Read Samoan Old Version Bible – O LE TUSI PAIA FAAALIGA, 18 Bible Online

FAAALIGA, 18 - Samoan Old Version Bible – O LE TUSI PAIA bible

FAAALIGA, 18

¹Ua mavae ia mea, ona ou iloa atu lea o le agelu o loo alu ifo i le lagi, ua ia te ia le pule sili; ua malamalama foi le lalolagi i lona pupula.

²Ua matuā alaga foi o ia ma le leo tele, ua faapea ane, Ua paū, ua paū Papelonia le aai tele, ua avea foi o ia ma mea e nofo ai temoni, ma mea e puipui ai agaga leaga uma, o le mea foi e puipui ai manu felelei uma e leaga ma le inosia;

³auā ua feinu nuu uma i le uaina o le toasa i lana faitaaga, ua faitaaga foi ma ia tupu o le lalolagi, o le faulaiga o ana mea faafiafia ua tamaoaiga ai e ua faatau oa o i le lalolagi.

⁴Ua ou faalogo foi i le tasi leo mai le lagi, ua faapea mai, Lo‘u nuu e, ia outou o ese ia te ia, ina ne‘i faatasia outou i ana agasala, ina ne‘i tofusia foi outou i ona mala;

⁵auā ua pa‘i atu ana agasala i le lagi, ua manatua foi e le Atua ana amioleaga.

⁶Ia outou taui atu ia te ia ia pei ona taui mai e ia ia te outou, ia outou taui faalua ia te ia e tusa ma ana galuega; o le ipu foi na liligi mai ai e ia, ia outou liligi faaluaina atu ai ia te ia.

⁷E pei ona mitamita o ia ia te ia, mona ua faafiafia o ia ia te ia, ia faapea ona outou tuuina atu ia te ia o le puapuaga ma le faanoanoa. Auā ua faapea ifo ia i lona loto, Ou te nofo nei o le tupu fafine, ou te le se fafine ua oti lana tane, ou te le iloa lava se faanoanoa;

⁸o le mea lea e oo mai ai i le aso e tasi ona mala, o le oti, ma le faanoanoa, ma le oge; e susunuina foi o ia i le afi; auā e malosi lava le Alii le Atua o lē faasala ia te ia.

⁹O tupu foi o le lalolagi e na faitaaga ma faafiafia i latou faatasi ma ia, latou te taufaitagi ia te ia ma taufaitagitu‘i ona o ia, pe a latou iloa atu le asu o lona susunuina;

¹⁰e tutū mamao i latou ona o le fefe i lona puapuaga, e faapea atu, Aue, aue Papelonia e, le aai tele ma le aai malosi! auā o le itu aso e tasi ua oo mai ai lau sala.

¹¹O faatauoa foi i le lalolagi e taufaitagi i latou ma faanoanoa ona o ia; auā e le toe faatau e se tasi a latou oloa;

¹²o le oloa auro, ma ario, ma maa tāua, ma penina, ma ie vavae, ma ie pāuli, ma le silika, ma le ie mūmū, ma laau tuina uma, ma ipu nifo elefane uma, ma ipu laau matuā tāua uma, ma le ‘apa memea, ma le uamea, ma le maremaru,

¹³ma kinamomi, ma mea manogi, ma le suāuu manogi, ma le pulu lipano, ma le uaina, ma le uu olive, ma le falaoa lelei, ma le saito, ma manu, ma mamoe, ma solofanua, ma nofoa faataavalevale, o tino foi atoa ma agaga o tagata.

¹⁴Ua te‘a foi ma oe o fua na e tu‘inanau i ai, ua te‘a foi ma oe mea lalelei uma ma mea pupula, e te le toe maua lava ia mea.

¹⁵O e faatau ia mea, o e tamaoaiga ona o ia, latou te tutū mamao ma le fefe i lona puapuaga, o loo taufaitagi ma faanoanoa,

¹⁶o loo faapea atu, Aue, aue le aai tele, na ofu i le ie vavae ma le pāuli, ma le mūmū, na teteu foi i auro, ma maa tāua ma penina;

¹⁷auā o le itu aso e tasi ua faaumatia ai le oloa ua sili ona tele. O tautai uma, atoa ma tagata uma o i vaa, ma auvaa, atoa uma ma e feoai i le vasa, ua tutū mamao i latou,

¹⁸ma latou alalaga ina o iloa mai le asu o lona susunuina, ua faapea, O fea se aai e tusa ma lenei aai tele?

¹⁹Ua latou lafo ae foi le eleele i o latou ulu, ua alalaga, ma taufaitagi, ma faanoanoa, ua faapea atu, Aue, aue le aai tele, na tamaoaiga ai i latou uma o e o i ai vaa i le vasa, ona o ana mea tāua; auā o le itu aso e tasi ua faatafunaina ai o ia.

²⁰Ia e olioli ona o ia, le lagi e, atoa ma outou aposetolo paia ma perofeta; auā ua faasalaina o ia e le Atua ona o le faasalaina o outou e ia.

²¹Ua siitia foi e le tasi agelu malosi o le maa e pei o se maaolo tele, ma lafo i le sami, ua faapea atu, E faapea ona lafotuina o Papelonia le aai tele, e le toe iloa lava.

²²E le toe lagona foi ia te oe le leo o e ta kitara, ma ē lagi siva, ma ē ili fagufagu, atoa ma ē ili pu; e le toe iloa foi ia te oe se tufuga e toatasi o se faiva e tasi, e le toe lagona foi ia te oe le taalili o le maaolo,

²³e le toe pupula mai foi ia te oe se malamalama o se lamepa, e le toe lagona foi ia te oe le leo o le faatoafaiavā ma le faatoanofo tane; auā o ou tagata faatauoa o tagata sili ia o i le lalolagi, auā ua faaseseina nuu uma i au togafiti faataulāitu.

²⁴Ua iloa foi ia te oe le toto o perofeta ma le au paia, ma i latou uma ua fasiotia i le lalolagi.