Read Samoan Old Version Bible – O LE TUSI PAIA FAAALIGA, 17 Bible Online

FAAALIGA, 17 - Samoan Old Version Bible – O LE TUSI PAIA bible

FAAALIGA, 17

¹Ua sau foi le tasi o ia agelu e toafitu sa i ai ipu e fitu, ua tautala mai ia te au, ua faapea mai ia te au, Sau ia, ou te faailoa ia te oe le faasalaina o le fafine talitane e sili, o lē tietie i vai e tele;

²ua faitaaga ma ia o tupu o le lalolagi, ua onā foi e o nonofo i le lalolagi i le uaina o lana faitaaga.

³Ua ia avea foi a‘u i le vao i le Agaga; ona ou iloa lea o le fafine ua tietie i le manu feai mūmū, ua lilo i igoa faifai, e fitu ona ulu ma ona nifo e sefulu.

⁴Ua ofu le fafine i le ie pāuli ma le mūmū, ua teuteu foi i auro, ma maa tāua, ma penina, ua i lona lima le ipu auro, ua tumu i mea e inosia ma le leaga o lana faitaaga;

⁵ua tusia foi i lona muaulu le igoa, O LE MEA LILO, PAPELONIA LE AAI TELE, O LE TINA O FAFINE TALITANE MA MEA E INOSIA I LE LALOLAGI.

⁶Na ou iloa foi le fafine ua onā i le toto o le au paia ma le toto o e na molimau ia Iesu; ua ou iloa atu ia te ia, ona ou matuā ofo tele ai lea.

⁷Ona fai mai lea o le agelu ia te au, Se a le mea ua e ofo ai? Ou te ta‘u atu ia te oe le uiga lilo o le fafine, ma le manu feai ua ia tietie ai, e fitu ona ulu ma ona nifo e sefulu.

⁸O le manu feai na e iloa, sa i ai, ua le i ai foi, o le a alu ae foi o ia ai le to e le gata, e alu atu foi o ia i le malaia; o e nonofo i le lalolagi, (e lei tusia o latou igoa i le tusi o le ola talu ona faavaeina o le lalolagi,) latou te taufaiofo, pe a iloa le manu feai sa i ai, ua le i ai foi, a e ui i lea o loo i ai lava.

⁹O le mea lenei ua i ai le atamai e ona le poto. O ulu e fitu o mauga ia e fitu, ua nofo ai le fafine;

¹⁰o tupu foi ia e toafitu; e toalima ua pauu, o loo i ai le tasi, e lei oo mai nei foi le tasi; pe a oo mai e tusa ona saasaa ona po e tumau ai.

¹¹O le manu feai foi sa i ai, ua le i ai foi, o lona toavalu lea, nai le toafitu foi o ia, e alu atu foi o ia i le malaia.

¹²O nifo foi e sefulu na e iloa, o tupu ia e toasefulu, ua le oo ina maua o latou malo, a e maua e i latou le pule pei o tupu e tasi le itu aso faatasi ma le manu feai.

¹³Ua loto gatasi i latou nei, latou te avatu foi o latou malosi ma a latou pule i le manu feai.

¹⁴Latou te tau le taua ma le Tamai mamoe, a e manumalo le Tamai mamoe ia te i latou, auā o le Alii ia o alii ma le Tupu o tupu; o e ua ia te ia foi ua valaauina i latou, ma filifilia, ma faamaoni.

¹⁵Ona fai mai lea o ia ia te au, O vai na e iloa, o loo tietie ai le fafine talitane, o nuu ia, ma motu o tagata, ma atu nuu, ma gagana eseese.

¹⁶O nifo foi e sefulu na e iloa i le manu feai, latou te ‘ino‘ino i le fafine talitane, ma faasaunoa ia te ia, ma to ese ona ofu, latou te aai foi i lona tino, ma susunu ia te ia i le afi.

¹⁷Auā ua tuuina atu e le Atua i o latou loto ia faia lona finagalo, latou te loto gatasi foi e avatu lo latou malo mo le manu feai, seia taunuu afioga a le Atua.

¹⁸O le fafine foi na e iloa, o le aai tele lea, e i ai le pule i tupu o le lalolagi.