Read Samoan Old Version Bible – O LE TUSI PAIA FAAALIGA, 2 Bible Online

FAAALIGA, 2 - Samoan Old Version Bible – O LE TUSI PAIA bible

FAAALIGA, 2

¹Ia e tusi i le agelu a le ekalesia o i Efeso. O mea nei ua fai mai ai lē ‘u‘u i fetu e fitu i lona lima taumatau, o lē savali i totonu o tuugālemepa auro e fitu.

²Ua ou iloa i au galueaga, ma lou tiga, ma lou onosai, ina ua e le lavatia i e ua leaga; ua e tofotofo foi i e ua fai mai o aposetolo i latou, a e leai lava, ua e iloa foi o tagata pepelo i latou,

³ma ua e lavatia, ua ia te oe foi le onosai, ua e tautiga ona o lo‘u igoa, e te lei faavaivai lava.

⁴A ua ou iloa se mea ia te oe, ona ua e tuua o lou uluai alofa.

⁵O lenei, ia e manatua le mea na e paū mai ai, ma ia e salamo, ma e faia au uluai galuega; afai e leai, ona ou vave alu atu lea ia te oe, ou te aveesea lau tuugālamepa i le mea e tuu ai pe afai e te le salamo.

⁶A ua ia te oe lenei mea, ina ua e ‘ino‘ino i galuega a le au Nikalaitai, o a‘u foi ou te ‘ino‘ino i ai.

⁷O le ua i ai taliga, ina faalogo mai ia o ia i le mea ua fetalai mai ai le Agaga i ekalesia, O lē manumalo, ou te avatua ia te ia e ‘ai i le laau o le ola o i totonu o le parataiso o le Atua.

⁸Ia e tusi foi i le agelu a le ekalesia o i Semurana, O mea nei ua fai mai ai lē muamua ma lē mulimuli, o le na oti, a ua ola mai,

⁹Ua ou iloa au galuega, ma lou puapuaga, ma lou mativa, (a ua e tamaoaiga,) ma le upu faifai a ē ua fai mai o Iutaia i latou, a e leai lava, a o le sunako o Satani i latou.

¹⁰Aua lava e te fefe i mea o le a e tiga ai. Faauta, o le a tuuina atu ni o outou e le tiapolo i le fale puipui, ina ia tofotofoina ai outou; e po agafulu foi e puapuagatia ai outou. Ia e faamaoni seia oo i le oti, ona ou avatu ai lea ia te oe o le pale o le ola.

¹¹O le ua i ai taliga, ina faalogo mai ia o ia i le mea ua fetalai mai ai le Agaga i ekalesia, O lē manumalo, e le afaina lava o ia i le oti faalua.

¹²Ia e tusi foi i le agelu a le ekalesia o i Perekamo, O mea nei ua fai mai ai le ua i ai le pelu e faatau maai ona itu ua maamaai lava,

¹³Ua ou iloa au galuega, ma le mea ua e nofo ai, o i ai le nofoālii o Satani, ua e taofi mau foi i lo‘u igoa, ma ua e le faafitia le faatuatua ia te au i ia ona po lava na i ai Anetipa o la‘u molimau o le na faamaoni, sa fasiotia o ia na ia te outou i le mea o nofo ai Satani.

¹⁴A ua ia te au ni nai mea ia te oe, ona ua ia te oe o e ua taofi i le mataupu a Palaamo, o le na a‘oa‘o ia Palako e tuu atu le mea e tausuai ai i luma o le fanauga a Isaraelu, ona ia aai i mea ua fāsia mo tupua ma ia latou faitaaga.

¹⁵E faapea foi ona ia te oe o e ua taofi i le mataupu a le au Nikalaitai; o le mea ou te ‘ino‘ino i ai.

¹⁶Ina e salamo ia; afai e leai, ona ou vave alu atu lea ia te oe, ou te tau foi ma i latou i le pelu ai lo‘u gutu.

¹⁷O le ua i ai taliga, ina faalogo mai ia o ia i le mea ua fetalai mai ai le Agaga i ekalesia, O lē manumalo, ou te avatua ia te ia le manai lilo e ‘ai ai; ou te avatu foi ia te ia le maa sinasina, ua tusia foi i le maa le igoa fou, e le iloa e se tasi ua na o le ua maua.

¹⁸Ia e tusi foi i le agelu a le ekalesia o i Tuatira, O mea nei ua fai mai ai le Atalii o le Atua, o le e pei o le mumū o le afi ona mata, o ona vae foi e pei o le ‘apa pupula,

¹⁹Ua ou iloa au galuega ma lou alofa, ma lou auauna mai, ma lou faatuatua, ma lou onosai, ma au galueaga, ua sili mea mulimuli i mea na muamua.

²⁰A ua ia te au ni nai mea ia te oe, ona ua e tuu pea le fafine o Iesepela, ua ta‘ua o ia e ia o le perofeta fafine, e a‘oa‘o ma faasese i a‘u auauna, ina ia faitaaga, ma aai mea ua fāsia mo tupua.

²¹Ua ou tuu atu foi ni ona aso ia salamo ai i lana faitaaga, a ua le salamo lava o ia.

²²Faauta, o a‘u ou te lafo ia te ia i le moega, atoa ma e ua mulilulua ma ia, ina ia puapuagateleina, pe afai latou te le salamo i a latou galuega;

²³ou te fāsia foi ana fanau ia oti; e iloa foi e ekalesia uma, o a‘u lava o lē suesue i manao ma loto; ou te avatua foi ia te outou taitoatasi e tusa ma a outou galuega.

²⁴A ou te fai atu ia te outou, atoa ma nisi o i Tuatira, o e ua le i ai lenei mataupu, ma ua latou le iloa mea loloto a Satani, (pei ona ta‘ua e i latou,) Ou te le tuuina atu se isi avega ia te outou;

²⁵a e peitai o le mea ua ia te outou ia outou taofi mau ai, seia ou alu atu.

²⁶O lē manumalo foi, ma tausi i a‘u galuega seia oo i le gataaga, ou te avatua ia te ia e pule i nuu ese;

²⁷e pule foi o ia ia te i latou i le tootoo uamea; e nutipalaina i latou pei o ipu a lē fai ipu omea, e pei o a‘u foi ona ou maua mai i lo‘u Tamā;

²⁸ou te avatua foi ia te ia le fetu ao.

²⁹O le ua i ai taliga, ina faalogo mai ia o ia i le mea ua fetalai mai ai le Agaga i ekalesia.