Read Samoan Old Version Bible – O LE TUSI PAIA FAAALIGA, 20 Bible Online

FAAALIGA, 20 - Samoan Old Version Bible – O LE TUSI PAIA bible

FAAALIGA, 20

¹Na a‘u iloa foi le agelu ua alu ifo i le lagi, ua ia te ia le ki o le to e le gata, ua i lona lima foi le maea uamea tele.

²Ua pue foi e ia le tareko, o le gata tuai, o le tiapolo lea ma Satani, ua ia fusifusi foi ia te ia i tausaga e afe.

³Ua ia lafo foi ia te ia i le to e le gata, ua pupuni foi ia te ia, ma tuuina atu le faamaufaailoga i ona luga, ina ia le toe faaseseina e ia o nuu, seia atoa ia tausaga e afe; a mavae foi ia, e tatau ona tatalaina o ia i nai aso.

⁴Na a‘u iloa foi nofoālii, ma ua latou tietie ai, ua tuuina atu foi le faamasinoga ia te i latou; na a‘u iloa foi agaga o e ua vavaeeseina o latou ulu ona o le mau ia Iesu ma le afioga a le Atua, o e na le ifo i le manu feai po o lona faatagata, na le talia foi le faailoga i o latou muaulu po o latou lima; ua latou ola foi, ma ua fai ma tupu faatasi ma Keriso i tausaga e afe;

⁵a o e totoe o e ua oti, e lei toe ola i latou seia atoa ia tausaga e afe. O le uluai toe tu lena.

⁶Amuia mona ua paia le ua i ai se tofi i le uluai toe tu; e le oo foi le pule a le oti faalua ia te i latou, a e avea i latou ma faitaulaga a le Atua ma Keriso, latou te fai ma tupu foi faatasi ma ia i tausaga e afe.

⁷Pe a atoa foi ia tausaga e afe, ona tatalaina lea o Satani ai le mea na puipuiina ai o ia.

⁸E alu atu foi o ia e faasese i nuu o i itu e fa o le lalolagi, o Koku ma Makoku, e faapotopoto ia te i latou i le taua, ua pei o le oneone o le sami i latou ona toatele.

⁹Ua o ae foi i latou i le mafolafola o le lalolagi, ua latou siomia foi le toagālauapi a le au paia ma le aai ua faapelepeleina; ona alu ifo lea o le afi mai le Atua i le lagi, ua susunu ai ia te i latou;

¹⁰o le tiapolo foi o le na faasese ia te i latou, ua lafoina o ia i le lepa afi ma le teio, o i ai le manu feai ma le perofeta pepelo; e puapuagaina ai i latou i le ao ma le po e faavavau faavavau lava.

¹¹Na a‘u iloa foi le nofoālii tele e sinasina, ma le o tietie ai, ua sosola ese le lalolagi ma le lagi i ona luma, e le iloa foi se mea e tu ai i laua.

¹²Na a‘u iloa foi o e na oti, o tagatānuu atoa ma alii, o tutū i luma o le Atua, ona fofola lea o tusi; ua fofola foi ma le tasi tusi, o le tusi lea o le ola; ona faamasinoina ai lea o e na oti i mea ua tusia i tusi, e tusa ma a latou amio.

¹³Ua avae foi e le sami e na oti sa i ai, ua avae foi e le oti ma seoli e na oti sa i ai; e taitasi foi o i latou ma faamasinoina e tusa ma a latou amio.

¹⁴Ua lafoina foi le oti ma seoli i le lepa afi; o le oti faalua lea.

¹⁵Ai se tasi ua iloa ua le tusia i le tusi o le ola, ua lafoina lea i le lepa afi.