapotopoto ia te i latou i le taua i le aso tele o le Atua e ona le malosi uma lava.

¹⁵(Faauta, ou te alu atu pei o se gaoi; amuia lē mataala, ma tausi i ona ofu, ina ne‘i savali o ia e lē lavalavā, ne‘i latou iloa atu foi lona mā.)

¹⁶Na ia faapotopoto foi ia te i latou i le mea ua igoa i le upu Eperu o Amaketo.

¹⁷Ua liligi foi e lona toafitu o agelu lana ipu i le matagi; ona tŭlei mai ai lea o le siufofoga tele mai le malumalu o i le lagi mai le nofoālii, ua faapea mai, Ua uma ona fai.

¹⁸Ona tutupu ai lea o leo, ma faititili, ma uila, sa i ai foi le mafuie tele, e le faapea ona tele se mafuie ua tele naua talu ona i ai o tagata i le lalolagi.

¹⁹Ua vaetoluina foi le aai tele, ua pauu foi aai o nuu; ua manatua Papelonia le aai tele i luma o le Atua, ina ia tuuina atu ia te ia o le ipu o le uaina o lona toasa mamafa.

²⁰Ua sosola foi motu uma, o mauga foi ua le iloa.

²¹Ua to mai foi ai le lagi i luga o tagata le uato‘a latetele, e pei o le taleni ona mamafa; ona faifai ai lea o tagata i le Atua ona o le mala o le uato‘a, auā ua matuā tele lea mala.